13 Apr 2017, 21:25

އިނގިރޭސި ވިލާތަށް އަމިއްލަފުޅަށް އަރުވާލައްވައިގެން ހުންނެވި ކުރީގެ ރައީސް މުހައްމަދު ނަޝީދު ސްރީލަންކާގެ ކޮލަމްބޯއަށް ވަޑައިގެންފިއެވެ.

މިއަދު ހެނދުނުގެ ވަގުތެއްގައި ނަޝީދު ސްރީލަންކާއަށް ވަޑައިގެންފައިވާ އިރު، އެމަނިކުފާނަށް ކޮލޮމްބޯއިން މަރުހަބާ ވިދާޅުވެފައި ވަނީ ކޮލޮމްބޯގައި ދިރިއުޅުއްވާ އެމްޑީޕީގެ އިންޓަނޭޝަނަލް ސްޕޯކްސްޕާސަން ހާމިދު އަބްދުލްގަފޫރާއި، އެމްޑީޕީ ސަރުކާރުގެ ކުރީގެ ފޮރިން މިނިސްޓަރުކަން ކުރެއްވި އަހްމަދު ނަސީމެވެ.

ރާއްޖެ ޓީވީގައި ވާހަކަފުޅު ދައްކަވަމުން ނަސީމް ވިދާޅުވީ އެހެން ފަހަރުތަކާ ހިލާފާށް މިފަހަރުގެ ދަތުރުފުޅުގައި ނަޝީދު ކޮލަމްބޯގައި ގިނަ ދުވަސްތަކެއް ހޭދަކޮށް ތަފާތު އެކި ސިޔާސީ ބޭފުޅުންނާ ބައްދަލުކުރައްވައި މަޝްވަރާތައް ކުރިއަށް ގެންދަވާނެ ކަމަށެވެ.

ކްރިމިނަލް ކޯޓުގެ ކުރީގެ އިސް ގާޒީ އަބްދުﷲ މުހައްމަދު ހައްޔަރުކުރި މައްސަލައިގައި ޓެރަރިޒަމްގެ ކުށް ސާބިތުވެ 13 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވަނިކޮށް އިނގިރޭސިވިލާތަށް ބޭސްފަރުވާއަށް ވަޑައިގަތީ މިދިޔަ އަހަރުގެ ޖެނުއަރީ މަހުގެ ތެރޭގަ އެވެ. އެމަނިކުފާނު އިނގިރޭސިވިލާތަށް ވަޑައިގަތުމުގެ ކުރިން ސްރީލަންކާއަށް ވަޑައިގަތެވެ.

އެއަށްފަހު އިނގިރޭސި ވިލާތުގެ ސިޔާސީ ހިމާޔަތް ހޯއްދަވައިގެން އުޅުއްވާ އިރު، ދާދި ފަހުން ވެސް ރައީސް ނަޝީދު ލަންކާއަށް ވަޑައިގަތެވެ. އެ ދަތުރުފުޅުގައި އެމަނިކުފާނާ އެކު އެމްޑީޕީގެ މުހިންމު ބައްދަލުވުންތަކެއް ވަނީ ކޮލޮމްބޯގައި ބާއްވައިފަ އެވެ.

އިނގިރޭސި ވިލާތަށް އަރައްވާލެވުނު ފަހުން މިއީ ނަޝީދު ލަންކާއަށް ވަޑައިގެންނެވި ހަތަރު ވަނަ ފަހަރެވެ.