24 Jan 2017, 12:29
ސައުދީ ސަރުކާރުގެ ވިޔަފާރީގެ ބޮޑު މަޝްރޫއެއް ފ. އަތޮޅުގައި ހިންގަން ޝައުގުވެރިކަން ފާޅުކޮށްފައިވާ ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ފ. މަގޫދޫ ބަނދަރު ހުޅުވުމަށް އެ ރަށުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ޔާމީން މިއަދު ވިދާޅުވީ ފ. އަތޮޅަކީ ސައުދީ ސަރުކާރުގައި އިސްކޮށް ތިއްބެވި ބޭފުޅުން ވަރަށް ހާއްސަ ޝައުގުވެރިކަމެއް އޮތް އަތޮޅެއް ކަމަށެވެ.
ސައުދީ ސަރުކާރުން ފ. އަތޮޅުގައި ފަށާ ބޮޑު މަޝްރޫއަށް ބޭނުންވާ ހުރިހާ ކުރެއްހުންތަކެއް ވެސް މިހާރު ނިންމާފައިވާ ކަމަށް ރައީސް ޔާމީން ވިދާޅުވި އެވެ. އަދި މަޝްރޫއުގެ ސަބަބުން "އަތަކެއް ސަތޭކަ ވަޒީފާ އުފެދިގެން ގޮސް" މުޅި އަތޮޅަކީ ރާއްޖޭގެ އެންމެ ތަނަވަސް އަތޮޅަށް ވުމުގެ ފުރުސަތު އެބައޮތް ކަމަށް ރައީސް ވިދާޅުވި އެވެ.
"އަޅުގަނޑުމެން މިދިޔަ އަހަރު ވެސް އިންތިޒާރު ކުރަމުން ގެންދިޔައިން އެ ބޮޑު ބިޔަ މަޝްރޫއު މި އަތޮޅުގައި ފެށޭތޯ. އަދި މިއަހަރު ވެސް އަޅުގަނޑުމެން އިންތިޒާރު ކުރަމުން މިދަނީ އެ ބޮޑު ބިޔަ މަޝްރޫއަށް" ރައީސް ޔާމީން ވިދާޅުވި އެވެ.
އިންޑިއާގެ ޕޫނީގައި ގާއިމް ކުރާ، ޕްރައިޑް ވޯލްޑް ސިޓީގެ މަންޒަރެއް: ފ. އަތޮޅުގައި ހިންގަނީ މިފަދަ ބޮޑު މަޝްރޫއެއް ---
އެއީ ދިވެހި ސަރުކާރުން އަމިއްލަޔަށް ހަރަދުކޮށްގެން ހިންގޭނެ ވަރުގެ މަޝްރޫއެއް ނޫންކަން ފާހަގަކުރައްވައި ރައީސް ޔާމީން ވިދާޅުވީ ދުނިޔޭގެ އެކި ހިސާބުތަކުން ވިޔަފާރިވެރިންނާއި ދަތުރުފަތުރު ކުރާ މީހުން އޭގެ ބޭނުން ހިފޭނެ ބޮޑު މަޝްރޫއަކަށް އެ މަޝްރޫއު ވެގެންދާނެ ކަމަށެވެ.
އެކަހަލަ މަޝްރޫއެއް މިހާތަނަށް ހެދިފައި ވަނީ ދުނިޔޭގެ ވެސް ތިނެއް ނުވަތަ ހަތަރު ދިމާލެއްގައިކަން ރައީސް ފާހަގަކުރެއްވި އެވެ. އެ ތަނަކީ އެކި ވައްތަރުގެ ސިނާއަތްތައް ގާއިމް ކުރެވިގެންދާނެ "ޓައުން ޝިޕެއް"ގެ ގޮތުގައި ރައީސް ޔާމީން ވަނީ ސިފަ ކުރައްވައިފަ އެވެ.
"އަޅުގަނޑުމެން މާތް ﷲ ހަޒުރަތުގައި ދުއާ ދަންނަވަނީ މި މަޝްރޫއުގެ ސަބަބުން މީގެ ކުރިން ނުދެކޭ ފަދަ ބޮޑު ތަރައްގީ ފ. އަތޮޅަށް ލިބިގެން ދިޔުން،" ރައީސް ޔާމީން ވިދާޅުވި އެވެ.
މީގެ ކުރިން ވެސް އެ މަޝްރޫއު މަޑުޖެހިފައި އޮތީ ރާއްޖޭގައި ސިޔާސީ މަޝްރަހު ހުރި ގޮތުން ކަމަށް ރައީސް ވިދާޅުވި އެވެ. ސައުދީ ސަރުކާރާ ހަވާލާދީ ރައީސް ޔާމީން ވިދާޅުވީ "ރާއްޖޭގެ ސިޔާސީ މަޝްރަހު އޮތް ގޮތުން މަޑުޖައްސާލައިގެން ތިބީ" ކަމަށެވެ.
ސައުދީ ސަރުކާރުން އެ މަޝްރޫއު މަޑުޖައްސާލީ ރާއްޖެއާ ބެހޭ ގޮތުން ދެކެވެމުންދާ ވާހަކަތަކާއި ރާއްޖޭގައި ސިޔާސީ މަޝްރަހު އޮތްގޮތުން ކަން ފާހަގަކޮށް ރައީސް ޔާމީން ވިދާޅުވީ ރާއްޖެ އަށް ހެޔޮ ގޮތްތައް ހޯދާން ތިބީ ވެސް ހަމަ ރައްޔިތުން ކަމަށެވެ.