09 May 2017, 09:04
ސޯޝަލް މީޑިއާ އެކްޓިވިސްޓް އަދި ބްލޮގަރު ޔާމީން ރަޝީދު މަރާލި މައްސަލާއާ ގުޅިގެން އިތުރު ހަތަރު މީހަކު ހައްޔަރުކޮށްފިއެވެ.
އެމައްސަލާގައި މީގެ ކުރިން ދެ މީހަކު ހައްޔަރުކޮށްފައިވާއިރު މިފަހަރު ހައްޔަރު ކުރި ހަތަރު މީހުންނާއެކު އެމައްސަލާގައި ހައްޔަރުކުރި މީހުންގެ އަދަދު 6 އަކަށް އަރައެވެ.
ވަރަށް އިތުބާރު ހިފޭ ފަރާތަކުން ވަނީ އެކަން ސަން އަށް ކަށަވަރުކޮށްދީފައެވެ.
ފަހުން ހައްޔަރުކުރި ހަތަރު މީހުން ހައްޔަރު ކުރި ދުވަހެއް އަދި އެމީހުންގެ ބަންދުގެ މުއްދަތު ނިންމި ގޮތެއް އަދި ސާފެއްނުވެއެވެ.
ޔާމީންގެ މަރާލި މައްސަލައިގެ ތުހުމަތުގެ ފުރަތަމަ ހައްޔަރުކުރީ ގދ. ގައްދުއަށް ނިސްބަތްވާ އުމުރުން 18 އަހަރުގެ މުހައްމަދު ދިފްރާން އެވެ. އޭނާގެ ބަންދަށް ވަނީ 15 ދުވަސް ޖަހާފައެވެ.
ޔާމީން މަރުގެ މައްސަލަ ތަހުގީގް ކުރުމަށް ފުލުހުން އަންނަނީ ބޭރުގެ އެހީތެރިކަންވެސް ހޯދަމުންނެވެ.
ޔާމީން ރަޝީދު މަރާލާފައި އޮއްވާ ފެނުނީ އޭޕެރީލް 22 ވަނަ ދުވަހުގެ ރޭގެ ވަގުތެއްގަ އެވެ.