11 Mar 2017, 19:27
އެފްއޭއެމްގެ ނައިބު ރައީސާ އާއިޝަތު ނާޒިމާގެ އިސްނެންގެވުމާއެކު ބައިނަލްއަގުވާމީ އަންހެނުންގެ ދުވަސް އެ އިދާރާއިން ފާހަގަކޮށްފިއެވެ.
އެ ހަރަކާތް ކުރިއަށްގެންދިއުމަށް އިސްނެންގެވި ނާޒިމާއަކީ އެފްއޭއެމްގެ އެގްޒެކެޓިވް ކޮމިޓީގައި ހިމެނިވަޑައިގަންނަވާ ހަމައެކަނި އަންހެން މެންބަރެވެ. އަދި އޭނާއަކީ އެފްއޭއެމްގެ ފުރަތަމަ އަންހެން ނައިބު ރައިސާއެވެ.
ސަން ސްޕޯޓްސްއަށް މައުލޫމާތުދެއްވަމުން ނާޒިމާ ވިދާޅުވީ، މާލޭގެ ސްކޫލުތަކަށް ހުޅުވާލައިގެން ކުރިއަށް ގެންދިޔަ ކުޑަ ފެސްޓީވަލެއް މިއަދު ހަވީރު ކުރިއަށްގެންގޮސްފައިވާ ކަމަށެވެ. އެއީ އޭއެފްސީ އަންހެނުންގެ ދުވަހާއި ބައިނަލްއަގުވަމީ އަންހެނުންގެ ދުވަސް ފާހަގަކުރުމަށް ކުރިއަށްގެންދިޔަ ފެސްޓިވަލެކެވެ.
ރާއްޖޭގެ ގައުމީ އަންހެން ޓީމާއި 14 އަހަރުން ދަށުގެ ގައުމީ އަންހެން ޓީމުގެ ކުޅުންތެރިންނާ އެކު ވަގުތު ކޮޅެއް ހޭދަކޮށްލުމުގެ ފުރުސަތު ލިބިގެންދިޔަ ކަމަށެވެ.
"މި ހަރަކާތަކީ ބައިނަލްއަގުވާމީ އަންހެނުންގެ ދުވަސް ކުލަގަދަކޮށް ފާހަގަކުރުމަށް އެފްއޭއެމްއިން ކުރިއަށް ގެންދިޔަ ހަރަކާތެއް. މައިގަނޑު މަގްސަދަކީ ފުޓްބޯޅައަކީ އަންހެނުންގެ ހިއްސާ ބޮޑު ކުޅިވަރަކަށްވާތީ އެ ކުޅިވަރަށް ޝައުގުވެރިވާ އަންހެން ކުދިންނަށް ރާއްޖޭގެ ގައުމީ އަންހެން ޓީމާއެކު ވަގުތު ކޮޅެއް ހޭދަކޮށްލުމުގެ ފުރުސަތު ދިނުން،" ނާޒިމާ ވިދާޅުވިއެވެ.
އެފްއޭއެމްގެ ނައިބު ރައީސާ ވިދާޅުވީ، އެ ހަރަކާތުގެ ތެރެއިން ފުޓްބޯޅައާ ގުޅުންހުރި ގިނަ މައުލޫމާތުތަކާއި އަންހެން ދަރިވަރުނަށް އުފާވެރި ވަގުތުކޮޅެއް ހޭދަކޮށްލުމުގެ ފުރުސަތު ލބިގެންދިޔަ ކަަމަށެވެ.
މިއަދު ހަވީރު އެއް ނަންބަރު ޓާފް ދަނޑުގައި ކުރިއަށް ދިޔަ އެ ހަރަކާތުގައި މާލޭގެ ބައެއް ސްކޫލުތަކުން ގިނަ އަދަދެއްގެ އަންހެން ދަރިވަރުންވަނީ ބައިވެރިވެފައެވެ.