08 Mar 2017, 11:31
ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ މައްސަލަ ރައްޔިތުންގެ މަޖިލީހަށް މިއަދު ހުށަހަޅުއްވައިފި އެވެ.
މަސީހުގެ އިތުބާރު ނެތް ކަމުގެ މައްސަލަ މަޖިލީހަށް ވެއްދިކަން މީޑިއާއަށް އާންމުކުރީ މަޖިލިސް ކުރާ ގޭ ބޭރުގައި މިއަދު ބޭއްވި ޕްރެސް ކޮންފަރެންސްގަ އެވެ. އެމްޑީޕީ އާއި ޕީޕީއެމާއި ޖޭޕީގެ އިތުރުން އެމްޑީއޭގެ މެމްބަރަކު ބައިވެރިވި އެ ޕްރެސް ކޮންފަރެންސްގައި ބުނެފައި ވަނީ މަސީހުގެ އިތުބާރު ނެތް ކަމުގެ މައްސަލަ ވެއްދީ 26 މެމްބަރުންގެ ސޮޔާ އެކުގައި ކަމަށެވެ.
"އަޅުގަނޑުމެން މިކަން ކުރަން މި ޖެހުނީ އަޅުގަނޑުމެންގެ މެމްބަރުންގެ ތެރެއިން ގިނަ ބަޔަކަށް މަޖިލީހުގެ މަސަތްކަތް މިހާރު ކުރިއަށް ގެންދެވެނީ އެންމެ ރަނގަޅު ގޮތަކަށް ނޫންކަން ފެންނާތީ އެކަމަށް އަޅުގަނޑުމެން ހައްލު ހޯދުމަށް މަޖިލީހުގެ ތެރެއިން އެތަށް ބައިވަރު މަސަތްކަތްތަކެއްކޮށް އެ މަސަތްކަތްތައް ނާކާމިޔާބު ވުމުގެ ސަބަބުން،" ދިއްގަރު ދާއިރާގެ ޕީޕީއެމް މެމްބަރު ފާރިސް މައުމޫން ވިދާޅުވިއެވެ.
އޭނާ ވިދާޅުވީ އެ މަސަތްކަތުގައި މަޖިލީހުގައި ހިމެނިވަޑައިގަންނާ އެމްޑީޕީ އާއި ޕީޕީއެމްގެ އިތުރުން ޖުމުހޫރީ ޕާޓީ އާއި އަދާލަތު ޕާޓީ އާއި އެމްޑީއޭގެ މެމްބަރުންގެ އިތުރުން މިނިވަން މެމަބަރުން ވެސް ބައިވެރިވާ ކަމަށެވެ
"ރައްޔިތިންގެ މަޖިލީހުގެ މެމްބަރުންގެ ހައިސިއްޔަތުން މިތަނުގެ ތެރޭގައި ތަފާތުކުރުންތައް ބޮޑުވެ މިނިވަންކަން ގެއްލި އަޅުގަނޑުމެންނަށް އެއްވެސް ހާލެއްގައި ރައްޔިތުންނަށްޓަަކައި އެއްވެސް ބާވަތެއްގެ ގާނޫނެއް ހެދުމަށް އެއްވެސް ޖާގައެއް ނުދީ އަވަސް އަރުވާލައިގެން ކަންކަން ނިންމަމުން ދިއުމުގެ ނަތީޖާއަކަށް މިއަދު މިމަސަތްކަތް މިފެށީ،" މަޖިލީހުގައި ހިމެނިވަޑައިގަންނަވާ ތުލުސްދޫ ދާއިރާގެ ޕީޕީއެމް މެމްބަރު މުހައްމަދު ވަހީދު އިބްރާހިމް (ލޯޔަރު ވައްޑެ) ވިދާޅުވިއެވެ.
މަސީހުގެ އިތުބާރު ނެތް ކަމުގެ މައްސަލަ މަޖިލީހައް ވެއްދުމުގައި އިސްކޮށް ތިއްބެވި މެމްބަރުން --- ސަން ފޮޓޯ: މުހައްމަދު އަފްރާހު
މަޖިލީހުގައު ހިމެނިވަޑައިގެންނަވާ މައިނޯރިޓީ ލީޑަރު ހިއްނަވަރު ދާއިރާގެ މެމްބަރު އިބްރާހިމް މުހައްމަދު ސޯލިހު (އިބޫ) ވިދާޅުވީ ރައްޔިތުންގެ މަޖިލިސް ހިގަން ވާނެ ގޮތް ވަރަށް ސާފުކޮށް ވާނީ ގާނޫނު އަސާސީގައި ލިޔެފައި ކަމަށާއި ނަމަވެެސް މިހާރު މަޖިލިސް ހިންގަމުން ގެންދަވަނީ އުސޫލުތަކާއި މުޅިން ހިލާފަށް ކަމަށެވެ.
މަޖިލީހުގެ ގަވާއިދުގައި ބުނެފައިވާ ގޮތުން މަޖިލީހުގެ ރައީސްގެ އިތުބާރު ނެތް ކަމުގެ މައްސަލަ މަޖިލީހަށް ވެއްދޭނީ މަދުވެގެން 15 މެމްބަރުންގެ ސޮޔާ އެކުގައި ކަމަށެވެ.
މަސީހުގެ އިތުބާރު ނެތް ކަމުގެ މައްސަލައެއް އެމްޑީޕީން އިސްވެ އޮވެ ވަނީ މިދިޔަ އަހަރުގެ މާޗު އަށް ވަނަ ދުވަހު މަޖިލީހައް ވައްދާފަ އެވެ. ނަމަވެސް އެ މައްސަލަ މަޖިލީހަށް ވެއްދިތާ 19 ދުވަސް ފަހުން އެމްޑީޕީން ވަނީ އެ މައްސަލަ އަނބުރާ ގެންގޮސްފައެވެ.
އިތުބާރު ނެތް ކަމުގެ ވޯޓު ފާސްވާނީ އެ ވޯޓުގައި ބައިވެރިވާ މެމްބަރުންގެ އަގުލަބިއްޔަތުންނެވެ. އެ ވޯޓު ފާސްވާނީ ވަކި މިންވަރަކަށް ވޯޓު ލިބިގެންވާ ކަމަށް މަޖިލީހުގެ ގަވާއިދުގައި ބަޔާންކޮށްފައެއް ނުވެ އެވެ.
މަޖިލީހުގެ ގަވާއިދުގައި ބުނެފައިވާ ގޮތުން މަޖިލީހުގެ ރައީސްގެ އިތުބާރު ނެތް ކަމުގެ މައްސަލަ ހުށަހެޅުމާއެކު، ރަސްމީ ބަންދު ނޫން ތިން ދުވަހުގެ ތެރޭގައި އެ މައްސަލައިގެ ނޯޓިސް މަޖިލީހުގެ ރައީސަށާއި މެމްބަރުންނަށް ފޮނުވަންވާނެ އެވެ. އެ ނޯޓިހުގެ ތާރިހުން ފެށިގެން ރަސްމީ ބަންދު ނޫން 10 ދުވަހުގެ މުއްދަތު ދިނުމަށްފަހު، އެންމެ އަވަހަށް އަންނަ ރަސްމީ ބަންދު ނޫން ދުވަހަކު ބާއްވާ ޖަލްސާއަށް އެ މައްސަލަ ހުށަހަޅަންވާނެ ކަމަށް ވެސް އެ ގަވާއިދުގައި ބުނެފައިވެ އެވެ.