14 Oct 2017, 10:57
މި އަހަރުގެ ބައިނަލް އަގްވާމީ ދޮށީ އުމުރުގެ މީހުންގެ ދުވަސް ފާހަގަ ކުރުމުގެ ގޮތުން ޅ. އަތޮޅު ހޮސްޕިޓަލުން އިސްނަގައިގެން ނައިފަރުގައި ގާއިމު ވެފައިވާ މުއައްސަސާ އަދި ކްލަބް ޖަމްއިއްޔާތައް ގުޅިގެން ކުލަގަދަ ގޮތެއްގައި "އިސް ރަށްވެހިންގެ ޢާއިލީ ހަވީރު 2017"ގެ ނަމުގައި ހަވީރެއް ބާއްވައި އެ ދުވަސް ފާހަގަ ކޮށްފި އެވެ.
ޅ. ނައިފަރުގައި ބޭއްވި ޢާއިލީ ހަވީރު ހުޅުއްވައި ދެއްވީ ނައިފަރުގައި މިވަގުތު ދިރިއުޅޭ ބައެއް އިސް ރަށްވެހިންގެ ޚާއްޞަ ބޭފުޅުންކޮޅެއް ހިމެނޭ ޓީމަކުން ކަމަށް އެ އަތޮޅު ހޮސްޕިޓަލުން މިއަދު ބުންޏެވެ.
އުމުރުން ދުވަސްވީ މީހުންގެ ދުވަހަކީ ކޮންމެ އަހަރެއްގެ ވެސް އޮކްޓޫބަރު މަހުގެ ފުރަތަމަ ދުވަހެވެ.
ޅ. ނައިފަރުގައި ބޭއްވި އިސް ރަށްވެހިންގެ ޢާއިލީ ހަވީރުގެ ތެރެއިން -- ފޮޓޯ/ޅ. އަތޮޅު ހޮސްޕިޓަލް
އެ ހޮސްޕިޓަލުން ބުނީ، އާއިލީ ހަވީރުގައި ކުރިއަށް ގެންދިޔަ ޙަރަކާތްތަކަކީ ދުވަސްވީ މީހުންނަށާއި އެފަރާތްތަކުގެ ބެލެނިވެރިންނަށް އަދި ކުޑަކުދިންނަށް ވެސް ބައިވެރިވެވޭ ފަދަ ގޮތަކަށް އިންތިޒާމްކޮށްގެން ކުރިއަށް ގެންދިޔަ ހަވީރެއް ކަމަށެވެ.
އެ ހަވީރުގައި އިސް ރަށްވެހިންގެ މެޑިކަލް ޗެކަޕް ހަދައިދިނުން، ބަރުދަން ބެލުން، ޕްރެޝަރު ޗެކްކުރުން، އުމުރުން ދުވަސް ވުމުން ކުރެވިދާނެ ބައެއް ކަސްރަތުތައް ބުނެދިނުން، އަދި ޞިއްޙީ ގޮތުން ވިސްނުން ގެންގުޅެން ޖެހޭ މުހިއްމު ކަންކަމުގެ މަޢުލޫމާތު ޑޮކްޓަރުންނާ ބައްދަލުކޮށް، އެފަރާތްތަކަށް ފޯރުކޮށްދިނުން ފަދަ މުހިއްމު މަޢުލޫމާތުތައް ހޯދައި އެފަރާތްތަކާ ހިއްސާކޮށްފައިވާ ނެކަމަށް ހޮސްޕިޓަލުން ބުންޏެވެ.
ޅ. ނައިފަރުގައި ބޭއްވި އިސް ރަށްވެހިންގެ ޢާއިލީ ހަވީރުގެ ތެރެއިން -- ފޮޓޯ/ޅ. އަތޮޅު ހޮސްޕިޓަލް
އޭގެ އިތުރުން މުނިފޫހި ފިލުވުމުގެ ގޮތުން ތަފާތު ކުޅިވަރުތައް ހުރިހާ އުމުރު ފުރާއަކަށް ވެސް ބައިވެރިވެވޭ ގޮތަށް އިންތިޒާމް ކޮށްގެން ބޭއްވި ކަމަށް އެ ހޮސްޕިޓަލުން ބުންޏެވެ.
ޅ. އަތޮޅު ހޮސްޕިޓަލްގެ މެނޭޖަރު އަޙްމަދު ސާޖިދު ވިދާޅުވީ، އިސް ރަށްވެހިންގެ އާއިލީ ހަވީރުގެ އެންމެ ބޮޑު އެއް މަގުސަދަކީ ދޮށީއުމުރުގެ މީހުންނަކީ މުޖުތަމައުގައި އަޅާލުމާއި ލޯބި ލިބިފައިވާ ޚާއްސަ ބައެއްކަން ހާމަކޮށްދީ އުފާވެރި މާޙައުލަކުން އެންމެން ބައްދަލު ކުރުން ކަމަށެވެ.
ޅ. ނައިފަރުގައި ބޭއްވި އިސް ރަށްވެހިންގެ ޢާއިލީ ހަވީރުގެ ތެރެއިން -- ފޮޓޯ/ޅ. އަތޮޅު ހޮސްޕިޓަލް
ބައިނަލްއަގްވާމީ ދޮށީ އުމުރުގެ މީހުންގެ ދުވަހުގެ މުނާސަބަތުގައި އދ. އިން މި އަހަރަށް ކަނޑައަޅާފައިވާ ޝިއާރާ ގުޅުވައިގެން އެފަރާތްތަކުގެ ހުނަރުވެރިކަމާއި ފަންނުވެރިކަން ދައްކުވައިދީ، ތަޖުރިބާކޮށް، އިޖުތިމާއީ ކަންކަމުގައި އެފަރާތްތައް ބައިވެރިވުން އިތުރުކުރުން ވެސް އެ ހަރަކާތުގެ މަގްސަދުތަކުގެ ތެރޭގައި ހިމެނޭ ކަމަށް ސާޖިދު ވިދާޅުވި އެވެ.
ޅ. ނައިފަރުގައި ބޭއްވި އިސް ރަށްވެހިންގެ ޢާއިލީ ހަވީރުގައި އިސް ރައްވެއްސެއްގެ އުފަންދުވަހުގެ ކޭކް ފަޅަނީ -- ފޮޓޯ/ޅ. އަތޮޅު ހޮސްޕިޓަލް
ނައިފަރު މަދްރަސަތުލް އިފްތިތާހުގެ ޖަލާލުއްދީން މާލަން އަދި ސްކޫލު ގޯތިތެރޭގައި ބޭއްވި އެ ހަވީރުގައި 500 އަށް ވުރެ ގިނަ ރަށްވެހިން ބައިވެރިވި ކަމަށް ޅ. އަތޮޅު ހޮސްޕިޓަލުން ބުންޏެވެ. އަދި އެ ހަރަކާތް ކުރިއަށް ގެންދިއުމުގައި ނައިފަރުގައި ގާއިމްވެފައިވާ މުއައްސަސާ އަދި ކްލަބް ޖަމިއްޔާތަކުން ޖުމްލަ 14 ފަރާތަކުން ބައިވެރިވެ ދެއްވި އެހީތެރިކަމާ އެއްބާރުލުމަށް އެ ހޮސްޕިޓަލުން ޝުކުރު އަދާކުރެއްވި އެވެ.