07 Apr 2017, 18:00
ކޯޓު އަމުރެއްގެ ދަށުން މާޗް 16 ވަނަ ދުވަހުގެ ރޭ ހައްޔަރު ކުރި، ސޯޝަލް މީޑިއާ އެކްޓިވިސްޓެއްކަމަށްވާ ތޮއްޔިބު ޝަހީމްގެ ބަންދުގެ މުއްދަތު ތިންވަނަ ފަހަރަށް އިތުރުކޮށްފި އެވެ.
މިއަދު ކުރިމިނަލް ކޯޓަށް ހާޒިރު ކޮށް ތޮއްޔިބުގެ ބަންދަށް 10 ދުވަސް އިތުރުކޮށްފައިވާކަން އޭނާގެ ގާނޫނީ ވަކީލު މަހުފޫޒް ސައީދު "ސަން"އަށް ވަނީ ކަށަވަރުކޮށްދީފަ އެވެ.
ތޮއްޔިބު ހައްޔަރުކޮށްފައިވަނީ، ރާއްޖޭގައި ފެތުރެމުން ދިޔަ އެޗްވަންއެންވަންއާއި އެހެނިހެން ކަންތައްތަކާ ގުޅޭ ގޮތުން ރައްޔިތުންގެ ހިތްތަކުގައި ބިރުވެރިކަން އުފެދޭ ގޮތަށް ސޯޝަލް މިޑިއާގައި ވާހަކަ ފަތުރަމުންދާ ކަމުގެ ތުހުމަތުގަ އެވެ.
ތޮއްޔިބު ހައްޔަރުކުރުމުގެ ކުރިން އޭނާ ވަނީ، ސައުދީ އަރަބިއާގެ ރަސްގެފާނު ސަލްމާން ބިން އަބްދުލްއަޒީޒު އާލް ސައުދު ރާއްޖެއަށް ކުރައްވަން އުޅުއްވި ދަތުރުފުޅާ ގުޅޭގޮތުން ބައެއް ޓްވީޓުތައް ކޮށްފައެވެ.
އެގޮތުން މަރުކަޒީ ބޭންކް އެމްއެމްއޭގެ ދެމީހެއްގެ ބެލުމުގެ ދަށުން އާރަށުގެ ވީވީއައިޕީ ބަންގަލޯއަށް ސައުދީ ހެލިކޮޕްޓަރުން 12 ކަޅުފޮށި އަދި އެއް ސިލްވާ ފޮށި ވެއްދިކަމަށް ބުނެ ޓްވީޓު ކުރިއެވެ. ނަމަވެސް އެމްއެމްއޭއިން އެކަން ވަނީ ދޮގުކޮށްފައެވެ.