22 Feb 2017, 14:55
އަދާލަތު ޕާޓީގެ ކައުންސިލް މެމްބަރު ސިދާތާ ޝަރީފްގެ ޕާސްޕޯޓް ހިފެހެއްޓި ފަހުން މަސްދުވަހާ ކައިރިވެފައިވާ ކަމަށާއި ކަމާ ބެހޭ އެއްވެސް އިދާރާއަކުން އެކަށީގެންވާ ޖަވާބެއް ނުލިބުމުން އޭނާ ކަންބޮޑުވުން ފާޅުކޮށްފި އެވެ.
ސިދާތާގެ ޕާސްޕޯޓް ހިފަހައްޓާފައި ވަނީ މިދިމަ މަހުގެ 26 ވަނަ ދުވަހު މާލެ އައުމުން ވެލާނާ އިންޓަނޭސަނަލް އެއާޕޯޓްގައި ހުންނަނަ އިމިގްރޭޝަން ކައުންޓަރުންނެވެ. ސަބަބެއްގެ ގޮތުގައި އިމިގްރޭސަނުން ބުނެފައި ވަނީ ކޯޓް އަމުރެއްގެ ދަށުން ސިދާތާގެ ޕާސްޕޯޓް ހިފެހެއްޓުމަށް އެއިދާރާއަށް އަންގާފައިވުމެވެ.
މިއަދު ހެނދުނު އަދާލަތު ޕާޓީ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ޝިދާތާ ވިދާޅުވީ އޭނާގެ ޕާސްޕޯޓް ހިފެހެއްޓުމަށް ކްރިމިނަލް ކޯޓުން އަމުރެއް ނެރެފައި ވަނީ މޯލްޑިވްސް ޕޮލިސް ސާވިސް އަށް ހުށަހެޅިފައިވާ މައްސަލައެއްގެ ތަހުގީގަށް އެފަރާތުގެ އެދުމުގެ މަތިން ކަމަށް ކްރިމިނަލް ކޯޓުން ސިޓީއަކުން އޭނާ އަށް އަންގާފައިވާ ކަމަށެވެ.
"އެދުވަހުން ފެށިގެން ވެސް އަޅުގަނޑު މިހުރީ މާލެގައި ބަންދުކުރެވިފައި. މިއަދާ ހަމައަށް ވެސް އަޅުގަނޑަކަށް ނޭނގެ ބަންދުކުރެވިފައި މިވަނީ ކީއްވެ ކަމެއް ކޮން މައްސަލައެއްގަ ކަމެއް،" ޝިދާތާ ވިދާޅުވި އެވެ.
ޝިދާތާގެ ގާނޫނީ ވަކީލް އަލީ ހުސައިން ވިދާޅުވީ، ފުލުހުން ކޯޓް އަމުރަކަށް އެދިފައިވާތީ ޝިދާތާގެ ކުށުގެ ރިކޯޑް ސާފުކުރުމުން އެއްވެސް ރިކޯޑެއް ނެތްކަމަށް ފުލުހުން ބުނެފައިވާ ކަމަށެވެ.
"މި މައްސަލައާ ގުޅިގެން ދައުލަތުން ޝިދާތާ ޝަރީފްގެ ވަރަށް ބޮޑު ހައްގެއް އެބައޮތް ހިފަހައްޓާފައި. ގާނޫނު އަސާސީން ލިބިދޭ ހައްގެއް އެއީ އެމީހަކުު ބޭނުންތާކަށް ފުރައިގެން ދިއުމާއި އެނބުރިއައުމަކީ،" އަލީ ހުސެން ވިދާޅުވި އެވެ.
އަލީ ހުސައިން ވިދާޅުވީ ދައުލަތުގެ ކަމާ ބެހޭ އެއްވެސް އިދާރާއަކުން ޝިދާތާގެ ޕާސްޕޯޓް ހިފަހެއްޓި ސަބަބެއް ބުނެދެވިފައިނުވާ ކަމަށާއި ފުލުހުން ނުވަތަ ކްރުމިނަލް ކޯޓުން ކުރެ ކޮންމެވެސް އެއް އިދާރާއަކުން ގޯސް މައުލޫމާތު ދެމުންދާ ކަމަށެވެ.
"އެއްވެސް ރައްޔިތެއްގެ ހައްގު ހިފެހެއްޓުމަކީ އަޅުގަނޑުމެން ގަބޫލުކުރާނެ ކަމެއް ނޫން. މިކަން ދައުލަތުގެ ފަރާތުން ކުރަމުން މިގެންދަނީ ޝިދާތާ ޝަރީފްގެ ހައްގުތަކެއް ހިފަހައްޓައި ޝިދާތާ ޝަރީފް ސަރުކާރުން ކުރާ ކަންތައްތަކާ ދެކޮޅަށް ފާޑުކިޔާތީ އެ ފާޑުކިޔުންތަށް ހުއްޓުވާލައި ބޭރުގައުމުތަކަށް ފުރައިގެން ގޮސްއައުމުގެ މިނިވަންކަން ހިފެހެއްޓުމުގެ ގޮތުން،" އަލީ ހުސައިން ވިދާޅުވި އެވެ.
އަލީ ހުސައިން ވިދާޅުވީ ގާނޫނީ ޓީމުން ބެލިބެލުމުން ޝިދާތާގެ ޕާސްޕޯޓް ހިފަހައްޓާފައި ވަނީ ރާއްޖޭގައި ހެދިފައި ހުރި ގާނޫނުތަކާއި ގާނޫނު އަސާސީއާ ހިލާފަށްކަމަށް ސާބިތުވެފެއިވާ ކަމަށާއި އެކުމުގެ ބަދަލުހޯދުމަށް ދައުވާކުރުމަށް ދިރާސާކުރަމުންދާ ކަމަށެވެ.