12 Jul 2017, 15:28
ފީފާގެ ގަވާއިދާ ހިލާފަށް ފްރާންސްގެ ތަޖުރިބާކާރު ވިންގާ ފްލޮރެންޓް މަލޫޑާ، ގޯލްޑް ކަޕްގައި ފްރެންޗް ގިއާނާ ގައުމީ ޓީމަށް ކުޅެފި އެވެ.
ގޯލްޑް ކަޕްގައި ކެނެޑާއާ ދެކޮޅަށް ފްރެންޗް ގިއާނާ ކުޅުނު މެޗުގައި މަލޫޑާ ނުފެނުނު ނަމަވެސް، އޭނާ ވަނީ ހޮންޑިއުރަސްއާ ދެކޮޅަށް ކުޅުނު މެޗުން ފެނިފަ އެވެ. އެ މެޗުގައި ފްރެންޗް ގިއާނާގެ ކެޕްޓަން ބޭންޑް އަޅައިގެން ކުޅުނީ ވެސް މަލޫޑާ އެވެ.
ފީފާ ގަވާއިދުގައިވާ ގޮތުން، އޮފިޝަލް މުބާރާތެއްގައި ދެ ގައުމަކަށް ނުކުޅެވޭނެ އެވެ. މަލޫޑާއަކީ ފްރާންސް ގައުމީ ޓީމަށް ގިނަ މެޗުތަކެއް ކުޅެފައިވާ ކުޅުންތެރިއެކެވެ. އޭގެ ތެރޭގައި ދެ ވޯލްޑް ކަޕް ހިމެނެ އެވެ.
ހޮންޑިއުރަސްއާ ދެކޮޅަށް ކުޅުނު މެޗު ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވި ނަމަވެސް، އެ މެޗުގައި މަލޫޑާ ކުޅުމާ ގުޅިގެން ގަވާއިދު ބުނާ ގޮތުން 3-0 ލަނޑުގެ ނަތީޖާއަކުން މޮޅުވާނީ ހޮންޑިއުރަސް އެވެ. ފްރެންޗް ގިއާނާއަކީ މަލޫޑާގެ އުފަން ގައުމެވެ.
ފްރެންޗް ގިއާނާއަށް މަލޫޑާ ކުޅުނު މައްސަލައާ ގުޅޭ ގޮތުން އުތުރު އެމެރިކާގެ ފުޓްބޯޅައިގެ މައި އިދާރާއިން ނެރުނު ބަޔާނެއްގައި ބުނެފައި ވަނީ، އެ މައްސަލަ މިހާރު ޑިސިޕްލިނަރީ ކޮމިޓީން ބަލަމުންދާ ކަމަށެވެ.
ލިޔޯން އަދި ޗެލްސީން ކުރިން ފެނިގެން ދިޔަ މަލޫޑާ އެންމެ ފަހުން ކުޅެފައި ވަނީ މިސްރުގެ ވަޑީ ޑެގްލާއަށެވެ. އޭނާ މިދިޔަ އަހަރުގެ ޖެނުއަރީ މަހު އެ ކްލަބާ ގުޅުނީ އިންޑިއާގެ ދިއްލީ ޑައިނަމޯސްއިން ލޯނުގެ ދަށުން ހަ މަސް ދުވަހުގެ މުއްދަތަކަށެވެ.