08 Oct 2017, 12:15
ލ. މާބައިދޫގައި ހުރި ތެޔޮ ރައްކާ ކުރާ ގުދަނެއްގައި ރޯވެފައިހުރި އަލިފާންގަނޑު އެމްއެންޑީއެފްގެ ފަޔާ ފައިޓަރުން ފޯމް ބޭނުންކޮށްގެން ކޮންޓްރޯލް ކޮށްފިއެވެ.
އެމްއެންޑީއެފްގެ އިންފޮމޭޝަން އޮފިސަރު ކެޕްޓަން އިބްރާހިމް އާޒިމް ވިދާޅުވީ އެ ހާދިސާގެ މައުލޫމާތު ރިޕޯޓްކޮށްފައި ވަނީ މިއަދު 11:45 ގައި ކަމަށާއި އެ ސަރަހައްދުގައި ސެންޓްރަލް އޭރިއާގެ ސިފައިން ހަރަކާތްތެރިވަމުން އަންނަ ކަމަށެވެ.
އެމްއެންޑީއެފުން ބުނީ ރޯވި އަލިފާންގަނޑު ކޮންޓްރޯލް ކުރެވިފައިވަނީ 12:40 އެހާއިރު ކަމަށާއި އަލިފާން ގަނޑު ކޮންޓްރޯލް ކުރުމަށް ބޭނުންކޮށްފައިވަނީ ފޯމް ކަމަށެވެ.
މާބައިދޫ ކައުންސިލްގެ ރައީސް އަލީ ފައިސަލް ވިދާޅުވީ ފުރަތަމަ އަލިފާން ރޯވީ ތެޔޮ ގުދަނުގައި ކަމަށެވެ. އެއަށްފަހު އެ އަލިފާންގަނޑު ފެތުރިގެންގޮސް ތެޔޮ ގުދަނުގެ ފަހަތުގައި ހުރި ކާޑު ގުދަނަކާއި ޖެހިގެން ހުރި ރީޓެއިލް ފިހާރައިގައި ވެސް އަލިފާނުގެ އަސަރުކޮށް ބޮޑެތި ގެއްލުންތަކެއް ލިބިފައިވާ ކަމަށެވެ.
މާބައިދޫ ތޮޔެ ގުދަނެއްގައި ރޯވި އަލިފާން ގަނޑު ކޮންޓްރޯލް ކޮށްފައި ---
އެމްއެންޑީއެފުން އެ ރަށަށް ދިޔުމުގެ ކުރިން ރޯވެފައިވާ އަލިފާންގަނޑު ނިއްވާލުމަށްޓަކައި ރަށުގެ ރައްޔިތުން ވަނީ ކައިރި ގެތަކުން ފެން ހޮޅިތައް ގުޅައިގެން ފެން ޖަހާފައެވެ. އަދި ވެލި ޖަހައިގެން ވެސް އަލިފާން ގަނޑު ކޮންޓްރޯލް ކުރުމުގެ މަސަތްކަތް ވަނީ ކޮށްފައެވެ.
އަލިފާނުގެ ހާދިސާގައި ތެޔޮ ރައްކާކޮށްފައި ހުރި އެ ގުދަން އެއްކޮށްހެން އަދާ ހުލިވެފައިވާއިރު ކައިރި ހުރި ގެތަކާއި ފިހާރަތަކުން ވަނީ އަލިފާން ގަނޑު ފެތުރިދާނެ ކަމުގެ ބިރަށްޓަކައި ބައެއް ތަކެތި ރައްކާތެރި ހިސާބްތަކަށް ގެންގޮސްފައެވެ.