20 Dec 2016, 12:11
މޯލްޑިވްސް ޕޮލިސް ސާވިސްގެ އިންފޮމޭޝަން އޮފިސަރުގެ މަގާމަށާއި ސްޕޯކްސް ޕާސަންގެ މަގާމަށް ބޭފުޅުން ހަމަޖައްސައިފި އެވެ.
އެގޮތުން އެ ސާވިސްގެ އިންފޮމޭޝަން އޮފިސަރުގެ މަގާމަށް ހަމަޖައްސާފައި ވަނީ ޗީފް ސްޕްރިންޓެންޑެންޓް އޮފް ޕޮލިސް އަހްމަދު ޝުހާދުއެވެ. އަދި ސްޕޯކްސް ޕާސަންގެ މަގާމަށް ހަމަޖައްސާފައި ވަނީ ސްޕްރިންޓެންޑެންޓް އޮފް ޕޮލިސް އަހްމަދު އާތިފްއެވެ.
މި މަހުގެ 18 ވަނަ ދުވަހުން ފެށިގެން މި ދެ މަގާމަށް ބޭފުޅުން އައްޔަންކޮށްފައިވަނީ މިހާރު އެބޭފުޅުން މޯލްޑިވްސް ޕޮލިސް ސާވިސްގައި އަދާކުރަމުންދާ މަސްއޫލިއްޔަތުގެ އިތުރުންނެވެ.
އިންފޮމޭޝަން އޮފިސަރު ކަމަށް ހަމަޖެއްސެވި އެސްޕީ އަހްމަދު ޝުހާދު މިހާރު ހުންނަވަނީ ކޮމިޝަނާސް ޑައިރެކްޓްރޭޓްގެ ޑެޕިއުޓީ ހެޑްގެ މަގާމުގައެވެ. އަދި ސްޕޯކްސް ޕާސަންގެ މަގާމަށް ހަމަޖެއްސެވި އެސްޕީ އަހްމަދު އާތިފް ހުންނަވަނީ އިންފޮމޭޝަން އެންޑް ކޮމިއުނިކޭޝަން ޑައިރެކްޓްރޭޓްގެ ޑެޕިއުޓީ ހެޑްގެ މަގާމުގައެވެ.
ފުލުހުން ބުނީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ޕޮލިސް ސާވިސް އިން ބޭނުންވާ މައުލޫމާތު ހޯދަން އަހްމަދު ޝުހާދު އަށް އެޑްރެސްކޮށް ލިޔުމުން ހުށަހެޅުމުން މައުލޫމާތު ލިބޭނެ އިންތިޒާމް ހަމަޖެހިފައިވާ ކަމަށެވެ.
އަދި އީމެއިލް މެދުވެރިކޮށް މައުލޫމާތު ހޯދުމުގެ އިންތިޒާމު ވެސް ވަނީ ހަމަޖެހިފައެވެ.