10 Sep 2017, 18:55
ހާލުގައިޖެހިފައިވާ މިއަންމާގެ ރޮހިންްޔާ މުސްލިމުންނަށް އެހީވުމަށްޓަކައި ހާއްސަ ކޮމެޓީއެއް އެކުލަވައިލައި ހާއްސަ ހަރަތާކްތަކެއް ކުރިއަށް ގެންދިޔުމަށް ސަރުކާރުން ނިންމައިފިއެވެ.
ރޮހިންޔާ މުސްލިމުންނާއެކު ދިވެހިން ތިބިކަން އަންގައި ދިނުމަށް ހިންގުމަށް ހަމަޖެހިފައިވާ ހަރަކާތްތަކާ ބެހޭ ގޮތުން ދަރުބާރުގޭގައި މިއަދު ބޭއްވި ކޮންފަރެންސްގައި ވާހަކަ ދައްވަމުން ޑިފެންސް މިނިސްޓަރު އާދަމް ޝަރީފު ވިދާޅުވީ ރޮހިންޔާ މުސްލިުންނަށް އެހީވުމަށް އަމިއްލަ ފަރާތްތަކުން ކުރަމުންގެންދާ މަސައްކަތްތައް ވިލަރެސްކޮށް އެ ފަރާތްތަކަށް އިދާރީ އެހީތެރިކަން ފޯރުކޮށްދިނުމަށް އެކޮމެޓީން މަސައްކަތް ކުރާނެއެވެ.
މިޔަންމާ ރައްޔިތުންނަށް ފޯރުކޮށްދިނުމަށް ލިބޭ އެހީތައް އެ ފަރާތްތަކަށް ރައްދުކޮށްދިނުން ކަށަވަރު ކުރުންވެސް އެކޮމެޓީގެ މަސައްކަތްތަކުގެ ތެރޭގައި ހިމެނޭކަމަށް ޝަރީފު ވިދާޅުވިއެވެ.
ރޮހިންޔާ މުސްލިމުންނަށް އެހީވުމަށް ސަރުކާރުން އުފެއްދި ކޮމިޓީގައި އެންމެ އިސްކޮށް ޑިފެންސް މިނިސްޓަރު އާދަމް ޝަރީފް ހިމެނިވަޑައިގަންނަވާ އިރު އިސްލާމިކް މިނިސްޓަރު ޑރ. އަހުމަދު ޒިޔާދާއި ހޯމް މިނިސްޓްރީ އާއި ޖެންޑާ މިނިސްޓްރީ އާއި ޑިޒާސްޓާ މެނޭޖްމަންޓް އަދި ދައުލަތުގެ މީޑިއާ ޕީއެސްއެމްގެ އިސްވެރިޔަކު ހިމެނެ އެވެ
ޝަރީފު ވިދާޅުވީ ރޮހިންޔާ މުސްލިމުންނަށް އެހީވުމަށް ބޭނުންވާ ފަރާތްތަކަށް އެހީދިނުމަށް މަގުފަހިކުރުމުގެ ގޮތުން ބޭންކް އޮފް މޯލްޑިވްސް އަދި އިސްލާމިކް ބޭންކުގައި ވެސް އެކައުންޓެއް ހުޅުވުމަށް މަސައްކަތް ކުރަމުންދާކަމަށެވެ.
އޭގެ އިތުރުން މޮބައިލް މެދުވެރިކޮށް އެހީގެ ގޮތުގައި ފައިސާ ފޮނުވޭނެ ގޮަތްތައް ހަމަޖެއްސުމަށް މަސައްކަތް ކުރަމުންދާ ކަމަށެވެ. އަދި މިޔަންމާއަށް އެހީ ފޯރުކޮށްދިނުމުގައި ބޮޑަށް އިސްކަންދެނީ ފައިސާއިން އެހީ ފޯރުކޮށްދިނުމަށް ކަމަށް ވެސް ޝަރީފު ވިދާޅުވިއެވެ.
ރޮހިންޔާ މުސްލިމުންނަށް އެހީވުމަށްޓަކައި ތަފާތު ޓާސްކުފޯސްތަކެއް އުފައްދައިފައިވާ ކަމަށް ވެސް މިއަދުގެ ބައްދަލުވުމުގައި ޝަރީފު ވިދާޅުވިއެވެ.އެގޮތުން މިމަހުގެ 21 އިން 23 އަށް ހާއްސަ ޓެލެތޯނެއް ބޭއްވުމަށް ހަމަޖެހިފައިވާއިރު އެކަމަށްވެސް ވަކީ ހާއްސަ ޓާސްކު ފޯހެއް އެކުލައިވައިލައިފައިވާ ކަމަށް ވެސް ޝަރީފު ވިދާޅުވިއެވެ.
އޭގެ އިތުރުން އަތުޅުތަކުގައި ފައިސާ ޖަމާކުރައްވަން ބޭނުންވާ ފަރާތްތަކަށް އެ ފުރުސަތު ދިނުމުގެ ގޮތުން އެކި މުއައްސަސާތަކާ ގުޅިގެން އެކަން ކުރުމަށް ވެސް ވަކި ހާއްސަ ޓާސްކު ފޯހެއް އެކުލަވައިލައިފައިވާ ކަމަށް ވެސް ޝަރީފު ވިދާޅުވިއެވެ.
މިއަދުގެ ބައްދަލުވުމުގައި ޝަރީފު ވިދާޅުވީ އަމިއްލަ ފާރަތްތަކުން އެކިއެކި އިޖުތިމާއީ އިގްތިސާދީ މަސައްކަތް ކުރައްވައިގެން ލިބޭ ފައިސާއިން އެހީތެރިކަން ދޭން ބޭނުންނަމަ އެ ފުރުސަތު ވެސް އެބައޮތެވެ.
ރޮހިންޔާ މުސްލިމުންނަށް އެހީވާން ބޭނުންވާ ފަރާތްތަކަށް 1440 ނަންބަރުން ގުޅޭ ހާއްސަ ހޮޓް ލައިނެއް ވަނީ ތައާރަފްކޮށްފަ އެވެ.