19 Dec 2016, 21:14
ގާނޫނާއި ގަވާއިދާ ހިލާފަށް، ރާއްޖެއިންބޭރަށް ފައިސާ ފޮނުވުމުގެ ހިދުމަތް ދެމުންދިޔަ ފަރާތްތަކާމެދު ގާނޫނީ ފިޔަވަޅު އަޅާފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފި އެވެ.
އެމްއެމްއޭ ނެރުނު ބަޔާނެއްގައި ބުނެފައި ވަނީ މަނީ ޓްރާންސްފާ ލައިސަންސް ނެތި "ބީ.ކޭޝް" މަނީ ޓްރާންސްފާގެ ނަމުގައި، އާއްމުންނަށް ފެންނާނެހެން އިސްތިހާރުކޮށް، ބައެއްފަރާތްތަކުން ބަންގްލަދޭޝްއަށް ފައިސާ ޓްރާންސްފާ ކުރަމުންދާކަމުގެ މައުލޫމާތު އެ އޮތޯރިޓީއަށް ލިބިފައިވާ ކަމަށެވެ.
އެ މައުލޫމާތު ލިބުމާ އެ ފަރާތްތަކާއި ބެހޭ މައުލޫމާތު ކަމާ ބެހޭ ފަރާތްތަކާ ހިއްސާ ކޮށްފައިވާ ކަމަށާއި، އަދި މައްސަލަ ބެލުމަށް ފަހު ރާއްޖެއިން ބޭރަށް ފައިސާ ފޮނުވުމުގެ ހިދުމަތް ދެމުންދިޔަ ފަރާތްތަކާމެދު ގާނޫނީ ފިޔަވަޅު އަޅާފައިވާ ކަމަށް އެމްއެމްއޭ އިން ބުންޏެވެ.
ރާއްޖޭގައި މަނީ ޓްރާންސްފާ ކުރުމުގެ ހިދުމަތް ދެވޭނީ އެމްއެމްއޭ އިން ދޫކުރާ ލައިސަންސް އޮންނަ ފަރާތްތަކަށް އެކަންޏެވެ. ލައިސަންސް ނެތި މަނީ ޓްރާންސްފާގެ ހިދުމަތް ދިނުމަކީ ގާނޫނީ ކުށެކެވެ.
އެމްއެމްއޭ އިން ބުނީ ލައިސަންސް ނެތި މަނީ ޓްރާންސްފާގެ ހިދުމަތް ދޭ ފަރާތްތަކާމެދު ކުރިޔަށް އޮތް ތަނުގައި ވެސް ކަމާބެހޭފަރާތްތަކާ ގުޅިގެން ފިޔަވަޅު އަޅަމުންގެންދާނެ ކަމަށެވެ. އަދި އެފަދަ ފަރާތްތަކާއި ބެހޭ މައުލޫމާތު ލިބިފައިވާނަމަ، އެކަން އެ އޮތޯރިޓީއަށް އެންގުމަށް ވެސް އެމްއެމްއޭ އިން އެދެ އެވެ.