16 Aug 2017, 23:43
ކުޅިވަރުގެ ގައުމީ މަޖިލީސް (ނޭޝަނަލް ސްޕޯޓްސް ކައުންސިލް)ގެ ހުސްވެފައިވާ މަގާމަށް ކުރިމަތިލުމުގެ ފުރުސަތު ހުޅުވާލައިފިއެވެ.
ގައުމީ ކުޅިވަރު އެސޯސިއޭޝަންތަކުން އޮލިމްޕިކް ކުޅިވަރުތައް ތަމްސީލުކުރާ މެންބަރެއްގެ ގޮތުގައި ކުރިން އައްޔަންކުރި މުހައްމަދު އަނީސް (ތަރި އަނީސް) އިސްތިއުފާ ދެއްވުމާ ގުޅިގެން އެ މަގާމު ވަނީ ހުސްވެފައެވެ.
ކުޅިވަރާބެހޭ ވުޒާރާއިން މިއަދު ނެރުނު ސާކިއުލާއެއްގައި ބުނެފައިވާ ގޮތުގައި، އޮލިމްޕިކް ކުޅިވަރުތަކުން އެ މަގާމަށް ހުށަހަޅާ ފަރާތްތަކުގެ މައުލޫމާތު 24 އޯގަސްޓް 2017 ވަނަ ދުވަހުގެ 14:00ގެ ކުރިން އެ ވުޒާރާއަށް ފޮނުވުމަށް އެދޭ ކަމަށެވެ. ކޮންމެ އޮލިމްޕިކް ކުޅިވަރަކުން ވެސް ހުށަހެޅޭނީ އެންމެ ފަރާތެއްގެ ނަމެކެވެ.
މިދިޔަ ހަފްތާ ތެރޭގައި ސްޕޯޓްސް ކައުންސިލްގެ ނައިބު ރައީސްގެ މަގާމު ފުރުއްވަމުން ގެންދެވި ތަރި އަނީސް އިސްތިއުފާ ދެއްވީ އެކަށީގެންވާ ވަގުތު ނުދެވޭތީއާއެކު ކައުންސިލަށް ވަގުތުދެވޭ ގާބީލް ބޭފުޅަކަށް އެ ފުރުސަތު ދިނުމުގެ މަގްސަދުގައި ކަމަށް ވިދާޅުވެއެވެ.
ސްޕޯޓްސް ކައުންސިލް އެކުލެވެނީ 11 މެންބަރުންގެ މައްޗަށެވެ. ކައުންސިލްގައި ހިމެނެނީ ކުޅިވަރާބެހޭ ވުޒާރާއިން މިނިސްޓަރު އައްޔަންކުރައްވާ ދެ މެންބަރުންނާއި، ކުޅިވަރާބެހޭ ވަޒީރު އައްޔަންކުރައްވާ އަންހެން ދެ މެންބަރުންނާއި، ކުޅިވަރާބެހޭ ވަޒީރު އައްޔަންކުރައްވާ ގާނޫނީ ވަކީލަކާއި، އެޑިއުކޭޝަން މިނިސްޓްރީ ތަމްސީލް ކުރުމަށް އެ ވުޒާރާގެ ވަޒީރު އައްޔަންކުރައްވާ މެންބަރަކާއި، ގައުމީ ކުޅިވަރު އެސޯސިއޭޝަންތަކުން އޮލިމްޕިކް ކުޅިވަރުތައް ތަމްސީލް ކުރުމަށް ދެ މެންބަރުންނާއި ނޮން އޮލިމްޕިކް ކުޅިވަރުތައް ތަމްސީލް ކުރުމަށް ދެ މެންބަރުން އަދި މޯލްޑިވްސް އޮލިމްޕިކް ކޮމިޓީގެ ހިންގާ ކޮމިޓީން ކަނޑައަޅާ މެންބަރެކެވެ.
ސްޕޯޓްސް ކައުންސިލްގެ މައިގަނޑު މަސައްކަތަކީ ކުޅިވަރު އެސޯސިއޭޝަންތަކާ ގުޅޭ ކަންކަން ބެލެހެއްޓުމާއި އެތުލީޓުން ކުރިއަރުވައި ތަރައްގީކުރަން މަސައްކަތް ކުރުމެވެ.