29 Jan 2017, 10:23
ހޮނިހިރު ދުވަހުގެ ރޭ ބްރެންޓްފޯޑް އާ ދެކޮޅަށް ޗެލްސީ ކުޅުނު މެޗަކީ، އެޓީމުގެ ސާބިއާ ޑިފެންޑަރު ބްރަނިސްލަވް އިވަނޯވިޗް ޗެލްސީން ފެނިގެންދާނޭ ފަހު މެޗުކަން ނުވަތަ ނޫންކަން ބުނަން އަދި ނޭނގޭކަމަށް ހެޑްކޯޗް އެންޓޯނިއޯ ކޮންޓޭ ބުނެފިއެވެ.
އިނގިރޭސި އެފްއޭ ކަޕްގެ ހަތަރު ވަނަ ބުރުގައި، ބްރެންޓްފޯޑްގެ މައްޗަށް 4-0 ލަނޑުން ޗެލްސީ ކުރި ހޯދައި ފަސް ވަނަ ބުރުން ޖާގަ ހޯދި މެޗުގައި އިވަނޮވިޗް ވަނީ ޗެލްސީއަށް ލަނޑެއް ކާމިޔާބުކޮށްދީފައެވެ. މިއީ އޭނާ އެޓީމަށް ކާމިޔާބުކޮށްދިން 34 ވަނަ ލަނޑެވެ. އަދި ވޭތުވެ ދިޔަ ނުވަ ވަރަކަށް އަހަރު ތެރޭ އޭނާ އެޓީމަށް ކުޅުނު 377 ވަނަ މެޗެވެ.
އިވަނޯވިޗަށް އަންނަ މަހު 33 އަހަރު ފުރޭއިރު، ޗެލްސީއާ އެކު އޭނާ ހަދާފައިވާ ކޮންޓްރެކްޓް މި ސީޒަންގެ ނިޔަލަށް ހަމަވާނެއެވެ. އެހެން ނަމަވެސް އޭނާގެ މުސްތަގުބަލާ މެދު ޗެލްސީން ވަކިގޮތެއް އަދި ނިންމާފައި ނުވާއިރު، ކޮންޓޭގެ އިރުޝާދުގެ ދަށުން ޕްރިމިއާ ލީގުގައި މެޗެއް ކުޅުމުގެ ފުރުސަތު އިވަނޯވިޗަށް އެންމެ ފަހުން ލިބިފައި ވަނީ މިދިޔަ އަހަރުގެ ސެޕްޓެމްބަރު މަހުއެވެ.
"ކުރިން ހުރިހާ މެޗެއްގައި ކުޅެމުން އައި ކުޅުންތެރިއަކަށް، ގަވައިދުން ކުޅުމުގެ ފުރުސަތު ގެއްލުމަކީ އެ ކުޅުންތެރިއަކަށް ވަރަށް ބޮޑު ގޮންޖެހުމަކަށް ވާނެ،" ކޮންޓޭ ބުންޏެވެ.
"އިވާންއަށް އެނގޭނެ ހާލަތު ވަރަށް ރަނގަޅަށް، އަދި އޭނަ ކްލަބުގައި މަޑުކޮށްފި ނަމަ އަހަރެން ވަރަށް އުފާވާނެ. އެހެން ނަމަވެސް މި ހާލަތުގައި ކޮންމެ ކުޅުންތެރިއަކުވެސް ޖެހޭނީ އޭނާއަށާއި އޭނާގެ އާއިލާއަށް އެންމެ ރަނގަޅު ނިންމުމެއް ނިންމަން."
އިވަނޯވިޗަކީ ޗެލްސީގެ ލެޖެންޑެއް ކަމަށާއި އޭނާ އެ ކްލަބަށް ކޮށްދީފައިވަނީ އަގުހުރި ޚިދުމަތްތަކެއްކަން ކޮންޓޭ ފާހަގަކުރިއެވެ.
"ޗެލްސީގައި އިވާން ވަނީ ފުރިހަމަ ގަދަރާއި އިހްތިރާމް ހައްގު ދުވަސްތަކެއް ހޭދަކޮށްފައި. ގިނަ މެޗުތަކެއް ކުޅެ ޓީމާއެކު ގިނަ ކާމިޔާބީތަކެއް ހޯދާފައި ވަނީ،"
"އަހަރެން ގަބޫލުކުރާ ގޮތުގައި އޭނާގެ ކޮންމެ ނިންމުމަކަށް އަހަރެމެން އިހްތިރާމްކުރަން ޖެހޭ."
މިފަހަރުގެ ޓްރާންފާގައި އިވަނޮވިޗް، ރަޝިއާގެ ޒެނިތަށް ބަދަލުވާން އުޅޭކަމުގެ އަޑުތަކެއް ފެތުރިފައިވާއިރު، އޭނާ ޗެލްސީގައި މަޑުކުރާނޭކަމުގެ އެއްވެސް އިޝާރާތެއް ކޮށްފައި ވޭތޯ ކުރި ސުވާލަށް ކޮންޓޭ ޖަވާބެއް ނުދެއެވެ.
"އަހަރެން ބޭނުމެއް ނުވޭ ކުޅުންތެރީންނާ އަހަންނާ ދެމެދު އޮންނަ ގުޅުމާ ބެހޭގޮތުން ވާހަކަދައްކާކަށް. އަހަރެމެންގެ ދެމެދުގައި ދެކެވޭ ވާހަކަތައް ސިއްރު ނުކުރިއަސް އަމިއްލަ ކަމެއްގެ ގޮތުގައި ބާއްވަން އަހަރެން ބޭނުންވަނީ،" އިވާނޮވިޗާ ގުޅޭގޮތުން ސުވާލުކުރުމުން ކޮންޓޭ ޖަވާބުދިނެވެ.
ޖެނުއަރީ ޓްރާންފާ ނިމެން ތިން ދުވަހަށް ވެފައިވާ އިރު، އިވަނޯވިޗްގެ އިތުރުން ތިބައުޓް ކޯޓުވާ ނެތް ހާލަތެއްގައި ޗެލްސީގެ ގޯލް ބެލެހެއްޓުމާ ހަވާލުވެހުރި އަސްމީރު ބެގޮވިޗްގެ މުސްތަގުބަލާމެދުވެސް ކްލަބުން އަދި ގޮތެއް ނުނިންމައެވެ.
ބްރެންޓްފޯޑް މެޗުގައި ބެގޮވިޗްގެ ފަރާތުން ރަނގަޅު ކުޅުމެއް ފެނިގެން ދިޔައެވެ. އެހެން ނަމަވެސް އޭނާގެ ބަދަލުގައި އެހެން ގޯލްކީޕަރަކު ކޮންޓޭއަށް ހޯދިއްޖެ ނަމަ، ބޯންމައުތަށް ބަދަލުވުމުގެ ފުރުސަތު ބެގޮވިޗަށް ލިބޭނެއެވެ.
ކޮންޓޭ ބުނީ "މި ޓްރާންފާ ވިންޑޯ ބަންދުވާން އަދި ތިން ދުވަސް އެބައޮތް. އަހަރެމެން އެބަ ބަލަން ވަރަށް ގިނަ ކަންތައްތަކަށް،" އެހެންނަމަވެސް ބެގޮވިޗްގެ ބަދަލުގައި ކުޅުންތެރިއަކު އަދި ނުފެންނަ ކަމަށެވެ.