06 Jun 2017, 11:15
އޭޝިއަން ކަޕް ކޮލިފައިންގައި ބޫޓާނާ ދެކޮޅަށް ކުޅޭ މެޗަށް ތައްޔާރުވުމުގެ ގޮތުން އަފްޣާނިސްތާނާ ދެކޮޅަށް މިރޭ ގައުމުން ބޭރުގައި ރާއްޖެ ކުޅޭ މެޗު ފުޓްބޯޅަ އެސޯސިއޭޝަން އޮފް މޯލްޑިވްސްގެފޭސްބުކް ޕޭޖުން ބެލޭނެ އިންތިޒާމް ހަމަޖައްސައިފިއެވެ.
މިރޭ ދުބާއީގައި ކުޅޭ މެޗު ފަށާނީ ރާއްޖެގަޑިން 22:00 ގައެވެ.
ފުޓްބޯޅައިގައި މި ސަރަހައްދުގެ އެންމެ ވަރުގަދަ ބާރާ ދެކޮޅަށް އެކުވެރިކަމުގެ މެޗެއް ކުޅުމަށް ގައުމީ ޓީމް ދުބާއީއަށް ދިޔައީ އާދީއްތަ ދުވަހުގެ ރެއެވެ.
ދުބާއީއަށް ދިޔުމަށްފަހު ގައުމީ ޓީމުގެ ފަރިތަކުރުންތައް އެގައުމުގައި އިއްޔެ ހަވީރު ފަށާފައިވާއިރު މާލޭގައިވެސް ގައުމީ ޓީމުންވަނީ ފަރިތަކުރުންތައް ކުރިއަށް ގެންގޮސްފައެވެ.
ދުބާއީއަށް ފުރުމުގެ ކުރިން ގައުމީ ޓީމުގެ ކޯޗު ޑަރެން ސްޓެވާޓް ބުނީ އަފްޣާން އަތުން މޮޅުވެވިއްޖެ ނަމަ އެއީ ބޫޓާނާ ދެކޮޅަށް ލިބޭނެ ބޮޑު ހިތް ހަމަޖެހުމެއް ކަމަށާއި އުންމީދަކީ ރަނގަޅު ނަތީޖާއެއް ހޯދުން ކަމަށެވެ.
އޭޝިއަން ކަޕް ކޮލިފައިންގައި ރާއްޖެއިން މިހާތަނަށް އެއް މެޗު ކުޅެފައިވާއިރު ފަލަސްތީން އަތުން ރާއްޖެ ވަނީ އަމިއްލަ ދަނޑުގައި 3-0 ބަލިވެފައެވެ.