29 May 2017, 16:52
ވަގަށް ނަގާފައިވާ ސައިކަލެއް ދުއްވި މީހަކު އެއް އަހަރާ 12 ދުވަހަށް ޖަލަށް ލުމަށް ހުކުމް ކޮށްފި އެވެ.
ކްރިމިނަލް ކޯޓުން އިއްޔެ އެ ހުކުމް ކޮށްފައިވަނީ މއ. ހިންނަވަރުހުޅަނގުބައި އަނަސް މުހައްމަދުގެ މައްޗަށެވެ.
އަނަސްގެ މައްޗަށް ދައުލަތުން ދައުވާކޮށްފައިވަނީ، އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ ދައުވާ އެވެ.
އޭނާގެ މައްޗަށް އެ ދައުވާ ކޮށްފައިވަނީ، 2015 ވަނަ އަހަރުގެ އޮކްޓޯބަރު މަހު ގެއްލުނު ސައިކަލެއް، އެ އަހަރުގެ ނޮވެމްބަރު މަހު މާލޭ ހުޅަނގުފަރާތު ބޮޑުތަކުރުފާނު މަގުން އޭނާ އެ ސައިކަލު ދުއްވާފައިދަނިކޮށް ފުލުހުންނަށް ފެނުމާއި ގުޅިގެންނެވެ.
އަނަސް ވަނީ އޭނާއަށް ސައިކަލު ދިނީ އޭނާގެ ރައްޓެއްސެއްކަމަށް ބުނެފައެވެ. އެހެން ނަމަވެސް އޭނާއަށް އެކަން ސާބިތުކޮށްދެވިފައެއް ނުވެ އެވެ.
ދައުވާއާ ގުޅިގެން ކުރިއަށް ގެންދިއަ ޝަރީއަތުގެ މަޖިލީހުގައި އަނަސް ވަނީ އެ ދައުވާއަށް އިއުތިރާފުވެފައެވެ.
އޭނާ ޖަލަށްލުމަށް ހުކުމްކޮށްފައިވަނީ، ގާނޫނުލް އުގޫބާތުގެ 210 ވަނަ މާއްދާގެ (ށ)ގެ ދެ ވަނަ ނަމްބަރާއި 1106 ވަނަ މާއްދާގެ (ށ) އާއި ހަވާލާދީ އެ ގާނޫނުގެ 1002 ވަނަ މާއްދާގެ ދަށުންނެވެ.