19 Oct 2017, 16:37
ބ. ހިތާދޫ ބަލިކޮށް، ތ. ތިމަރަފުށިން ގޯލްޑަން ފުޓްސަލް ޝީލްޑް އުފުލާލައިފިއެވެ.
ގޯލްޑަން ފުޓްސަލް ޗެލެންޖް 2017 ފެށުމުގެ ގޮތުން ރޭ މާފަންނު ވެލިދަނޑުގައި ކުޅުނު ގޯލްޑަން ފުޓްސަލް ޝީލްޑް މެޗު ކާމިޔާބުކުރި ތިމަރަފުށްޓަކީ މިދިޔަ އަހަރުގެ ގޯލްޑަން ފުޓްސަލް ޗެލެންޖްގެ ޗެމްޕިއަނުންނެވެ. އަދި ހިތާދޫއަކީ މިދިޔަ އަހަރުގެ އައިލެންޑް ކަޕްގެ ޗެމްޕިއަންކަން ހޯދައި، މިއަހަރުގެ އައިލެންޑް ކަޕްގެ ރަނަރަޕްކަން ހޯދި ޓީމެވެ. މިދިޔަ އަހަރުގެ އައިލެންޑް ކަޕްގެ ޗެމްޕިއަންކަން ހިތާދޫން ހޯދީ އެ މުބާރާތުގެ ފައިނަލުގައި ތިމަރަފުށި ބަލިކޮށްގެންނެވެ.
ގޯލްޑަން ފުޓްސަލް ޝީލްޑް ކާމިޔާބުކުރި ތ. ތިމަރަފުށި: އެ ޓީމުން ޝީލްޑް އުފުލައިލީ 4-3 ލަނޑުން ބ. ހިތާދޫ ބަލިކޮށްގެން --- ފޮޓޯ/ ގޯލްޑަން ފުޓްސަލް އެސޯސިއޭޝަން
ގޯލްޑަން ފުޓްސަލް ޝީލްޑް މެޗުގައި ހިތާދޫގެ މައްޗަށް ތިމަރަފުށިން ކުރި ހޯދާފައިވަނީ 4-3 ލަނޑުގެ ނަތީޖާއަކުންނެވެ. އެ މެޗުގައި ތިމަރަފުށިން ކާމިޔާބުކުރި ހަތަރު ލަނޑުގެ ތެރެއިން ދެ ލަނޑު ކާމިޔާބުކޮށްދިނީ މެޗުގެ މޮޅު ކުޅުންތެރިޔާގެ މަގާމަށް ހޮވުނު އިބްރާހިމް އަސްވަދެވެ. އަދި އެ ޓީމުގެ އަނެއް ދެ ލަނޑު ކާމިޔާބުކޮށްދިނީ އަލީ ޝިފާއު އާއި އަހްމަދު ވިޝާމް (ޖެރާޑް) އެވެ. އެ މެޗުގައި ހިތާދޫގެ ލަނޑުތައް ކާމިޔާބުކޮށްދިނީ އަލީ ހައިސަމް އާއި ޝަހުދާން އަބްދުލް ރައްޒާގް އަދި ރަވާހު މުހައްމަދެވެ.
އެ މެޗު ކާމިޔާބުކުރި ތިމަރަފުށްޓަށް ޝީލްޑްގެ އިތުރުން ފައިސާގެ އިނާމެއްގެ ގޮތުގައި 15،000 ރުފިޔާ ހަވާލު ކޮށްފައިވެއެވެ. ހިތާދޫ އާއި ތިމަރަފުށްޓަކީ ވެސް މިއަހަރުގެ ގޯލްޑަން ފުޓްސަލް ޗެލެންޖްގައި ވާދަކުރާ ދެ ޓީމެވެ. މިދިޔަ އަހަރެކޭ އެއްގޮތަށް މިއަހަރުގެ މުބާރާތުގައި ވެސް ޖުމްލަ 50 ޓީމެއް ވާދަކުރެއެވެ.
ގޯލްޑަން ފުޓްސަލް ޝީލްޑް ކާމިޔާބުކުރި ތ. ތިމަރަފުށި: އެ ޓީމުން ޝީލްޑް އުފުލައިލީ 4-3 ލަނޑުން ބ. ހިތާދޫ ބަލިކޮށްގެން --- ފޮޓޯ/ ގޯލްޑަން ފުޓްސަލް އެސޯސިއޭޝަން
މިއަހަރު އެ މުބާރާތުގެ ޗެމްޕިއަން އަދި ރަނަރަޕް ޓީމަށް ދޭ ފައިސާގެ އިނާމަށް ވަނީ ބޮޑެތި ބަދަލުތަކެއް ގެނެސްފައެވެ. މިދިޔަ އަހަރު ޗެމްޕިއަން ޓީމަށް 50،000 ރުފިޔާގެ ފައިސާގެ އިނާމެއް ދިން ނަމަވެސް، މިއަހަރު ޗެމްޕިއަން ޓީމަށް ހުށަހަޅާފައި ވަނީ 65،000 ރުފިޔާގެ ފައިސާގެ އިނާމެކެވެ. މިދިޔަ އަހަރު ރަނަރަޕް ޓީމަށް 15،000 ރުފިޔާގެ ފައިސާގެ އިނާމެއް ދިން ނަމަވެސް، މިއަހަރު ރަނަރަޕް ޓީމަށް ހުށަހަޅާފައި ވަނީ 25،000 ރުފިޔާގެ ފައިސާގެ އިނާމެކެވެ.
މިއަހަރުގެ ގޯލްޑަން ފުޓްސަލް ޗެލެންޖްގެ ޓައިޓަލް ސްޕޮންސަރަކީ ސޮނީ ސްޕޯޓްސްއެވެ. އަދި އޮންލައިން މީޑިއާ ޕާޓްނަރަކީ ސަން އޮންލައިނެވެ.