07 May 2017, 15:17
ޕްރިމިއަރ ލީގުގައި މިވަގުތު ތިބި ކޯޗުންނަށް ބަލާއިރު އެންމެ ވާދަވެރި، އަދި އެންމެ ހޫނުކޮށް ޒުވާބުދޭ ދެ ކޯޗުންގެ ތެރޭގައި އާސެނަލްގެ ކޯޗް އާސެންވެންގާއާއި މެންޗެސްޓަރ ޔުނައިޓެޑްގެ ކޯޗު ހޯޒޭ މޮރީނިއޯ ހިމެނޭނެއެވެ. އެހެން ނަމަވެސް މިހާރު މި ދެކޯޗުން މިވަނީ "ޕީސް ހަދައިފަ"އެވެ.
އާސެނަލަށް އިންގިލާބީ ބަދަލެއް ގެނެސް އެޓީމަށް ކާމިޔާބީތަކެއް ހޯދައިދީފައިވާ ވެންގާއާ މެދު މިހާރު އެޓީމުގެ ގިނަ ބަޔަކު އެހާ ހިތްހަމައެއް ނުޖެއެހެވެ. ޚާއްސަކޮށް ޓީމުގެ ސަޕޯޓަރުންގެ ހިތުގައި މިހާރު ވެންގާއަށް ކުރިން އޮތް ލޯތްބާއި އިހްތިރާމެއް ނެތެވެ. އާސެނަލް މިފަހަކަށް އައިސް ކުޅުނު މެޗުތަކުގައި ސަޕޯޓަރުން ބޭނުންކޮށްފައިވާ "ވެންގާ އައުޓް" ލިޔެފައިވާ ބެނާތައް މީގެ ހެއްކަކަށް ފުދެއެވެ.
އާސެނަލްގެ ސަޕޯޓަރުން ވެންގާގެ އިސްތިއުފާއަށް ގޮވާލައި އަޑު އުފުލަނީ -- ފޮޓޯ: ގޯލް
އެހެންނަމަވެސް، ވެންގާއާ އެންމެ ކޯޅުންގަނޑު ބޮޑުކޮށް ފެނުނު އެއް ފަރާތްކަމަށްވާ، ޗެލްސީގެ ކުރީގެ ކޯޗު މޮރީނިއޯ ދެކޭގޮތުގައި އާސެނަލުން ވެންގާއަށް ފުރިހަމައަށް އިތުބާރުކުރާން ޖެހެއެވެ. އަދި އެ ކްލަބުގެ ކޯޗުކަމުން ވެންގާ ދުރުކުރުމަށް އޭނާ އެއްގޮތަކަށްވެސް ތާއީދެއް ނުކުރެއެވެ.
ވެންގާއަކީ މިހާރު ޕްރިމިއަރ ލީގުގައި ހުރި އެންމެ ދުވަސްވީ ކޯޗެވެ. އަދި އާސެނަލްގެ ވެސް ރެކޯޑެކެވެ. މިރެއަކީ އަނެއްކާވެސް ކޯޅުން ބޮޑު މި ދެކޯޗުންގެ ކުރިމަތިލުމެއް ފެނިގެންދާނޭ ރެއެކެވެ.
"އަހަރެން އުންމީދުކުރަނީ ކްލަބުން ވެންގާއަށް އިތުބާރުކޮށް ކަންކަން ރަނގަޅުވެގެން ދިއުން. އާސެނަލަކީ، ކޯޗުންނަށް އިތުބާރުކޮށް ދިގުމުއްދަތަކަށް އެކޯޗުން ބެހެއްޓުމުގައި ނަމޫނާ ކްލަބެއް،" ކުރިން، ވެންގާއަކީ "ފެއިލް ވުމުގައި ސްޕެޝަލިސްޓެއް"ގެ ގޮތުގައި ސިފަކުރާ މޮރީނިއޯ ބުންޏެވެ.
"މެންޗެސްޓަރ ޔުނައިޓެޑްގައި ސަރ އެލެކްސް ފާގަސަންއަށްވެސް ކަންތައް ދިޔައީ އެގޮތަށް. އޭނަ ދާން ބޭނުންވީމަ އޭނައަށް އެނގިއްޖެ. އަހަރެން އުންމީދުކުރަނީ ވެންގާއާ މެދުވެސް ހަމަ އެގޮތަށް ކަންކަން ވެގެން ދިއުން."
މޮރީނިއޯ ބުނީ، މިޒަމާނުގެ ފުޓްބޯޅައިގައި ކޯޗުންނަކީ އަބަދުވެސް ބިރުވެރިކަމެއްގެ ތެރޭގައި ތިބޭ ބައެއް ކަމަށާއި އެއީ އެކަން ވާންޖެހޭ ގޮތް ނޫންކަމަށެވެ.
"އަހަރެން ހަމްދަރުދީވަން އެގޮތަށް ވޭން ތަހައްމަލުކުރަމުންދާ އަހަރެމެން ފަދަ އެހެން ކޯޗުންނަށްވެސް،" މޮރީނިއޯ ބުންޏެވެ.
ފުޓްބޯޅަ މުޅިން ބަދަލުވެއްޖެ. މިހާރު އެއީ ކޯޗުންނަށް އެމީހުންގެ މަގާމުގައި ދިގުމުއްދަތަކަށް ތިބުން ނާދިރު ކުޅިވަރެއް.
"މިހާރު ފުޓްބޯޅައިގައި އޮންނަނީ، ކާމިޔާބު ނުހޯދޭ ކޯޗެއްނަމަ ވަޒީފާ ދޫކޮށްލާފައި ދާންވީ. އަހަރެން ހަމަ ހަގީގަތުގަވެސް އެހެން ކޯޗުންނާ މެދުވެސް ހަމްދަރުދީވޭ.
"ކޯޗަކުން ކްލަބެއްގައި 20 އަހަރު ހޭދަކުރާއިރު، ކުޅޭ ކޮންމެ މެޗަކުން މޮޅުވުމަކީ ވާނޭ ކަމެއް ނޫން. ސަރ އެލެކްސް ފާގަސަންވެސް މިވާހަކަ ބުނެދޭނެ."
އާސެނަލްއަށް ޕްރިމިއާ ލީގާއި އެފްއޭ ކަޕް ޑަބަލް ހޯދައި ދިނުމަށް ފަހު ވެންގާ އުފާފާޅުކުރަނީ --
އިނގިރޭސި ޕްރިމިއަރ ލީގު ތާވަލުގެ ފަސް ވަނައިގައި އޮތް މެންޗެސްޓާ ޔުނައިޓެޑާއި ހަ ވަނައިގައި އޮތް އާސެނަލް މިރޭ، 8:00ގައި އެމިރޭޓްސްގައި ބައްދަލުކުރާއިރު، ލީގުގެ ގަދަ ހަތަރަކުން ޖާގައެއް ހޯދުމަށް މި މެޗަކީ މިދެޓީމަށް ވެސް ވަރަށް މުހިއްމު މެޗެކެވެ.
އެއްމެޗު މަދުން ކުޅެ އާސެނަލަށް 60 ޕޮއިންޓު ލިބިފައި ވާއިރު، މެންޗެސްޓާ ޔުނައިޓެޑަށް ލިބިފައި ވަނީ 65 ޕޮއިންޓެވެ.