25 Aug 2017, 18:17
ހައްޖު ކޯޕަރޭޝަނަށް ފަހުން ލިބުނު ކޯޓާގައި އިތުރު 300 މީހަކު ފެށޭ އާދިއްތަ ދުވަހު ހައްޖުގެ އަޅުކަމަށް ފުރަން ތައްޔާރުވެއްޖެ ކަމަށް ހައްޖު ކޯޕަރޭޝަނުން ބުނެފި އެވެ.
ވޭތުވެދިޔަ ހަފްތާގައި ސައުދި އަރަބިއާއިން ރާއްޖެއަށް އިތުރު 1000 ކޯޓާ ވަނީ ދީފަ އެވެ. އޭގެތެރެއިން 500 ކޯޓާ ދީފައިވާ ހައްޖު ކޯޕަރޭޝަނަށެވެ.
މިވަގުތު މައްކާގައި ހުންނަވާ 'ސަން' އަށް ވާހަކަފުޅު ދައްކަވަމުން ހައްޖު ކޯޕަރޭޝަންގެ އެމްޑީ ޔާމީން އިދުރީސް ވިދާޅުވީ ނަން ނޯޓް ކުރަން ހުޅުވާލި ފުރުސަތުގައި ނަންނޯޓް ކޮށްފައިވަނީ 300 މީހުން ކަމަށާއި އެހުރިހާ ފަރާތްތަކަށްވެސް ފުރުސަތު ދީފައިވާ ކަމަށެވެ.
އަދި އެބޭފުޅުން އާދިއްތަ ދުވަހު ހައްޖުގެ އަޅުކަމަށް ފުރާނެ ކަމަށްވެސް ޔާމީން ވިދާޅުވި އެވެ.
އެންމެ ފުރަތަމަ އެބޭފުޅުން ވަޑައިގެން އުމުރާއެއް ކުރެއްވުމަށް ފަހު ދެން ވަޑައިގަންނަވަނީ ސީދާ ހައްޖުގެ އަޅުކަަމަށް މައްކާއަށް ކަމަށާއި ހައްޖުގެ އަޅުކަމަށް ފަހު ދެން މަދީނާއަށް ވަޑައިގަތުމަށް ހަމަޖެހިފައިވާ ކަމަށް ޔާމީން ވިދާޅުވި އެވެ.
މިއަހަރުގެ ފުރަތަމަ ބުރުގައި ހައްޖު ކޯޕަރޭޝަނުގެ ހަވާލުގައި 694 މީހަކު ވަނީ ހައްޖަށް ގޮސްފަ އެވެ. އަދި އެހުރިހާ ހައްޖާޖީންގެ ހާލުވެސް ރަނގަޅު ކަމަށް ޔާމީން ވިދާޅުވި އެވެ.