24 Jan 2017, 12:10
މާރާމާރީ ހިންގި މީހަކު 200 ރުފިޔާ އިން ޖޫރިމަނާކޮށްފި އެވެ.
މާރާމާރީ ހިންގުމުގެ ކުށް ސާބިތުވެ ކްރިމިނަލް ކޯޓުން އިއްޔެ ޖޫރިމަނާ ކުރީ ހއ. ބާރަށް، އަސްރުމާގެ، ފަތުހުﷲ އަލީ އެވެ.
އޭނާގެ މައްޗަށް ދައުލަތުން އެ ދައުވާ އުފުލީ ހއ. ބާރަށް އިނގުރުމާވިލާ އަބްދުލް ޣަފޫރު އަލީ ބިންމައްޗަށް ވައްޓައި އޭނާއާ މެދު މާރާމާރީ ހިންގާފައިވާ މައްސަލައާ ގުޅިގެންނެވެ.
ކްރިމިނަލް ކޯޓުގެ ހުކުމްގައި ބުނެފައި ވަނީ އެ ދައުވާ އަށް ޝަރީއަތުގެ މަޖިލީހުގައި ފަތުހުﷲ އިއުތިރާފުވެފައިވާ ކަމަށެވެ.
އޭނާ ދައްކަން ޖެހޭ ޖޫރިމަނާގެ ފައިސާ ހަތް ދުވަހުގެ ތެރޭގައި ކްރިމިނަލް ކޯޓަށް ދައްކައި ޚަލާސްކުރުމަށް ވެސް އެ ހުކުމްގައި އޭނާ އަށް ވަނީ އަންގައިފަ އެވެ.