04 May 2017, 16:05
މަސްވެރިކަމުގެ ސިނާއަތުގައި ބޭނުން ކުރާ ފިނިކުރާ ނިޒާމުތަކުގައި ބޭނުންކުރާ ގޭސް ތިމާވެށްޓާ ރައްޓެހި ގޭހަށް ބަދަލުކުރުމަށް ޑެމޮންސްޓްރޭޝަން ޕްރޮޖެކްޓެއް ހިންގުމަށް ޔޫއެންޑީޕީ އާއެކު ސޮއިކޮށްފި އެވެ.
ދިވެހިރާއްޖެއިން ބައިވެރިވެފައިވާ މުއާހަދާއެއްކަމުގައިވާ މޮންޓްރިއަލް ޕްރޮޓޮކޯލްގެ ދަށުން އެޗް.ސީ.އެފް.ސީ ބޭނުންކުރުން ހުއްޓާލުމަށް ޤައުމީ ގޮތުން ކުރަމުންގެންދާ މަސައްކަތުގެ ތެރެއިން މަސްވެރިކަމުގެ ދާއިރާގައި އެ ގޭސް ބޭނުން ކުރުން ހުއްޓާލުމަށް އެހީތެރިވުމުގެ ގޮތުން އެންވަޔަރަންމަންޓް މިނިސްޓްރީ އާއި ޔުނައިޓެޑް ނޭޝަންސް ޑެވެލޮޕްމަންޓް ޕްރޮގްރާމް (ޔޫ.އެން.ޑީ.ޕީ) އާއި ދެމެދު އެއްބަސްވުމެއްގައި ސޮއިކުރީ މިއަދު މެންދުރުފަހު މިނިސްޓްރީގައި ބޭއްވި ރަސްމިއްޔާތެއްގަ އެވެ.
އެ އެއްބަސްވުމުގައި މިމިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް އެންވަޔަރަންމަންޓް އެންޑް އެނާޖީ ތާރިގު އިބްރާހިމްއެވެ. އަދި ޔޫ.އެން.ޑީ.ޕީގެ ފަރާތުން ސޮއިކުރެއްވީ ޔޫ.އެން.ޑީ.ޕީގެ ރެސިޑެންޓް ކޯޑިނޭޓަރ ސޯކޯ ނޮޑާއެވެ.
ސޮއިކުރެއްވުމަށްފަހު ނޫސްވެރިންނަށް މައުލޫމާތު ދެއްވަމުން މިނިސްޓަރު ޠާރިގް ވިދާޅުވީ، މަސްވެރިކަމުގެ ސިނާއަތަކީ ދިވެހިރާއްޖޭގެ އިގްތިސާދަށް ނުހަނު މުހިއްމު ސިނާއަތަކަށް ވީހިނދު، އެ ދާއިރާގައި އެޗް.ސީ.އެފް.ސީގެ ބަދަލުގައި ތިމާވެށްޓާ ރައްޓެހި އާލާތްތައް ތައާރަފުކޮށް ބޭނުންކުރުމަކީ ސަރުކާރުން އަހައްމިއްޔަތުކަންދީގެން ކުރަމުންގެންދާ މަސައްކަތެއް ކަމަށެވެ.
އެގޮތުން މިއަދު ސޮއިކުރި އެއްބަސްވުމުގެ ދަށުން އެ ދާއިރާގައި މިވަގުތު އެޗް.ސީ.އެފް.ސީ ބޭނުން ކުރާ އާލާތްތައް، ތިމާވެއްޓާ ރައްޓެހި ގޭހަށް ބަދަލުކުރެވިދާނޭ ގޮތްތަކާއި ބެހޭ ދިރާސާއެއްކުރެވޭނެ ކަމަށް މިނިސްޓަރު ވިދާޅުވި އެވެ.
އޭގެ އިތުރުން މިފަދަ އާލާތްތައް ރެޓްރޯފިޓް ކުރުމާއި، ތިމާވެއްޓާއި ރައްޓެހި ޓެކްނޮލޮޖީ މަސްވެރިކަމުގެ ސިނާއަތުގައި ބޭނުންކުރެވޭނެ ގޮތްތައް ހޯދައި މައުލޫމާތު ހިއްސާކުރުމުގެ އިތުރުން އެކަމާ ގުޅޭ ސިޔާސަތުތައް އެކުލަވާލުމަށް މަސައްކަތްކުރެވޭނެ ކަމަށް މިނިސްޓަރު ޠާރިގް ވިދާޅުވި އެވެ.
މިއަދު ހިންގުމަށް އެއްބަސްވި ޕްރޮޖެކްޓަކީ ތަރައްޤީވަމުން އަންނަ ކުދި ޖަޒީރާ ގައުމުތަކުގައި މިގޮތަށް ހިންގޭ ފުރަތަމަ ޕްރޮޖެކްޓެވެ.
އެ ޕްރޮޖެކްޓްގެ ސަބަބުން ދިވެހިރާއްޖެއާއި ރާއްޖެ ފަދަ މަސްވެރިކަމުގެ ސިނާއަތަށް ބަރޯސާވާ ކުދި އެހެން ޖަޒީރާ ގައުމުތަކަށް އެޗް.ސީ.އެފް.ސީ ބޭނުން ކުރުން ހުއްޓާލުމަށް އިތުރު ފަސޭހަތަކެއް ލިބިގެންދާނެ ކަމަށް ވެސް މިނިސްޓަރު ޠާރިގް ވިދާޅުވި އެވެ.
އަދި އެ ޕްރޮޖެކްޓަކީ އޯޒޯން ފަށަލައަށް ގެއްލުންދޭ މާއްދާތައް ނައްތާލުމަށް އެހީދޭ މަލްޓިލެޓަރަލް ފަންޑުން އެހީ ލިބިގެން ކުރިއަށްގެންދާ ޕްރޮޖެކްޓެއް ކަމަށާއި ޕްރޮޖެކްޓުގެ ދަށުން އާލާތްތައް ބަދަލުކުރުމަށްޓަކައި 2.2 މިލިއަން ރުފިޔާ ޚަރަދުކުރެވޭނެ ކަމަށެވެ.