12 Feb 2017, 10:22
އިނގިރޭސި ޕްރިމިއާ ލީގްގައި ރޭ އާސެނަލް އާއި ޔުނައިޓެޑް ކުޅުނު މެޗުތަކުން އެޓީމްތަށް މޮޅުވިއިރު ތާވަލުގަ ދެ ވަނާގައި އޮތް ޓޮޓެންހަމް ވަނީ 2-0ގެ ނަތީޖާ އަކުން ލިވަޕޫލް އަތް ދަށުވެ، ލީގު ތާވަލުގެ އެއް ވަނައިގައި އޮތް ޗެލްސީއާ ދެމެދު އޮތް ފަރަގު ކުޑަކުރަން ލިބުނު ފުރުސަތު ނަގާލާފައެވެ.
އާސެނަލް 2-0ގެ ނަތީޖާ އަކުން ހަލް ސިޓީ އަތުން މޮޅުވިއިރު މެންޗަސްޓާ ޔުނައިޓެޑް، ވެޓް ފޯޑް އަތުން ވެސް މޮޅުވީ 2-0ގެ ނަތީޖާ އަކުންނެވެ.
ރޭގެ މެޗު ކާމިޔާބުކޮށް ޓޮޓެންހަމަށް، އެއްވަނައިގައި އޮތް ޗެލްސީއާ ހަ ޕޮއިންޓާ ގާތަށް ޖެހިލަން ލިބުނު ފުރުސަތު އެޓީމުން ވަނީ ގެއްލުވާލާފައެވެ. ޗެލްސީ އެއްވަނައިގައި 59 ޕޮއިންޓާ އެކު އޮތް އިރު ދެވަނައިގައި އޮތް ޓޮޓެންހަމަށް ލިބެނީ 50 ޕޮއިންޓެވެ.
ލިވަޕޫލް އާއި ޓޮޓެންހަމް ރޭ ކުޅުނު މެޗުގެ ތެރެއިން ލިވަޕޫލްގެ ދެ ގޯލު ކާމިޔާބްކުރި މާނޭ(ވ) --- ފޮޓޯ: އޭޕީ
ލިވަޕޫލްގެ އެންފީލްޑްގައި ކުޅުނު މެޗުގައި އެޓީމުގެ ފަރާތުން ފެނުނު ދެ ގޯލު ފުރަތަމަ 20 މިނެޓް ތެރޭގައި ކާމިޔާބުކޮށްދިނީ ސެނަގޯލްގެ ފޯވާޑް ސާޑިއޯ މާނޭއެވެ. ރޭގެ މެޗުގައި މާނޭއަށް ވަނީ ހެޓްރިކް ހަދަން ވެސް ފުރުސަތު ލިބި ބޭކާރުވެފައެވެ.
ޔުނައިޓެޑްގެ އޯލްޑް ޓްރެފޯޑްގައި ކުޅުނު މެޗުގެ 32 ވަނަ މިނެޓްގައި އެންޓޯނީ މާޝިއަލް ތަނަވަސްކޮށްދިން ފުރުސަތަކުން ހުއާން މާޓާ ވަނީ އެޓީމަށް ލީޑް ނަގައިދީފައެވެ. ދެވަނަ ގޯލު 60 ވަނަ މިނެޓްގައި ކާމިޔާބުކޮށްދިނީ މާޝިއަލްއެވެ. ރޭގެ މެޗުގައި ޔުނައިޓެޑްގެ ޒަލްޓަން އިބްރަހިމޮވިޗް އާއި ޕައުލް ޕޮގްބާއަށް ވެސް ވަނީ ގޯލު ޖަހާނެ ރަނގަޅު ފުރުސަތުތަކެއް ލިބިފައެވެ. ނަމަވެސް އެ ކުޅުންތެރިން ފޮނުވާލި ހަމަލާތަކުގެ ހުރުހަކަށްވީ ވެޓް ފޯޑްގެ ކީޕަރު ހިއުރަލޯ ގޯމޭސްއެވެ. އެމެޗުން މޮޅުވުމާއި އެކު ޔުނައިޓެޑް ވަނީ ލީގްގައި ބަލިނުވެ 16 މެޗު ހަމަކޮށްފައެވެ.
ޔުނައިޓެޑް އާއި ވެޓް ފޯޑް ރޭ ކުޅުނު މެޗުގެ ތެރެއިން --- ފޮޓޯ: އޭޕީ
އާސެނަލްގެ އެމިރޭޓްސް ސްޓޭޑިއަމްގައި ކުޅުނު މެޗުގައި އެޓީމްގެ ދެ ގޯލު ވެސް ކާމިޔާބުކޮށްދިނީ އެލެކްސް ސަންޗޭޒްއެވެ. ފުރަތަމަ ގޯލު 34 ވަނަ މިނެޓްގައި ކާމިޔާބުކުރިއިރު ދެވަނަ ގޯލު ސަންޗޭޒް ކާމިޔާބުކުރީ އިތުރުވަގުތުގެ ތެރޭގައި ލިބުނު ޕެނަލްޓީއެއްގައެވެ. އާސެނަލްއަށް ޕެނަލްޓީ ލިބުނީ ހަލް ސިޓީގެ ޕެނަލްޓީ އޭރިއާ ތެރެއަށް ސަންޗޭޒް ނަގައިދިން ހުރަހެއް ލޫކަޒް ޕެރޭޒް ބޮލުން ފޮނުވާލި ބޯޅަ ގޯލު ކުރިމަތީގައި ހުރި ސެމް ކުލްކަސް އަތުން ދިފާއު ކުރުމުންނެވެ.
އާސެނަލް އާއި ހަލް ސިޓީ ރޭ ކުޅުނު މެޗުގެ ތެރެއިން --- ފޮޓޯ: އޭޕީ
ރޭގެ މެޗުން މޮޅުވެ 50 ޕޮއިންޓާ އެކު އާސެނަލް ތިން ވަނައަށް ޖެހިލިއިރު 49 ޕޮއިންޓާ އެކު ހަތަރު ވަނައިގައި އޮތީ ލިވަޕޫލްއެވެ. އެއް މެޗު މަދުން ކުޅެ 49 ޕޮއިންޓާއެކު މެންޗަސްޓާ ސިޓީއަށް ފަސް ވަނަ ލިބެނީ ގޯލުގެ ތަފާތުންނެވެ. މެންޗަސްޓާ ޔުނައިޓެޑް އަދިވެސް އޮތީ ތާވަލުގެ ހަ ވަނައިގައެވެ. އެޓީމަށް ލިބެނީ 48 ޕޮއިންޓެވެ.