11 Feb 2017, 14:36
ޖަލު ތެރޭގައި ނަފްސާނީ ގޮތުން ބޮޑެތި އަނިޔާތައް ލިބޭ ގައިދީންތަކެއް އެބަތިބި ކަމަށާއި އެކަންކަން ރަނގަޅު ކުރުމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފު ގޮވާލައްވައިފި އެވެ.
މާފުށީ ޖަލުގައި ދެ ހުކުމެއް ތަންފީޒު ކުރަމުންދާ މަހުލޫފު މިއަދު ނެރުއްވި ބަޔާނެއްގައި ބުނީ ގައިދީންނާ މެދު އަމަލުކުރާ އުސޫލުތަކުގެ ސަބަބުން، ސިކުނޑި ގޯސްވެފައި ތިބި ގައިދީން މިވަގުތު މާފުށި ޖަލުގައި އެބަތި ކަމަށެވެ. އަދި ބަލިވެގެން ޑޮކްޓަރަށް ދައްކާ ބައެއް ގައިދީންނަށް، ޑޮކްޓަރު ލިޔެދޭ ބޭސް ނުލިބޭ ކަމަށް ވެސް އޭނާ ތުހުމަތު ކުރެއްވި އެވެ.
ޖަލުގައި ފަސް މީހަކު މަރުވި މައްސަލަ އަށް ވެސް އޭނާ ވަނީ ސުވާލުއުފައްދައިފަ އެވެ.
ޖަލުގައި އިންސާނީ ކަރާމާތްތައް ގެއްލޭ ގޮތަށް ކަންކަނ ހިނގާ ކަމަށާއި އަދި ހިއުމަން ރައިޓްސް ކޮމިޝަނުންނާއި ނޭޝަނަލް އިންޓެގްރިޓީ ކޮމިޝަނުން އެކަންކަމަށް ސަމާލުކަން ނުދޭ ކަމަށް އޭނާ ތުހުމަތު ކުރެއްވި އެވެ.
ގައިދީންނަށް ކާންދޭ ކެއުމާ ބެހޭ ގޮތުން ވެސް އޭނާ ވަނީ ކަންބޮޑުވުން ފާޅުކޮށްފަ އެވެ.
"ގައިދީންނަށް ކާންދޭ ރިހައަކީ ގަރުދިޔަ ހާ ސާފުކޮށް "ދެފުށް ފެންނަގޮތަށް" ކައްކާފައި ހުންނަ ރިހައެއް" މަހުލޫފުގެ ބަޔާނުގައި ވިދާޅުވި އެވެ.
ކުރީގެ ނައިބު ރައީސް އަހުމަދު އަދީބު ބާއްވާފައި އޮންނަވަނީ ކޮންކްރީޓް "ހޮހޮޅައެއްގައި ދުވާލު ހަތަރުދަމު އިރަށް ދޮންވާގޮތަށް" ކަމަށް ވެސް އޭނާ ވިދާޅުވި އެވެ.
އަދި ކުރީގެ ޕީޖީ މުހުތާޒު މުހުސިނާއި މަރަށް ހުކުމްކޮށްފައި ތިބި އެނޫން ގައިދީން ވެސް އެ ހާލުގައި ތިބިކަން މަހުލޫފު ވަނީ ފާހަގަކޮށްފަ އެވެ.
"އަޅުގަނޑަކީ ކުރިން، ނާއިބް ރައީސް އަހްމަދު އަދީބްއާ ކިތަންމެ ހިޔާލު ތަފާތުކޮށް ހުރި މީހެއްކަމުގައިވީ ނަމަވެސް އޭނާއާއި އަދި ކުރިން ފާހަގަކުރެވުނު ފަރާތްތަކާމެދު އަމަލުކުރަމުން ގެންދާ ގޮތުން އަޅުގަނޑު އިންތިހާއަށް ކަންބޮޑުވޭ،" މަހުލޫފުގެ ބަޔާނުގައި ބުނެފައިވެ އެވެ.
ކަރެކްޝަންސް ސަވިސްގެ ފަރާތުން ޖަލުތަކުގައި ތިބޭ އޮފިސަރުންނާއި މުވައްޒަފުން ޖުމުލަގޮތެއްގައި ރަނގަޅުކަން ފާހަގަކޮށް މަހުލޫފު ވިދާޅުވީ ވެރިންގެ އިހުމާލުން މުޅި މުއައްސަސާ ބަދުނާމުވާ ކަމަށެވެ.
މަހުލޫފުގެ ވާހަކަތަކާ ގުޅިގެން ކަރެެކްޝަނުގެ ބަހެއް ހޯދަން ކަރެކްޝަންސްގެ ސީނިއާ ޕްރިޒަން އޮފިސަރު އަހުމަދު ލުގުމާނަށް ތަކުރާރުކޮށް ގުޅުމުންވެސް ފޯނަށް ޖަވާބު ނުދެއްވާތީ އެފަރާތުގެ ބަހެއް ވަނީ ލިބޭގޮތް ނުވެފަ އެވެ.