14 Apr 2017, 14:55
ހުނަރުވެރި ފޯވާޑް ޕައުލޯ ޑިބާލާގެ ކޮންޓްރެކްޓް ފަސް އަހަރަށް އިތުރުކުރުމަށް އިޓަލީގެ ޔުވެންޓަސްއިން ނިންމައިފިއެވެ.
އާޖެންޓީނާއަށް ނިސްބަތްވާ، އުމުރުން 23 އަހަރުގެ ފޯވާޑް ޔުވެންޓަސްއާ އެކު އެއްބަސްވުން އާކުރީ ބުރާސްފަތި ދުވަހުއެވެ. މި އެއްބަސްވުމާއެކު ޑިބާލާއަށް ހަފްތާއަކު އުޖޫރައިގެ ގޮތުގައި ގާތްގަނޑަކަށް 135,000 ޔޫރޯ ޖެހޭނެއެވެ.
ޔުވެންޓަސްއިން ޑިބާލާއާއެކު އާކުރި އެއްބަސްވުން، 2022 ވަނަ އަހަރުގެ ޖޫން 30އާ ހަމައަށް ދެމިގެންދާއިރު، މި އެއްބަސްވުމުގެ ދަށުން އޭނާއަށް ސީޒަނެއްގައި ހަތް މިލިއަން ޔޫރޯ ޖެހޭނެއެވެ.
"ޔުވެންޓަސް ފުޓްބޯލް ކްލަބުން އިއުލާނުކުރަން، ޕައުލޯ ޑިބާލާގެ ކޮންޓްރެކްޓް 30 ޖޫން 2022 ވަނަ އަހަރާ ހަމައަށް އާކުރުމާ ގުޅިގެން، އެފްސީ ޕަލޭމޯއަށް ޕާރފޮމަންސް ބޯނަސްގެ ގޮތުގައި 8 މިލިއަން ޔޫރޯ ދިނުމަށް ހަމަޖެހިފައިވާކަން،
"މި ފައިސާ ދިނުމަށް ހަމަޖެހިފައި ވަނީ، ހަތަރު އިންސްޓޯލް މަންޓަކަށް ބަހާލައިގެން، 2018-19 ސީޒަނުން ފެށިގެން."
ޗެމްޕިއަންސް ލީގުގެ ކުއާޓަރ ފައިނަލްގެ ފުރަތަމަ ލެގުގައި ބާސާ އަތުން 3-0 ލަނޑުން ޔުވެންޓަސް މޮޅުވި މެޗުގައި ދެ ލަނޑު ކާމިޔާބުކުރި ޑިބާލާ، ބާސާއަށް ނުވަތަ ރެއާލަށް ބަދަލުވާނޭކަމަށް މިދިޔަ ދެތިން ހަފްތާއެއްގައި ވަރަށް ބޮޑަށް ދެކެވުނެވެ.
އެއްބަސްވުން އިތުރުކުރުމާ ގުޅިގެން ޑިބާލާ ކުރި ޓްވީޓެއްގައި ބުނެފައި ވަނީ، ދިގު މުއްދަތަކަށް ޔުވެންޓަސްގެ ޖާޒީގައި އެ ކްލަބާއެކު ކުރިއަށް ދާން، ނިންމައިގެން ހުރިކަމަށެވެ.
އެފްސީ ޕަލޭމޯއިން 2015 ވަނަ އަހަރު އިޓަލީގެ ޗެމްޕިއަނުންނާ ގުޅުނު، ޑިބާލާއަކީ މިހާރު ޔޫރަޕްގައި ހިމެނޭ އެންމެ ނުރައްކާތެރި ފޯވަޑުންގެ ތެރޭގައި ހިމެނޭ ކުޅުންތެރިއެކެވެ.
މި ސީޒަންގައި ޔުވެންޓަސްއިން ތިން ޓްރޮފީއަށް އަމާޒު ހިފާފައިވާއިރު، ޑިބާލާވަނީ އޭނާ މިސީޒަންގައި ޔުވެންޓަސްއަށް މިހާތަނަށް ކުޅުނު 36 މެޗުން 16 ލަނޑު ކާމިޔާބުކޮށް، 8 އެސިސްޓް ހަދައިފައެވެ.
ބާސެލޯނާ އަތުން ޔުވެންޓަސް މޮޅުވި މެޗަށް ފަހު އެޓީމުގެ ކެޕްޓަން އަދި ގޯލްކީޕަރު ޖިއަންލުއިޖީ ބުފޮން ބުނީ، މިހާރު ދުނިޔޭގައި ތިބި އެންމެ މޮޅު ފަސް ކުޅުންތެރީންގެ ތެރޭގައި ޑިބާލާ ހިމެނޭ ކަމަށެވެ.