20 Jul 2017, 17:42
އިދިކޮޅު ފަރާތްތަކުން މިއަދު ރައްޔިތުންގެ މަޖިލީހަށް ވެއްދި، އެޓާނީ ޖެނަރަލް އަލްއުސްތާޒު މުހައްމަދު އަނިލްގެ އިތުބާރު ނެތްކަމުގެ މައްސަލަ ފެއިލް ކޮށްލައި އެނާގެ މަގާމު ދިފާއުކޮށްދޭނެ ކަމަށް ޕީޕީއެމް ޕާލިމެންޓަރީ ގްރޫޕްގެ ލީޑަރު އަހުމަދު ނިހާން ހުސެން މަނިކް ވިދަޅުވެއްޖެއެވެ.
ސައުވީސް މެމްބަރެއްގެ ސޮޔާއެކު އަނިލްގެ އިތުބާރު ނެތްކަމުގެ މައްސަލަ ވެއްދިތާ މާގިނައިރުތަކެއް ނުވެ ނިހާން ކުރެއްވި ޓްވީޓެއްގައި ވިދާޅުވެފައިވަނީ މިހާރު މިހިނގާ 18 ވަނަ ރައްޔިތުންގެ މަޖިލީހުން އަނިލްގެ އިތުބާރު ދަމަހައްޓާނެ ކަމަށެވެ.
މިއީ އިދިކޮޅު ކޯލިޝަނުން ވަޒީރެއްގެ އިތުބާރު ނެތް ކަމުގެ މައްސަލަ ރައްޔިތުންގެ މަޖިލީހަށް ހުށަހެޅި ފުރަތަމަ ފަހަރެވެ.
އިދިކޮޅު ފަރާތްތަކުގެ ފާޑުކިޔުންތައް އަނިލްއަށް އެންމެ ބޮޑަށް އަމާޒުވެގެން ގޮސްފައިވަނީ ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލޭ ގޮތަށް ކަނޑައެޅުމުގެ ދުސްތޫރީ މައްސަލައެއް ސުޕްރީމް ކޯޓަށް ވެއްދި ހިސާބުންނެވެ.
އަނިލްގެ އިތުބާރު ނެތްކަމުގެ މައްސަލަ ވައްދާފައިވާއިރު މަޖިލީހުގެ ރައީސް އަބްދުﷲ މަސީހް ވަކިކުރުމަށް ވެސް އިދިކޮޅު ފަރާތްތަކުން މަޖިލިހަށް ވަނީ ތިން ފަހަރަކު ހުށަހަޅާފައެވެ. އެންމެ ފަހުން 45 މެމްބަރުންގެ ސޮޔާއެކު މި މަހުގެ ތިންވަނަ ދުވަހު މަޖިލިހަށް ވެއްދި އެ މައްސަލަ މަޖިލީހުން ވަނީ ބާތިލްކޮށްފައެވެ. ސަބަބެއް ކަމަށް މަޖިލީހުގެ ނައިބު ރައީސް ރީކޯ މޫސާ މަނިކް ސޮއުކުރައްވައި މެމްބަރުންނަށް ފޮނުވި ސިޓީގައި ވިދާޅުވެފައިވަނީ، އޭގައި ސޮއިކުރެއްވި އެއް މެމްބަރަކު ނަން އަނބުރާ ގެންދެވުމާއި ހަތަރު މެމްބަރެއްގެ ގޮނޑި ގެއްލި، މަޖިލިހުގެ ރައީސްގެ އިތުބާރު ނެތްކަމުގެ މައްސަލަ ހުށަހަޅަން ޖެހޭ އަދަދަށް ވުރެ މެމްބަރުންގެ އަދަދު މަދުވުން ކަމަށެވެ.
ވަޒީރެއްގެ އިތުބާރު ނެތް ކަމުގެ މައްސަލައެއް ރައްޔިތުންގެ މަޖިލީހުން ފާސްކުރިއަސް، އެ ވަޒީރެއްގެ އިތުބާރު ނެތް ކަމަށް ނިންމޭނީ ސުޕްރީމް ކޯޓުން ނިންމުމުން ކަމަށް ސުޕްރީމް ކޯޓުން ވަނީ މީގެކުރިން ހުކުމްކޮށްފައެވެ.