20 Dec 2016, 10:11
އަންކަރާ (ޑިސެމްބަރު 20) : ތުރުކީގެ ވެރިރަށް އަންކަރާގައި ހުންނަވާ ރަޝިޔާގެ ސަފީރު އެންޑްރޭ ކާލޯވްގެ ގައިކޮޅަށް ބަޑިޖަހައި އަވަހާރަކޮށްލި ނަމަވެސް ދެގައުމުގެ ދެމެދުގައިވާ ރަހްމަތްތެރިކަމާއި ގާތްގުޅުންތަކަށް ބަދަލުނާންނާނެ ކަމަށް ތުރުކީން ބުނެފި އެވެ.
ތުރުކީގެ ދާޚިލީ ވަޒީރު ސުލައިމާން ސުވީލޯ ވިދާޅުވީ މިޖަރީމާގެ ފަހަތުގައިވާ ފަރާތްތައް އަދާލަތުގެ ކުރިމައްޗަށް ގެނަސް އެމީހުންނަށް ދޭންވާ އަދަބުތައް ދޭނެ ކަމުގަ އެވެ. ސުލައިމާން މިހެން ވިދާޅުވީ ރަޝިޔާގެ ސަފީރުގެ ހަށިކޮޅު ބާއްވާފައިވާ އަންކަރާގެ ހޮސްޕިޓަލަށް ވަޑައިގެން އޭނާގެ ހަށިކޮޅު ބައްލަވާލެއްވުމަށް ފަހު ހޮސްޕިޓަލުން ނުކުމެވަޑައިގެން ދެއްވި ބަޔާނެއްގަ އެވެ.
ރަޝިޔާގެ ރައީސް ވްލަޑީމިޔަރ ޕޫޓިންވެސް ވަނީ މިހާދިސާގެ ސަބަބުން ދެގައުމުގެ ގުޅުންތަކަށް ބަދަލުނާންނާނެ ކަމުގެ ޔަގީންކަން ދެއްވާފަ އެވެ. މިހާދިސާގެ ސަބަބުން ޓެރަރިޒަމާ ދެކޮޅަށްކުރާ ހަނގުރާމައިގާ ދެގައުމުގެ އެއްބާރުން އިތުރު ކުރަން ޖެހޭކަން ހާމަވެގެން ދިޔަ ކަމަށް ވެސް ޕޫޓިން ވިދާޅުވި އެވެ.
ރަޝިޔާގެ ސަފީރު
އަންކަރާގައި ހުންނަވާ ރަޝިޔާގެ ސަފީރުގެ ގައިކޮޅަށް ރޭ ބަޑިޖަހައި އަވަހާރަކޮށްލީ ތުރުކީ ފުލުހުންގެ އެންޓިޓެރަރިޒަމް އާ ދެކޮޅަށް މަސައްކަތްކުރާ ބާރުތަކުގައި ހިމެނޭ އުމުރުން 22 އަހަރުގެ މައުލޫދު މާތު އަލްތަން ތާޝް ނަމަކަށްކިޔާ ޒުވާނެކެވެ. ތުރުކީ ފުލުހުން ވަނީ އެޖަރީމާ ހިންގި ވަގުތު މައުލޫދުގެ ގައަށް ބަޑިހައި މަރާލާފަ އެވެ. މައުލޫދު މަރާލީ އޭނާއާއި ތުރުކީ ފުލުހުންނާ ދެމެދު ބަދަލުކުރި ހަމަލާތަކެއްގައި ކަމަށާ އެހަމަލާތައް 15 މިނިއްޓުވަންދެން ދެމިގެންދިޔަކަމަށް ތުރުކީ ފުލުހުންގެ ތަރްޖަމާނަކު ވިދާޅުވި އެވެ. ނަމަވެސް ބައެއް ރިޕޯޓްތައް ވަނީ މައުލޫދު މަރާލީ ހެކިނައްތާލުގެ ބޭނުމުގައި ކަމަށް ބުނެފަ އެވެ.
މިޙާދިސާ އެކި ފަރާތްތަކުން ގެންދަނީ އެކިގޮތަށް ސިފަކޮށް ތަހްލީލްތައް ކުރަމުންނެވެ. މިގޮތުން މައޫދު މަރާލުމަކީ ހެކިނައްތާލުމުގެ ބޭނުމުގައި ތުރުކީ ފުލުހުން ކުރިކަމެއްކަމަށް ބައެއް ފަރާތްތަކުން ސިފަކުރާއިރު އަނެއްބައި ފަރާތްތަކުން ވަނީ މިއީ އައިއެސް ފަދަ ޓެރަރިސްޓް ޖަމާއަތްތަކުގެ ފިކުރު ތުރުކީގެ ސަލާމަތީ ބާރުތަކުގެ ތެރެއަށް ވަދެފައިވާ މިންވަރު ހާމަވެގެންދިޔަ ކަމެއްކަމަށް ސިފަކޮށްފައެވެ. އަދި އަނެއް ބައި ރިޕޯޓްތަކުގައި މިއީ ތުރުކީއާއި ރަޝިޔާގެ ގުޅުންތައް ހަލާކުކޮށްލުމަށް އިސްރާއީލުގެ ޖާސޫސީ އިދާރާ މުސާދް އިން ހިންގި ޖަރީމާއެއްކަމަށް ތުހުމަތުކޮށްފައިވެ އެވެ.
އަންކަރާގައި ހުންނަވާ ރަޝިޔާގެ ސަފީރު އެންޑްރޭ ކާލޯވް އަކީ އާދައިގެ ސަފީރެއް ނޫނެވެ. ސޫރިޔާގެ ހަލަބްގައި ހިނގަމުންދިޔަ ހަނގުރާމަ ނިމުމަކަށް ގެނައުމަށް ޓަކައި ސޫރިޔާގެ އިދިކޮޅު ހަނގުރާމަވެރިންނާއި އާންމުން ހަލަބުން ބޭރުކުރުމަށް ތުރުކީއާއި ރަޝިޔާ އާދެމެދު ހިންގި ޑިޕްލޮމެޓިކް ވަރުގަދަ ޙަރަކާތްތަކުގެ މައި ސޯބަކީ އެންޑްރޭ ކާލޯވް އެވެ.
ހަމަލާއަށް ފަހު ރަޝިޔާގެ ސަފީރު ވެއްޓިފާ
މީގެއިތުރުން ސޫރިޔާގެ އިދިކޮޅު ފަރާތްތަކާއި ސޫރިޔާ ސަރުކާރު އަލުން ސުލްހައިގެ މޭޒުދޮށަށް ގެނައުމަށް ދާދިފަހުން ވެފައިވާ އެއްބަސްވުމުގައި އިސްދައުރެއް އަދާކުރީވެސް ކާލޯވް އެވެ. އޭނާއަކީ ރަޝިޔާގެ އެންމެ ތަޖްރިބާކާރު އަދި އެންމެ މޮޅު ޑިޕްލޮމޭޓުންގެ ތެރޭގައި ހިމެނޭ ޝަޚްސިއްޔަތެކެވެ.
ހަލަބްގައި ހިނގަމުންދިޔަ ހަނގުރާމަ ނިމުމަކަށް ގެނައުމަށް ޓަކައި ރަޝިޔާ އިން ހަލަބްގައިވާ އިދިކޮޅު ޖަމާއަތްތަކުގެ އަމާޒުތަކަށް ދިން ވަރުގަދަ ޙަމަލާތަކާ އެކު އިދިކޮޅު ޖަމާއަތްތައް ވަނީ ބަލިކަށިވެ ހަލަބުން ބޭރުވުމަށް އެއްބަސްވެފަ އެވެ. މިހާ ވަރުގަދަ ޙަމަލާތަކެއް ރަޝިޔާ އިން ދިނީ ހަނގުރާމަވެރިން ހަލަބުން ބޭރުކޮށް ހަލަބްގެ ހަނގުރާމަ ހުއްޓުވާނެ އެހެން ގޮތެއް ނެތުމުންކަމަށް ރަޝިޔާއާއި ސޫރިޔާއިން ބުނެ އެވެ. މިކަމުގައި ވެސް އަންކަރާގައި ހުންނަވާ ރަޝިޔާގެ ސަފީރު ވަނީ މުހިއްމު ދައުރެއް އަދާކުރައްވާފަ އެވެ. ސަފީރު އަވަހާރަކޮށްލި ނަމަވެސް ދެގައުމުގެ ދެމެދުގައިވާ ރަހްމަތްތެރިކަމާއި ގާތްގުޅުންތަކަށް ބަދަލުނާންނާނެކަން ރަޝިޔާއިން ވެސް ވަނީ ހާމަކޮށްފަ އެވެ.
ސޫރިޔާގެ ހަނގުރާމައާ ގުޅިގެން ތުރުކީއަށް ވެސް ދަނީ ބޮޑެތި ގެއްލުންތަކެއް ލިބެމުންނެވެ. މީގެތެރޭގައި ހަރުކަށި ޖަމާއަތްތަކުގެ ޓެރަރިސްޓް ހަމަލާތަކުގެ ޝިކާރައަކަށް ތުރުކީ ވެގެންދިޔުމާއި ސޫރިޔާގެ އެތަށް މިލިޔަން ރެފިއުޖީންނަށް ހިޔާވަހިކަން ދީ އެމީހުން ބަލަހައްޓަން ތުރުކީއަށް މަޖްބޫރުވުން ފަދަ އެތައް ކަމެއް ހިމެނެއެވެ. މިކަންކަމާ ގުޅިގެން، ސޫރިޔާގެ ރައީސް ބައްޝާރުލްއަސަދުގެ ވެރިކަން ވައްޓާލުމާމެދު ތުރުކީ ކުރިން ގެނގުޅުނު ގޮތްދޫނުކުރާ ހަރުކަށި ސިޔާސަތުތަކަށް މިފަހަކަށް އައިސް ވަނީ ބަދަލުތަކެއް އަންނަން ފަށާފަ އެވެ. (ނޫސްއެޖެންސީތައް)