09 Jan 2017, 14:24
ސްޕެނިޝް ލީގުގައި ރޭ ވިޔަރެއާލް އަތް ދަށުވާން ދަނިކޮށް ފަހު ވަގުތު ލިއޮނަލް މެސީ ކާމިޔާބުކޮށްދިން ގޯލުން 1-1ގެ ނަތީޖާ އަކުން އެއްވަރު ބާސެލޯނާ ތާވަލުގެ ތިން ވަނައަށް ވެއްޓިއްޖެ އެވެ.
ރޭގެ ނަތީޖާއާ އެކު ބާސެލޯނާ ތިން ވަނާގައި އޮތީ ކުޅުނު 17 މެޗުން 35 ޕޮއިންޓް ލިބިގެންނެވެ. ހަމަ އެ އަދަދަށް މެޗު ކުޅެ ސެވިއްޔާ ދެ ވަނާގައި އޮތީ 36 ޕޮއިންޓާ އެކުއެވެ. އެއް ވަނާގައި ރެއާލް މެޑްރިޑް އޮތީ ކުޅުނު 16 މެޗުން 40 ޕޮއިންޓް ލިބިގެންނެވެ.
ރަށުން ބޭރުގައި ރޭ ބާސެލޯނާއިން ކުޅުނު މެޗުގެ ފުރަތަމަ ހާފުގައި އެ ޓީމުގެ ފަރާތުން އާދައިގެ ކުޅުމެއް ފެނިގެންދިޔައިރު ދެވަނަ ހާފު ފެށިގެން ހަތަރު ވަނަ މިނެޓުގައި ވިޔަރެއާލުން ވަނީ ލީޑު ނަގާފައެވެ. ވިޔަރެއާލަށް ލީޑު ނަގައިދިން ގޯލު ނިކޮލަ ސަންސޯނޭ ކާމިޔާބްކުރީ އެލެކްސެންޑާ ފަޓޯ ތަނަވަސްކޮށްދިން ބޯޅަ އަކުންނެވެ.
ރޭ ވިޔަރެއާލް އާއި ބާސެލޯނާ ކުޅުނު މެޗުގެ ތެރެއިން --- ފޮޓޯ: އޭޕީ
ވިޔަރެއާލް ލީޑުގައި އޮވެ މެޗު ނިމެންދަނިކޮށް ބާސެލޯނާ ސަލާމަތްކޮށްދިން ގޯލު 90 ވަަނަ މިނެޓުގައި މެސީ ކާމިޔާބުކޮށްދިނީ އެޓީމަށް ލިބުނު ހިލޭ ޖެހުމެއްގަ އެވެ. ރޭގެ މެޗުގެ ކުރިން އެންމެފަހުން ބާސާ ކުޅުނު މެޗުގައި ވެސް ވަނީ ހިލޭ ޖެހުމަކުން ގޯލެއް ކާމިޔާބުކޮށްދީފަ އެވެ.
މެޗަށްފަހު ވާހަކަ ދައްކަމުން ބާސެލޯނާގެ ކޯޗު ލުއިސް އެންރިކޭ ބުނީ ފުރަތަމަ ހާފާ ހިލާފަށް ދެ ވަނަ ހާފުގައި އެ ޓީމުގެ ކުޅުން ރަނގަޅު ވެގެންދިޔަ ކަމަށާއި ނަމަވެސް ޓީމެއްގެ ގޮތުގައި ބިނާކުރަނިވި ކުޅުމެއް ފެނިގެން ނުދިޔަ ކަމަށެވެ.
"ޓީމެއްގެ ގޮތުގައި ރަނގަޅު ކުޅުމެއް ނުފެނުނު ނަމަވެސް ވަކިވަކި ކުޅުންތެރިން ވަނީ ރަނގަޅު ޕާފޯމެންސްއެއް ދައްކާފައި. އެގޮތުން ތިން ޕޮއިންޓް ހައްގުވާވަރުގެ ކުޅުމެއް ފެނިގެން ދިޔަ،" އެންރިކޭ ބުންޏެވެ.