26 Apr 2017, 18:30
ކުއަލަލަމްޕޫރު (އޭޕްރިލް 26): މެލޭޝިއާގެ ކޮޓާ ޓިންގީގައި ހުންނަ ބޯޑިން ސްކޫލެއްގެ މުވައްޒަފަކު އެ ސްކޫލުގެ ދަރިވަރަކަށް ކުރި އަނިޔާގެ ސަބަބުން އެކުއްޖާ މަރުވެއްޖެ އެވެ.
އުމުރުން 11 އަހަރުގެ މުހައްމަދު ތާގިފް އަމީން މުހައްމަދު ގައްޒާފީ މަރުވީ އޭނާއަށް ލިބުނު އަނިޔާގެ ސަބަބުން ފައިގައި އިންފެކްޝަނެއް އުފެދި، މިދިޔަ ހުކުރު ދުވަހު އެ ކުއްޖާގެ ދެފައި ބުރި ކޮށްފައި ވަނިކޮށެވެ. އަދި އެ އިންފެކްޝަނުގެ ސަބަބުން މުހައްމަދުގެ އަތުގައި ވެސް ލޭގަނޑުވެ، އަތް ބުރި ކުރަން ޑޮކްޓަރުން ނިންމާފައި ވަނިކޮށެވެ.
މެލޭޝިއާގެ ސުލްތާން އިސްމާއިލް ހޮސްޕިޓަލް (އެޗްއެސްއައި)ގައި މިއަދު މުހައްމަދު މަރުވި އިރު އޭނާ އޮތީ ކޯމާއެއްގައި ކަމަށް އެ ކުއްޖާގެ ބައްޕަ ބުންޏެވެ. މުހައްމަދުގެ މަންމަ ބުނި ގޮތުގައި އެ ސްކޫލުން ވަނީ ތަކުރާރުކޮށް އެކުއްޖާއަށް އަނިޔާކޮށްފަ އެވެ.
އަދި މުހައްމަދަށް އަނިޔާ ކުރާ ކަން އެނގުނީ އެސްކޫލުން ދޭ އަދަބަށް ކެތް ނުކުރެވޭނެ ކަމަށާއި ސްކޫލަށް ނުފޮނުވުމަށް އެދި މުހައްމަދު އާދޭސް ކުރުމުން ކަމަށް ކުއްޖާގެ މަންމަ ބުންޏެވެ.
އެހާދިސާ މިހާރު ތަހުގީގު ކުރަމުން ދާ އިރު މުހައްމަދަށާއި އިތުރު ދަރިވަރުންތަކަކަށް ފެންހޮޅިއަކުން އަނިޔާ ކުރި ވޯޑެން ވަނީ ހައްޔަރުކޮށްފަ އެވެ. (އާރުޓީ)