20 Sep 2017, 09:24
އިމާދުއްދީން ސްކޫލުން މިދިޔަ އަހަރު ހުރިހާ ގޮތަކުން އެންމެ މޮޅު ދަރިވަރަކަށް އައިޝަތު އަލްހާން ޝާހީން ހޮވިއްޖެއެވެ.
މިދިޔަ އަހަރު އިމާދުއްދީން ސްކޫލުގެ ޑެޕީއުޓީ ކެޕްޓަންގެ މަގާމުގައި ހުރި އައިޝަތުއަކީ 2016 ވަނަ އަހަރު ޖީސީއީއޯލެވަލްގެ ގަދަ ދިހައެއްގައި ވެސް ހިމެނުނު ދަރިވަރެކެެވެ. އިމާދުއްދީން ސްކޫލުގެ އެކިއެކި ކްލަބްތަކުގައި ހަރަކާތްތެރިވެފައިވާ އައިޝަތުއަކީ 2015 ވަނަ އަހަރު އެ ސްކޫލްގެ ޔާގޫތު ހައުސްގެ ޑެޕިއުޓީ ކެޕްޓަން ވެސް މެެއެވެ.
އޭގެ އިތުރުން ސްކޫލުން ހިންގާ އަހަރީ ގުރުއާން މުބާރާތްތަކުގައި ރަންވަނަތަކެއް ހާސިލްކޮށްފައިވާއިރު އައިޝަތުވަނީ ވާހަކަދެއްކުމުގެ މުބާރާތްތަކުގައިވެސް އެތައް ފަހަރަކު ބައިވެރިވެފައެވެ.
އިމާދުއްދީން ސްކޫލުގެ މިދިޔަ އަހަރުގެ ދެވަނައަށް އެންމެ މޮޅު ދަރިވަރަކަށް ހޮވުނު އައިމިނަތު ޒާހް ޝަރީފް އަށް ޑރ. ހުސައިން ފާއިޒް އިނާމުތައް ހަވާލުކޮށްދެއްވަނީ --- ސަން ފޮޓޯ/ ފަޔާޒު މޫސާ
އިމާދުއްދީން ސްކޫލުގެ ހޯލުގައި ރޭ ބޭއްވި އެ ސްކޫލުގެ މިދިޔަ އަހަރުގެ އަހަރީ އިނާމު ދިނުމުގެ ޖަލްސާގައި އައިޝަތަށް އެވޯޑްތައް ހަވާލުކޮށް ދެއްވީ، ރަސްމިއްޔާތުގެ ޝަރަފްވެރި މެހްމާން ރައީސުލްޖުމްހޫރިއްޔާގެ އޮފީހުގެ އަންޑަ ސެކްރެޓަރީ ޑރ. ހުސައިން ފާއިޒްއެވެ.
ރައީސުލްޖުމްހޫރިއްޔާ ދެއްވާ ޚާއްސަ އިނާމާއި އެޑިއުކޭޝަން މިނިސްޓްރީން ދޭ ޚާއްސަ އިނާމު އަދި ޕާކިސްތާނު އެމްބަސީން ދޭ ލެޕްޓޮޕްގެ އިތުރުން އިމާދުއްދީން ސްކޫލުގެ ޕޭރަންޓް ޓީޗާ އެސޯސިއޭޝަން (ޕީޓީއޭ) އިން ދޭ ޚާއްސަ އިނާމުވެވެސް ރޭގެ ޖަލްސާގައި އައިޝަތުއަށް ވަނީ އަރުވައިފައެވެ.
އިމާދުއްދީންސްކޫލުގެ މިދިޔަ އަހަރުގެ ތިންވަނައަށް އެންމެ މޮޅު ދަރިވަރަކަށް ހޮވުނު އަހުމަދު ޖުމާން އިބްރާހިމް އަށް ޑރ. ހުސައިން ފާއިޒް އިނާމުތައް ހަވާލުކޮށްދެއްވަނީ --- ސަން ފޮޓޯ/ ފަޔާޒު މޫސާ
މިދިޔަ އަހަރު އިމާދުއްދީން ސްކޫލުން ހުރިހާ ގޮތަކުން ދެ ވަނައަށް ހޮވިފައި ވަނީ އައިމިނަތު ޒާހް ޝަރީފެެވެ. އަދި ތިން ވަނައަށް ހޮވިފައި ވަނީ އަހުމަދު ޖުމާން އިބްރާހިމްއެވެ.
އިމާދުއްދީން ސްކޫލުގެ މިދިޔަ އަހަރުގެ އެެންމެ މުޅޮ ތިން ދަރިވަރުންނާއެކު ޑރ. ހުސައިން ފާއިޒު ފޮޓޯއަކަށް ހުއްޓިލައިގެން - ސަން ފޮޓޯ/ ފަޔާޒު މޫސާ
ރޭގެ ރަސްމިއްޔާތުގައި ވާހަކަދައްކަވަމުން ޝަރަފުވެރިމެހުމާނު ޑރ. ފާއިޒު ވަނީ ކޮންމެ ދަރިވަރަކީވެސް ރައްޖޭގެ ކޮންމެ ރައްޔިތަކަށް ހީވާގިކަމާއެކު ޚިދުމަތް ކުރުމުގެ އަޒުމް ކަނޑައަޅާ ދަރިވަރަކަށްވުމަށް އިލްތިމާސް ކުރައްވައިފައެވެ.
އަދި އެކުއްޖަކު އުޅެބޮޑުވި މުޖުތަމައުން ކޮށްދީނީ ކޮންކަމެއްތޯ ނުބަލައި މުޖުތަމައަށް އެކުދިންނަށް ކޮށްދެވޭނީ ކޮންކަމެއްތޯ ބަލައި ފިކުރުކުރުމަށް ވެސް ޑރ. ފާއިޒު ވަނީ އިލްތިމާސްކުރައްވާފައެވެ.