15 Feb 2017, 11:51
ރާއްޖޭގެ ފަތުރުވެރިކަން އިސްތިހާރުކޮށް، ސައުދީ އަރަބިއްޔާގެ ވިޔަފާރިވެރިންނަށް ރާއްޖެއާ ބެހޭ މައުލޫމާތު ފޯރުކޮށްދިނުމަށްޓަކައިސަން ސިޔާމް ގްރޫޕްގެ އިސްނެގުމުގެ މަތިން ސައުދީ އަރަބިއްޔާގައި ޚާއްސަ ހަރަކާތެއް ބާއްވައިފިއެވެ.
އެމްއެމްޕީއާރުސީއިން މައުލޫމާތުދޭ ގޮތުގައި ސައުދީގައި ހުންނަ ދިވެހި އެމްބަސީއާ ގުޅިގެން ސަން ސިޔާމް ގްރޫޕުން، ސައުދީގެ ވެރިރަށް ރިޔާދުގެ ފޯ ޕޮއިންޓްސް ބައި ޝެރަޓަން ހޮޓެލްގައި ވަނީ ޚާއްސަ ހަފްލާއެއް ބާއްވައިފައެވެ.
މި ހަރަކާތް ބޭއްވީ ރިޔާދުގައި ސަން ސިޔާމް ގްރޫޕުން މަންދޫބެއް ގާއިމުކުރުމާއި، އެ ގްރޫޕުގެ ހަރަކާތްތެރިވުން ފެށުމާ ގުޅުވައިގެންނެވެ. އެކަމުގެ މަގްސަދަކީ ރާއްޖެއާއި، ރާއްޖޭގެ ފަތުރުވެރިކަމާ ބެހޭ މައުލޫމާތު ސައުދީއާއި މެދުއިރުމަތީގެ ގައުމުތަކަށް ފޯރުކޮށްދިނުމެވެ. ރާއްޖެއަކީ މިހާރުވެސް މެދުއިރުމަތީގެ ގައުމުތަކުގެ މެދުގައި މަގުބޫލު މަންޒިލެކެވެ.
އެ ހަފްލާގައި، ސަން ސިޔާމް ގްރޫޕުގެ ޑިރެކްޓަރ އޮފް ބިޒްނަސް ޑިވެލޮޕްމެންޓް އެވްޖީނާ ބޮޔަންކޯވާ ވަނީ، ރާއްޖެއަށް ދަތުރުކުރުމާއި ރާއްޖޭގެ ފަތުރުވެރިކަމާ ބެހޭ ޕްރެޒެންޓޭޝަނެއް ހުށަހަޅުއްވައިފައެވެ. މީގެ އިތުރުން ސައުދީ އަރަބިއްޔާގައި ހުންނަވާ ދިވެހި ސަފީރު އަބްދުﷲ ހަމީދު އެ ހަފްލާގައި ވަހަކަވެސް ދެއްކެވިއެވެ.
މި ހަފްލާގައި ބައިވެރިވި ފަރާތްތަކުގެ މެދުގައި ގުރުއަތުލައިގެން ހޮވުނު ބައެއް ނަސީބުވެރިންނަށް ވަނީ ސަން ސިޔާމް ރިސޯޓްސްގެ ޚަރަދުގައި ރާއްޖޭގައި ޗުއްޓީއެއް ހޭދަކުރުމުގެ ފުރުސަތުވެސް ދީފައެވެ. އެ ދަތުރުތަކުގެ ޓިކެޓު ސްޕޮންސާކޮށްދިނީ ސައުދިއާ އެއާލައިންސްއިންނެވެ.