16 Jan 2017, 11:15
ހޮންގްކޮންގްއިން ފުރައިގެން ތުރުކީގެ އިސްތަންބޫލްތަށް ދަތުރުކުރަމުން ދިޔަ، ޓާކިޝް އެއާލައިންސްގެ ކާގޯ މަތިންދާބޯޓެއް ކިރްގިސްތާނަށް ވެއްޓުނު ހާދިސާގައި މަރުވި މީހުންގެ އަދަދު 32 އަށް އަރައިފި އެވެ.
ތުރުކީގެ ގައުމީ އެއާލައިނުގެ ބޮއިންގް 747 މަރުކާގެ މަތިންދާބޯޓު ވެއްޓުނީ، އިސްތަންބޫލަށް ދިއުމުގެ ކުރިން، ކިރްގިސްތާނުގެ މައި އެއާޕޯޓު، މަނަސް އިންޓަނޭޝަނަލް އެއާޕޯޓަށް ޖައްސަން އުޅުމުގެ ތެރޭގަ އެވެ.
އެ ބޯޓު ވެއްޓުނީ މަނަސް އެއާޕޯޓުގެ ގާތްގަނޑަކަށް ދެ ކިލޯމީޓަރު ދުރުގައި، މަނަސް އަވަށުގައި މީހުން ދިރިއުޅޭ ސަރަހައްދަކަށެވެ. އެ ހާދިސާއާ ގުޅިގެން، މީހުން ދިރިއުޅޭ 32 އިމާރާތެއް ހަލާކުވެ، 32 މީހަކު މަރުވިކަމަށް ކިރްގިސްތާނުގެ ސަރުކާރުން ބުނެ އެވެ. އޭގެ ތެރޭގައި ގިނަ އަދަދެއްގެ ކުޑަކުދިން ހިމެނެ އެވެ.
ވިލާތާއި ދުނިޔޭގެ އުތުރުގެ ގައުމުތަކަށް ފިނި މޫސުމުގެ އަސަރު މިދުވަސްވަރު ވަރަށް ބޮޑަށް ކުރަމުންދާ އިރު، ޓާކިޝް އެއާލައިނުގެ ފްލައިޓު ކިރްގިސްތާނަށް ޖައްސަން މަސައްކަތް ކުރި ވަގުތު ބޯ ދުންފިނީގެ ސަބަބުން ވިޒިބިލިޓީ އޮތީ ވަރަށް ދަށްވެފަ އެވެ. އެހެން ނަމަވެސް، ފްލައިޓު ވެއްޓުމަށް މެދުވެރިވި ސަބަބަކީ އެއީ ކަމެއް ކަށަވަރެއް ނޫނެވެ.
މައުލޫމާތު ލިބޭ ގޮތުގައި، ވެއްޓުނު ފްލައިޓުގައި ހުރި އެއް ކްރޫ މެމްބަރަކު ވަނީ އެ ހާދިސާގައި ސަލާމަތްވެފަ އެވެ. ނަމަވެސް ބޯޓުގެ ޕައިލެޓާ އެކު އިތުރު ތިން ކްރޫއިން މަރުވެފައިވާ ކަމަށް ކިރްގިސްތާނުގެ ކަމާ ބެހޭ ފަރާތްތަކުން ބުނެ އެވެ.
އެ ހާދިސާއާ ގުޅިގެން، މަނަސް އިންޓަނޭޝަނަލް އެއާޕޯޓު ވަނީ ބަންދުކޮށްފަ އެވެ.