03 Apr 2017, 22:21
ހައިރައިޒުން އިންތިޒާމުކޮށްގެން ބާއްވާ ވެކޭޝަންސް އެކްސްޕޯގައި މިއަހަރުވެސް ކްރެކެން އެޑްވެންޗާސް އިން ބައިވެރިވާން ނިންމައިފިއެވެ.
ކްރެކެން އެޑްވެންޗާސްއިން ބުނީ، އެ ކުންފުނީގެ ފަރާތުން މިއަހަރުގެ އެކްސްޕޯގައި ދައްކާލާނީ ލޯކަލް އަދި ޓޫރިސްޓް ޕެކޭޖުތައް ކަމަށެވެ. އޭގެ ތެރޭގައި ވީކެންޑް ޕެކޭޖުތައް ހިމެނޭ ކަމަށްވެސް އެ ކުންފުނިން ބުންޏެވެ.
މީގެ އިތުރުން، އެ ޕެކޭޖުތަކަކީ މާލެ ކައިރީގައި ހުރި ގެސްޓުހައުސްތަކަސް އަންނަ ފަތުރުވެރިންނާއި މާލެ ސިޓީގެ ގެސްޓު ހައުސްތަކަށްވެސް ޕެކޭޖުތައް ހުޅުވާލާފައިވާ ކަމަށް އެކުންފުނިން ބުންޏެވެ.
އެކުންފުނީގެ މެނޭޖިން ޑިރެކްޓަރު އަހުމަދު ރިޔާޒް ވިދާޅުވީ މިދިޔަ އަހަރުގެ ވެކޭޝަންސް އެކްސްޕޯގައިވެސް ބައިވެރިވި ކަމަށާއި، އެއީ ރަނގަޅު މާކެޓެއް ލިބޭ މައުރަޒެއް ކަމަށެވެ.
"މިދިޔަ އަހަރު އަޅުގަނޑުމެން ފަށައިގަތީ. ވަރަށް ގިނަ ދަތިތަކާ އެކުވެސް މިހާރު މިދަނީ ގްރޯ ވަމުން. އޭރު އެކްސްޕޯގައި ބައިވެރިވީ އެހާވަރަށް ތައްޔާރު ނުވެ. ބައިވެރިވެވުމުން ރަނގަޅު އެކްސްޕީރިއެންސެއް ލިބިއްޖެ. އެހެން މިއަހަރު ބައިވެރިވާން ނިންމީ،" ރިޔާޒް ވިދާޅުވިއެވެ.
ކްރެކެން އެޑްވެންޗާސް އަކީ އެކްސްކާޝަންސް ތަކަށް ޚާއްސަ ކުންފުންޏެކެވެ. އެކުންފުނި ހިންގަން ފެށީ ސަރުކާރުން ޒުވާނުންނަށް ދޫކުރާ ގެޓްސެޓް ލޯނުގެ ދަށުންނެވެ. ގެޓް ސެޓް ލޯނުގެ ދަށުން ލޯންޗެއް ގަނެ، ވިޔަފާރި ފަށައި ކުރިއަރަމުން އަންނަ އެކުންފުނިން މިހާރު ވަނީ ސަފާރީއެއްވެސް ކުއްޔަށް ނަގައިފައެވެ.