11 Dec 2016, 23:26
އިނގިރޭސި ޕްރިމިއާ ލީގުގެ ތާވަލުގެ އެއް ވަނައަށް އަލުން ޗެލްސީ ޖެހިލި އިރު، ޓޮޓެންހަމް ހޮޓްސްޕާ އަތުން މެންޗެސްޓާ ޔުނައިޓެޑު މޮޅުވެއްޖެ އެވެ.
ލީގުގައި މިރޭ ވެސްޓް ބްރޮމް އަލްބިއޮންއާ ދެކޮޅަށް އަމިއްލަ ދަނޑުގައި ކުޅުނު މެޗުން ޗެލްސީ މޮޅުވެފައި ވަނީ 1-0 ލަނޑުގެ ނަތީޖާއަކުންނެވެ.
އިނގިރޭސި ޕްރިމިއާ ލީގުގައި ޗެލްސީ އާއި ވެސްޓް ބްރޮމް ބައްދަލުކުރި މެޗުގެ ތެރެއިން: އެ މެޗުން ޗެލްސީ މޮޅުވީ 1-0 ލަނޑުން --- ފޮޓޯ/ އޭޕީ
އެ މެޗުގެ ފުރަތަމަ ހާފުގައި ދެ ޓީމަށް ވެސް ލަނޑުޖަހާނެ ފުރުސަތުތަކެއް ލިބިގެންދިޔައެވެ. އެގޮތުން ފުރަތަމަ ހާފުގައި ޗެލްސީގެ ޑިއެގޯ ކޮސްޓާ އާއި ޑޭވިޑް ލުއިޒަށް ލަނޑު ޖަހާނެ ފުރުސަތެއް ލިބިގެންދިޔަ އިރު، ވެސްޓް ބްރޮމްގެ ރޮންޑޮން އަށް ވެސް ލަނޑު ޖަހާނެ ރަނގަޅު ފުރުސަތެއް ލިބިގެންދިޔައެވެ. މެޗުގެ ފުރަތަމަ ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ.
މެޗުގައި ޗެލްސީން ކާމިޔާބުކުރި ލަނޑު ފެނިގެންދިޔައީ 76 ވަނަ މިނެޓުގައެވެ. ވެސްޓް ބްރޮމްގެ ޑިފެންޑަރު ގެރެތު މެކްއޯލޭއަށް ހެދުނު ގޯހެއްގެ ފައިދާ ނަގައި، ޗެލްސީއަށް އެ ލަނޑު ކާމިޔާބުކޮށްދިނީ ޑިއެގޯ ކޮސްޓާ އެވެ. އެއީ މި ސީޒަނުގެ ޕްރިމިއާ ލީގުގައި އޭނާ ކާމިޔާބުކުރި 12 ވަނަ ލަނޑެވެ. ލީގުގައި މިހާތަނަށް އެންމެ ގިނަ ލަނޑު ޖަހާފައިވާ ކުޅުންތެރިޔަކީ ވެސް ކޮސްޓާ އެވެ.
އަމިއްލަ ދަނޑުގައި މިރޭ ޓޮޓެންހަމްއާ ދެކޮޅަށް ކުޅުނު މެޗުން މެންޗެސްޓާ ޔުނައިޓެޑް މޮޅުވެފައި ވަނީ 1-0 ލަނޑުގެ ނަތީޖާއަކުންނެވެ.
ޓޮޓެންހަމް ކޮޅަށް ލަނޑު ޖެހުމަށްފަހު، މެންޗެސްޓާ ޔުނައިޓެޑްގެ މިކިތާރިޔަން އުފާފާޅުކުރަނީ: ޕްރިމިއާ ލީގުގައި ކުޅުނު އެ މެޗުން ޔުނައިޓެޑް މޮޅުވީ 1-0 ލަނޑުން --- ފޮޓޯ/ އޭޕީ
އެ މެޗުގައި ޔުނައިޓެޑުން ލަނޑު ޖަހާފައި ވަނީ މެޗުގެ ފުރަތަމަ ހާފުގައެވެ. މެޗުގެ 29 ވަނަ މިނެޓުގައި ސްޕެއިން މިޑްފީލްޑަރު އެންޑާ ހެރޭރާ ދިން ބޯޅައަކުން ޔުނައިޓެޑަށް އެ ލަނޑު ކާމިޔާބުކޮށްދިނީ އެ ޓީމުގެ އަރްމޭނިއާ މިޑްފީލްޑަރު ހެންރިކް މިކިތާރިޔަން އެވެ. އޭނާ އެ ލަނޑު ކާމިޔާބުކުރީ ޓޮޓެންހަމްގެ ޕެނަލްޓީ އޭރިޔާ ތެރެއިން އުފެއްދި ބާރު ހަމަލާއަކުންނެވެ.
އެ މެޗުގައި ޓޮޓެންހަމް އަށް ވެސް ލަނޑު ޖަހާނެ ފުރުސަތުތަކެއް ލިބިފައިވެ އެވެ. އެގޮތުން އެ ޓީމުގެ ހިޔުންގް މިން ސޮން އާއި ކްރިސްޓިއަން އެރިކްސަންގެ އިތުރުން ވިކްޓާ ވަންޔާމާ އަށް ލިބުނު ހުސް ފުރުސަތު ފާހަގަކޮށްލެވެ އެވެ.
ތާވަލުގެ އެއް ވަނައަށް ޗެލްސީ ޖެހިލާފައި ވަނީ ކުޅުނު 15 މެޗުން ލިބުނު 37 ޕޮއިންޓާއެކު އެވެ. ދެ ވަނައިގައި އޮތް އާސެނަލަށް 15 މެޗުން 34 ޕޮއިންޓް ލިބިފައިވާ އިރު، ތިން ވަނައިގައި އޮތީ ލިވަޕޫލެވެ. ހަތަރު ވަނައިގައި އޮތް މެންޗެސްޓާ ސިޓީއަށް 15 މެޗުން 30 ޕޮއިންޓް ލިބިފައިވާ އިރު، ފަސް ވަނައިގައި އޮތް ޓޮޓެންހަމް އަށް ލިބިފައި ވަނީ 27 ޕޮއިންޓެވެ. ޔުނައިޓެޑް އޮތީ ކުޅުނު 15 މެޗުން ލިބުނު 24 ޕޮއިންޓާއެކު ތާވަލުގެ ހަ ވަނައިގައެވެ.