08 Mar 2017, 19:08
ޗައިނާ އާ އެކު ގާއިމް ކުރެވޭ ފްރީ ޓްރޭޑް އެގްރީމެންޓާ ގުޅޭގޮތުން ބާއްވާ އެންމެ ފަހުގެ މަޝްވަރާތައް ބަނޑޮސް މޯލްޑިވްސްގައި މިހާރު ކުރިއަށްދާއިރު، އެއްބަސްވުމަކަށް ނާދެވި ލަސް ވަނީ އެ މަސައްކަތުގެ ބޮޑު ކަމުން ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ބަނޑޮހުގައި މިއަދު ނޫސްވެރިންނާ ބައްދަލުކުރައްވައި މައުލޫމާތު ދެއްވަމުން މިނިސްޓަރު ސައީދު ވިދާޅުވީ، މީގެ ކުރިން އޭޕްރީލް މަހުގައި އެ އެއްބަސްވުން ވުޖޫދަށް އަންނާނެ ކަމަށް ވިދާޅުވެފައިވީ ނަމަވެސް މިހާރު އެ އެއްބަސްވުން އެކުލަވާލެވި އެއްބަސްވުމަށް ވަދެވޭނީ މިއަހަރުގެ ޖޫން މަހުގެ ކުރިން ކަމަށެވެ.
މިނިސްޓަރު މިހެން ވިދާޅުވި އިރު، މީގެ ކުރިން މިނިސްޓަރު ވިދާޅުވީ މިއަހަރުގެ ކުރީ ކޮޅުގައި އެ އެއްބަސްވުމުގައި ސޮއި ކުރެވޭނެ ކަމަށެވެ. އެގޮތުން އަންނަ އޭޕްރީލް މަހުގައި އެއްބަސްވުން ވުޖޫދަށް ގެނެސް ސޮއި ކުރެވޭނެ ކަމަށް މިނިސްޓަރު ވަނީ މީގެ ކުރިން ވިދާޅުވެފައެވެ.
"ކުރިން އަޅުގަނޑު ބުނެފަވާނެ އޭޕްރީލްމަހުގަ އެއްބަސް ވެވޭނެ ކަމަށް. އެއީ އަޅުގަނޑުމެން ބޭނުންވާ ގޮތް. އެކަމަކުވެސް މި މަސައްކަތަކީ ބޮޑު މަސައްކަތަކަށް ވުމުން އަޅުގަނޑު ވަކި ތާރީޚެކޭ ނުބުނެ ދަންނަވަން ބޭނުންވަނީ މިއަހަރުގެ ކުރީ ކޮޅު މި އެއްބަސްވުމަށް ވަދެވޭނެއޭ،" "ސަން" އިން ދެންނެވި ސުވާލަކަށް ޖަވާބު ދެއްވަމުން މިނިސްޓަރު ސައީދު ވިދާޅުވިއެވެ.
މިއަދުގެ ޕްރެސްކޮންފަރެންސުގައި ސައީދު ވިދާޅުވީ، ޗައިނާއާ އެކު މިހާރު ކުރިއަށްދާ އެންމެ ފަހުގެ މަޝްވަރާތައް މާދަމާ ނިންމާލާއިރު އެއްބަސްވުމުގައި ހުންނަން ޖެހޭ މުހިއްމު ނުކުތާތަކާ މެދު މަޝްވަރާކުރެވި އެކަންކަމާ މެދު އެއްބަސްވެވޭނެ ކަމަށެވެ.
"ސަރުކާރުގެ އެކި އެކި ޕްރޮޓޮކޯލްސް ހުންނާނެ މީގަ. ލީގަލީ ބަލަން ޖެހޭ ގޮތްތަކެއްވެސް ހުންނާނެ. ގާނޫނީ ގޮތުން ވިޔަފާރިއަށް ހެދިފަ އޮތް އެހެން އެއްވެސް ގާނޫނަކަށް ފުށޫ ނާރާ ގޮތަށް، ރާއްޖޭގެ ޑޮމެސްޓިކް ވިޔަފާރިތަކާއި އިމްޕޯޓް އެކްސްޕޯޓު ކުރުމަށް ހެދިފަ އޮތް ރެގިއުލޭޓަރީ ސިސްޓަމްގެ ތެރޭގަ މި އެއްބަސްވުންވެސް އުޅޭނީ. އެކަންތައްތަކަށް ހުންނާނެ އެޑްމިނިސްޓްރޭޓިވްލީ ކުރަން ޖެހޭ މަސައްކަތްތައް. އެކަންކަން ދެގައުމުންވެސް ބަލާނެ،" ސައީދު ވިދާޅުވިއެވެ.
މީގެ އިތުރުން މިނިސްޓަރު ވިދާޅުވީ، މިނިވަން ވިޔަފާރީގެ އެއްބަސްވުމުގެ ދަށުން ދިވެހި މަސްވެރިންނަށް ވަރަށް ބޮޑު ފައިދާތަކެއް ލިބިގެންދާނެ ކަމަށެވެ. މަހުގެ ބާވަތްތަކުގެ އިތުރުން، ދަނޑުވެރިކަމާއި އެހެނިހެން ބާވަތްތަކުގެ ތަކެތިވެސް އެ އެއްބަސްވުމުގެ ދަށުން އިތުރު އަގަކާ ނުލައި ރާއްޖެއިން އެކްސްޕޯޓު ކުރުމުގެ މަގު ފަހި ވެގެންދާނެ ކަމަށް އޭނާ ވިދާޅުވިއެވެ.
ރާއްޖެއިން ބާނާ މަހާއި ޓެކުހަކާ ނުލައި ޗައިނާއަށް އެކްސްޕޯޓު ކުރުމާ ގުޅޭގޮތުން މިދިޔަ އަހަރުގެ ސެޕްޓެމްބަރު މަހު ބޭއްވީ މަޝްވަރާތަކުގައި ވަނީ ވާހަކަ ދައްކާފައެވެ.
ރާއްޖޭގައި ނުބާނާ ބައެއް ކަހަލަ މަހުގެ ބާވަތްތަކާއި ސީފުޑް ރާއްޖެ އެތެރެކޮށް، އެތަކެތި ރާއްޖޭގައި ޕެކޭޖު ކުރުމަށްފަހު ޗައިނާގެ މާކެޓަށް ސުން ޕަސަންޓުގައި އެކްސްޕޯޓު ކުރެވިދާނެ ކަމަށް މިނިސްޓަރު ވިދާޅުވި އެވެ. މަހުގެ ބާވަތްތަކުގެ އިތުރުންވެސް އެހެނިހެން ބައެއް ތަކެތި އެގޮތަށް ރީޕެކް ކޮށް، ވެލިއު އެޑްކުރުމަށްފަހު ޗައިނާއަށް ސުން ޕަސެންޓުގައި އެކްސްޕޯޓު ކުރެވޭނެ ކަމަށް މިނިސްޓަރު ވިދާޅުވިއެވެ.