14 Sep 2017, 09:45
ކުއަލަލަމްޕޫރު (ސެޕްޓެމްބަރު 14): މެލޭޝިއާގެ ވެރިރަށް ކުއަލަލަމްޕޫރުގެ ސްކޫލެއްގައި މިއަދު ރޯވުމުގެ ސަބަބުން 25 މީހަކު މަރުވެއްޖެ އެވެ.
ކުއަލަލަމްޕޫރުގެ ފަޔާ އެންޑް ރެސްކިއު ޑިޕާޓްމެންޓުގެ ޑިރެކްޓަރު ޚިރުއްދީން ރަހްމާން ވިދާޅުވި ގޮތުގައި ރޭގެ ފަތިހުގެ ވަގުތެއްގައި އަލިފާން ރޯވީ ތަހްފީޒް ދާރުލް ގުރުއާން އިއްތިފާގިއްޔާ ސްކޫލުގެ މަތީ ފަންގިފިލާގަ އެވެ. އަދި އެއީ އެ ސްކޫލަށްދާ ކުދިން ބޭނުން ކުރާ ފަންގިފިލާ ކަމަށާއި އެ ހާދިސާގައި މަރުވީ ފުރާވަރުގެ 23 ކުދިންނާއި، ދެ ސުޕަވައިޒަރުން ކަމަށް ރަހްމާން ވިދާޅުވި އެވެ.
އޭނާ އިތުރަށް ވިދާޅުވި ގޮތުގައި އެއީ ފާއިތުވި 20 އަހަރު ތެރޭގައި އެ ގައުމުގައި ހިނގި އެންމެ ނުރައްކާތެރި އެއް އަލިފާނުގެ ހާދިސާ އެވެ.
މެލޭޝިއާގެ ބޮޑުވަޒީރު ނަޖީބް ރައްޒާގު ވަނީ އެ ހާދިސާގައި މަރުވި މީހުންގެ އާއިލާއަށް ހަމްދަރުދީގެ މެސެޖެއް ފޮނުއްވައިފަ އެވެ. އަދި އެ ގައުމުގެ ސަރުކާރުން ވަނީ "މުސްތަގުބަލުގައި އެފަދަ ހާދިސާއެއް ނުހިނގާނެކަން ޔަގީން ކުރުމަށް"، މިއަދު ސްކޫލުގައި ހިނގި ހާދިސާ ތަހުގީގު ކުރަން ގޮވާލައިފަ އެވެ.(ބީބީސީ)