14 Dec 2016, 09:35
މޮސްކޯ (ޑިސެމްބަރު 14): ސީރިއާގެ ހަލަބުގެ ހަނގުރާމަ ނިމުމަކަށް އަތުވެއްޖެ ކަމަށް ރަޝިއާއިން އދ އަށް ކަނޑައަޅާފައި ހުންނަ ސަފީރު ވިޓަލީ ޗާކިން ވިދާޅުވެއްޖެ އެވެ.
ޗާކިން ވިދާޅުވި ގޮތުގައި ހަލަބުގައި އިދިކޮޅު ފަރާތްތަކުން ހިފާފައިވާ ސަރަހައްދުތައް މިހާރު ވަނީ އަސްކަރިއްޔާގެ ބާރުގެ ދަށުގައި އެވެ. އަދި އިދިކޮޅު ފަރާތްތަކުންނާއި އާއްމުންނަށް އެ ސަރަހައްދު ދޫކޮށް ދެވޭ ގޮތަށް ސަރުކާރުގެ ފައުޖުތަކާއެކު އެއްބަސްވުމެއް ހަދާފައިވާ ކަމަށް ޗާކިން ވިދާޅުވި އެވެ.
"އަޅުގަނޑުމެން އެންމެ ފަހުން ލިބުނު މައުލޫމާތުން އެނގޭ ގޮތުގައި އިރުމަތީ ހަލަބުގައި އަސްކަރީ ހަރަކާތްތައް ވަނީ ހުއްޓާލަފަ. އާއްމުންނަށް އެތަނުގަ ތިބެވިދާނެ. ނުވަތަ އެހެން ތަނަކަށް ދެވިދާނެ. އެމީހުންނަށް އިންސާނީ އެހީ އެބަ ފޯރުކޮށްދޭ. އާއްމުންނަކަށް އެއްވެސް މީހަކު އަނިޔާއެއް ނުކުރާނެ،" އދގެ ސަލާމަތީ ކައުންސިލުގެ ކުއްލި ބައްދަލުވުމެއްގައި ޗާކިން ވިދާޅުވި އެވެ.
ނަމަވެސް މީގެ ކުރިން އދން ވަނީ ސީރިއާ އަސްކަރިއްޔާއިން ވަނީ އިރުމަތީ ހަލަބުގެ ހަތަރު ސަރަހައްދެއްގައިވާ އާއްމުންގެ ގެތަކަށް ވަދެ 82 މީހަކު މަރާލާފައިވާ ކަމަށް ބުނެފަ އެވެ.
އދ އާއި އެމެރިކާއިން ބުނާ ގޮތުގައި ހަލަބުގައި ހިނގި ޖަރީމާތަކުގެ ޒިންމާ ނަގަން ޖެހޭނީ ސީރިއާގެ ސަރުކާރާއި، ސަރުކާރަށް ވާގިވެރިވާ ރަޝިއާ އާއި އީރާނުންނެވެ. ނަމަވެސް ރަޝިއާއިން ވަނީ އދގެ ތުހުމަތުތައް ދޮގުކޮށްފަ އެވެ.
ދެހާސް އެގާރަ ވަނަ އަހަރު ރައީސް ބައްޝާރުލް އައްސަދުގެ ވެރިކަމާ ދެކޮޅަށް މުޒާހަރާ ކުރަން ފެށުމުގެ ކުރިން ހަލަބަކީ އިގުތިސާދީ ގޮތުންނާއި ސިނާއީ ގޮތުން ސީރިއާގެ އެންމެ ކުރިއަރާފައިވާ ސިޓީ އެވެ. އެ ސިޓީ ސަރުކާރުގެ ފައުޖުތަކުގެ ކޮންޓްރޯލްގެ ދަށަށް އައުމަކީ ސީރިއާ ހަނގުރާމައިގައި އެގައުމުގެ ސަރުކާރަށް ލިބުނު ބޮޑު ކާމިޔާބީ އެކެވެ.
ނަމަވެސް އެ ކާމިޔާބީ އަކީ ސީރިއާ ހަނގުރާމަ ނިމުމަކަށް އައުން ނޫން ކަމަށް ރައީސް އަަސަދު އާއި އިދިކޮޅު ފަރާތްތަކުން ވެސް ވަނީ މީގެ ކުރިން ބުނެފަ އެވެ. (ބީބީސީ)