11 Sep 2017, 10:11
ރިޔާޒް (ސެޕްޓެމްބަރު 11) :ސައޫދީ އަރަބިޔާގެ ސަލާމަތީ ބާރުތަކުން އެ ގައުމުގެ ނަން މަޝްހޫރު އިސްލާމީ ބައެއް އިލްމުވެރިން ހައްޔަރުކޮށްފި ކަމަށް ޚަބަރު ލިބިއްޖެ އެވެ.
ހައްޔަރުކުރި އިސްލާމީ ދާއިޔާ އިން ނުވަތަ އިލްމުވެރިންގެ ތެރޭގައި ޝައިޚް ސަލްމާން އަލްޢަވްދާއާއި ޝައިޚް ޢިވަޟުލްގިރްނީ އާއި ޝައިޚް އަލީ އަލްޢުމްރީ ހިމެނިވަޑައިގަންނަވަ އެވެ. މި ބޭފުޅުންގެ އާއިލާތަކުން ވަނީ ސައޫދީ ސަލާމަތީ ބާރުތަކުގެ ބެލުމުގެ ދަށުގައި އެބޭފުޅުން ވާކަން ކަށަވަރުކޮށްދީފަ އެވެ. ނަމަވެސް އެބޭފުޅުން ހައްޔަރުކުރިކަން ސައޫދީ ސަލާމަތީ ބާރުތަކުން ވެސް އަދި ސައޫދީ ސަރުކާރުގެ މަސްއޫލުވެރިއަކު ވެސް ހާމަކުރައްވާފައެއް ނުވެ އެވެ.
މިޚަބަރު އެންމެ ފުރަތަމަ ފަތުރާފައި ވަނީ ސައޫދީ ޓުވިޓަރުންނެވެ. އެއަށް ފަހު އަރަބި މީޑީއާތަކުގައި ވެސް ވަނީ މިޚަބަރު ފެތުރިގެން ގޮސްފަ އެވެ. މީޑިއާގައިވާ ރިޕޯޓްތައް ބުނާ ގޮތުން ޝައިޚް ސަލްމާން އަލްޢަވްދާއާއި ޢިވަޟުލްގިރްނީ ޝައިޚް އަލީ އަލްޢުމްރީ ހައްޔަރުކުރީ ގަތަރަށް ހަމްދަރްދީ ވާކަމަށް ތުހުމަތު ކުރެވިގެންނެވެ. ނުސީދާ ގޮތަކަށް މިފަދަ އިހްސާސެއް ކުރެވޭ ގޮތަކަށް އޭނާ ދާދިފަހުން ޓުވީޓެއް ކުރައްވާފައިވެ އެވެ.
ސައޫދީ އާއި ގަތަރާ ދެމެދު މައްސަލަޖެހިފައިވާ މިދުވަސްވަރު ގަތަރަށް ނުސީދާ ގޮތެއްގައި ވެސް ހަމްދަރްދީ ފާޅުވާ ފަދަ ގޮތަކަށް ވާހަކަ ދެއްކުމަކީ ނޫނީ ޓުވީޓް ކުރުމަކީ ގައުމަށް ޚިޔަނާތްތެރިވެ ޖަމާއަތުން ބޭރުވެގަތުންކަމަށް ބުނެ ސައޫދީ ރަސްމީ މިޑިއާ އިން ޕްރޮޕަގެންޑާތައް ފަތުރަމުން ގެންދެ އެވެ. މީގެއިތުރުން ސައޫދީން ޓެރަރިސްޓް ޖަމާއަތެއްގެ ގޮތުގައި ބަލާ "އިޚްވާނުލްމުސްލިމޫން" ޖަމާއަތުގެ ފިކުރަށް އެތިން ދާއިޔާ އިން ތާއީދުކުރާ ކަމުގެ ޚަބަރުތަކެއް ވެސްވަނީ ފެންމަތިވެފަ އެވެ.
ޝައިޚް ސަލްމާން އަލްޢަވްދާއަކީ ސައޫދީގައި އޮންނަ ސަލަފީ ފިކުރުގެ ގިނައިލްމުވެރިންނަށް ވުރެ ދީނީ ކަންކަމުގައި މެދުމިނުގެ ވިސްނުން ގެންގުޅުއްވާ ތަނަވަސް ވިސްނުމުގެ ބޭފުޅެކެވެ. އޭނާއަކީ ސައޫދީ ގިނަ އިލްމުވެރިންނާ ފިގްހީ ކަންކަމުގައި ޚިޔާލު ތަފާތު އަދި އޯޕަން މައިންޑެޑް ބޭފުޅެކެވެ. މިގޮތުން މިޔުޒިކާއި ލަވައާ މެދުވެސް ޝައިޚް ސަލްމާން އަލްޢަވްދާ ދެކެވަޑައިގަންނަވާގޮތް ސައޫދީ ސަލަފީ ފިކުރުގެ އިލްމުވެރިންނާ ވަރަށް ބޮޑަށް ތަފާތެވެ.