07 Jan 2017, 16:37
ވިޔަފާރި ފައިދާއިން ނަގާ އިންޓަރިމް ޓެކްސް ނުވަތަ އަހަރުގެ މެދުތެރެއިން ނަގާ ޓެކްސް އުވާލުމަށް ހައިކޯޓަށް މައްސަލައެއް ހުށަހަޅައިފިއެވެ.
އެމްޑީޕީގެ ޕޮލިސީ ކޮމެޓީގެ މުގައްރިރު އަދި އެ ޕާޓީގެ ގައުމީ މަޖިލީހުގެ މެމްބަރު ހުސައިން އަމްރޫ މުހައްމަދު ރަޝާދު ހުށަހެޅުއްވި މައްސަލާގައި އެދިފައި ވަނީ ވިޔަފާރި ފައިދާއިން ޓެކްސް ނެގުމުގެ ގާނޫނުގެ 23 ވަނަ މާއްދާ އުވާލުމަށެވެ.
ހައިކޯޓަށް އަމްރު ހުށަހެޅުއްވި މައްސަލައިގައި ބުނެފައި ވަނީ އިންޓަރިމް ޓެކުހަކީ ނުކުރާ ވިޔަފާރިއެއްގެ، ނުލިބޭ ފައިދާއަކުން ނެގޭ ޓެކުހެއް ކަމަށާއި އިސްލާމީ ހަމަތަކުގެ މަތިން އެއީ ހުއްދަކަމެއް ކަމަށް ގަބޫލު ނުކުރެވޭ ކަމަށެވެ.
"އިސްލާމްދީނާއި ތައާރަޒްވާ އެއްވެސް ކަމެއް ގާނޫނު އަސާސީގެ ދަށުން ހުއްދަ ނުކުރެވޭނެތީ އާއި މިއީ ބުއްދީގެ ހަމަތަކުގެމަތިން ބަލާނަމަވެސް ނެގިގެންވާނެ ޓެކުހެއް ކަމަށް ނުބެލެވޭތީ މި މާއްދާ އުވާލަން ހުށަހަޅަމެވެ،" އަމްރު ހުށަހެޅުއްވި މައްސަލާގައި ވެއެވެ.
އެ މާއްދާ އަކީ ވިޔަފާރިކުރާ ފަރާތްތަކަށް ނުހަނު ބޮޑެތި ގެއްލުންތަކަކާ ކުރިމަތިކުރުވާ މާއްދާއެއް ކަމަށް ވެސް އެ ދައުވާގައިވެއެވެ.
އެ މައްސަލައާ ގުޅޭގޮތުން އަމްރު މިއަދު ސަން އަށް ވިދާޅުވީ އެ މާއްދާ އޮންނަގޮތުން ވިޔަފާރިއަށް ގެއްލުން ވިޔަސް ޓެކްސް ދައްކަންޖެހޭ ކަމަށާއި އަދި ގެއްލުންވެގެން އެ ފައިސާ އަނބުރާ ނުލިބޭ ކަމަށެވެ.