21 Dec 2016, 08:47
މީހުން މަރާފައި ވާނެ ކަމަށް ފިލިޕީންސްގެ ރައީސް ރޮޑްރިގޯ ޑުޓާޓޭ އިއުތިރާފުވެވަޑައިގެންފައި ވާތީ، އެ މައްސަލަ ބެލުމަށް އދ.ގެ ހިއުމަން ރައިޓްސް ހައިކޮމިޝަނަރު ޒައިދު ބިން ރާޢަދު އަލް ހުސައިން ގޮވާލައްވައިފި އެވެ.
ފިލިޕީންސުގެ ދަވާއޯގެ މޭޔަރުކަމުގައި ހުންނެވި އިރު ކުށް ކުރި ކަމުގެ ތުހުމަތު ކުރެވޭ މީހުން އަމިއްލަ އަށް މެރި ކަމަށް އިއުތިރާފުވެވަޑައިގަތީ މިދިޔަ ހަފްތާގެ ތެރޭގަ އެވެ.
ވިހި އަހަރުވަންދެން ދަވާއޯގެ މޭޔަރުކަން ކުރެއްވި ޑުޓާޓޭ އެފަދައިން ވިދާޅުވީ ރަސްމީ ދަތުރުފުޅެއްގައި ގައުމުން ބޭރަށް ވަޑައިގަތުމުގެ ކުރިން ވިޔަފާރަވެރިންނާ ވާހަކަފުޅު ދައްކަވަމުންނެވެ.
ޑުޓާޓޭ ވިދާޅުވި ގޮތުގައި އޭނާ އަށް މަރާލެވޭނެ، ކުށްވެރިން ކަމަށް ތުހުމަތު ކުރެވޭ މީހުން ހޯދުމަށް ޓަކައި އޭނާ ރޭގަނޑު ސައިކަލަކުން ދަވާއޯ ވަށާ ދުއްވަ އެވެ. އޭގެ ބޭނުމަކީ ފުލުހުންނަށް ބާރުގެ ބޭނުން ކުރުމުގެ ހުއްދަ އޮތްކަން ދެއްކުން ކަމަށް ޑުޓާޓޭ ވިދާޅުވި އެވެ.
މި މައްސަލައާ ގުޅިގެން އދ.ގެ ހިއުމަން ރައިޓްސް ހައިކޮމިޝަނަރު ޒައިދު ބިން ރާޢަދު ވިދާޅުވީ، ފިލިޕީންސްގެ ޖުޑީޝަރީއިން މި މައްސަލައިގެ މިނިވަން ތަހުގީގެއް ކުރަން ޖެހޭ ކަމަށެވެ.
"މީހުން މެރިކަމަށް ފާޅުކަން ބޮޑު ގޮތެއްގައި މީހަކު އިއުތިރާފުވެފައިވާ އިރު، އެކަމަށް މިނިވަން ތަހުގީގެއް ކޮށް، ޝަރީއަތް ހިންގަން ޖެހޭ. އެކަން ނުކުރުމަކީ ޖުޑީޝަރީގެ ނިޒާމު ރަނގަޅަށް މަސައްކަތް ނުކުރުން،" ޒައިދު ވިދާޅުވި އެވެ.
މީގެ އިތުރުން، ރައީސް ޑުޓާޓޭގެ ސަރުކާރު ވެރިކަމަށް އައި ފަހުން، މަސްތުވާތަކެއްޗާ ދެކޮޅަށް ފިލިޕީންސްގައި ފެށި މަސައްކަތުގައި، ފުލުހުން ދަނީ ޑްރަގާ ގުޅުން ހުރި ކަމަށް ބެލެވޭ ކޮންމެ މީހެއްގެ ގަޔަށް ބަޑިޖަހައި މަރާލަމުންނެވެ. އެގޮތުގެ މަތިން، މިއަހަރުގެ ޖޫން މަހުން ފެށިގެން މިހާތަނަށް 6،000 އަށް ވުރެ ގިނަ މީހުން ފިލިޕީންސްގައި މަރާލާފައިވެ އެވެ.
އދ.ގެ ހިއުމަން ރައިޓްސް ހައިކޮމިޝަނަރު ޒައިދު ވިދާޅުވީ، އެ މައްސަލައަކީ ވެސް ފިލިޕީންސްގެ ޖުޑީޝަރީން ބަލަން ޖެހޭ ބޮޑު މައްސަލައެއް ކަމަށެވެ.