03 May 2017, 13:28
ނޫސްވެރިންނަށް ފުރިހަމަ ހިމާޔަތާއި ރައްކާތެރިކަން ހޯދާނެ ލީޑަރުން ބޭނުންވާކަމަށް އެކުވެރި ދައުލަތް (އދ) އިން ބުނެފި އެވެ.
އދގެ ސެކެޓްރީ ޖެނެރަލް އެންޓޯނިއު ގުޓަރެސްގެ މިއަދު ދެއްވި ބަޔާނުގައި ވަނީ، ނޫސްވެރިންނަކީ ހުރިހާ ނުރައްކަލަކާ ކުރިމަތިލައިގެން މުޖްތަމައަށް ހިދުމަތްކޮށްދޭ ބައެއް ކަމަށާއި ނޫސްވެރިންގެ ހައްގުތަށް ހޯދައި ދިނުމަށްޓަކައި އެންމެން ވެސް މަސައްކަތް ކުރަން ޖެހޭ ކަމަށެވެ.
"ނޫސްވެރިންނަށް ލިބޭ ޖިންސީ ގޯނާޔާއި އިންޒާރުތަކާއި ޒަހަމްތަށް އަދި ނުވިތާކަށް ނޫސްވެރިން މެރުން ހުއްޓުވާނެ ލީޑަރުންތަކެއް ބޭނުންވޭ،" އެންޓޯނިއު ވިދާޅުވިއެވެ.
އޭނާ ވިދާޅުވި ގޮތުގައި ނޫސްވެރިން ހިމާޔަތް ކުރެވިއްޖެނަމަ، ނޫސްވެރިންގެ ފޮޓޯތަކާ އެ މީހުން މައުލޫމާތު އާންމުކުރާ ގޮތުގެ މައްޗަށް ބިނާކޮށް މުޅި ދުނިޔެ ބަދަލު ކޮއްލުމުގެ ގާބިލުކަން ވެސް ނޫސްވެރިންނަށް ލިބިފައިވާ ކަމަށެވެ.
ކޮންމެ އަހަރެއްގެ މެއި މަހުގެ ތިން ވަނަ ދުވަހަކީ ދުނިޔޭގެ ނޫސްވެރިކަމުގެ މިނިވަންކަމުގެ ދުވަހެވެ. ބައިނަލްއަޤްވާމީ ފެންވަރެއްގައި ނޫސްވެރިކަމުގެ މިނިވަންކަމުގެ ދުވަހެއް ފާހަގަކުރުމުގެ ބޭނުމަކީ މިނިވަން ނޫސްވެރިކަމުގެ މުހިންމުކަމާމެދު ހޭލުންތެރިކަން އިތުރުކޮށް، ހިޔާލުފާޅުކުރުމުގެ މިނިވަން ކަމަށް އިހުތިރާމްކޮށް އެކަން ނެގެހެއްޓުމަށް ބާރުއެޅުމެވެ.