30 May 2017, 16:29
ރަމަޟާން މަހާ ދިމާކޮށް އެސްޓީއޯއިން ވިއްކާ އަލުވި އަދި ބިސް، މާލޭގައި ހޯލްސޭލްކުރުން ވަގުތީ ގޮތުން މަޑުޖައްސާލައިފިއެވެ.
ކޮންމެ ރަމަޟާން މަހަކާވެސް ދިމާކޮށް އެސްޓީއޯއިން ރާއްޖެއަށް ފިޔާ، އަލުވި އަދި ބިހުގެ ޝިޕްމެންޓްތަކެއް ގެނެސް، ހެޔޮ އަގުގައި ވިއްކައެވެ. މިއަހަރުގެ ރަމަޟާން މަހަށްވެސް އެތަކެތި ގެނެސް، ހޯލްސޭލްކޮށް އަދި ރީޓެއިލްކޮށް ދިޔައީ ވިއްކަމުންނެވެ.
އެސްޓީއޯގެ ޖެނެރަލް މެނޭޖަރ ޕަބްލިކް ރިލޭޝަންސް މުސްލިހު މަސީހު "ސަން"އަށް ވިދާޅުވި ގޮތުގައި، އެސްޓީއޯއިން ބިހާއި އަލުވި މާލޭގައި ހޯލްސޭލްކުރުން ވަނީ މަޑުޖައްސާލައިފައެވެ.
ސަބަބެއް ކަމަށް އޭނާ ވިދާޅުވީ، އަތޮޅުތެރެއަށް އެތަކެތި ފޮނުވުމުގެ މަސައްކަތް މިވަގުތު ކުރަމުން ދިއުމުންނެވެ.
އެސްޓީއޯއިން އިމްޕޯޓުކުރާ އަލުވި އަދި ބިސް ހޯލްސޭލްކުރުން މާލޭގައި މަޑުޖައްސާލުމާ ގުޅިގެން، ބާޒާރުގައި އެތަކެތީގެ އަގުތައް މިއަދު ވަނީ އުފުލިފައެވެ.
މުސްލިހު ވިދާޅުވި ގޮތުގައި ބިހާއި އަލުވި ހޯލްސޭލްކުރުން މަޑުޖައްސާލި ނަމަވެސް، އެ ދެ ބާވަތްތައް އެސްޓީއޯ ސުޕަމާޓުން ރީޓެއިލްކޮށް ލިބެން ހުންނާނެއެވެ. އަދި ފިޔާ ހޯލްސޭލްކުރުން ހުއްޓާލާފައި ނުވާނެ ކަމަށާއި، އެސްޓީއޯގެ ދެ ނަމްބަރު ކޮށިން ފިޔާ ހޯލްސޭލްކޮށް ގަތުމަށް ލިބެން ހުންނާނެ ކަމަށެވެ.
އެސްޓީއޯއިން ރަމަޟާން މަހަށް ޚާއްސަކޮށް ރާއްޖެ ގެނައި ފިޔާ، އަލުވި އަދި ބިސް ރީޓެއިލްކޮށް ވިއްކުމަށް ކަނޑައެޅި އަގުތަކަކީ ފިޔާ ބަސްތާއެއް 170 ރުފިޔާއަށް، އަލުވި ބަސްތާއެއް 220 ރުފިޔާއަށް، އަދި ބިސް ކޭހެއް 270 ރުފިޔާއަށެވެ.