23 Oct 2017, 13:04
ދޯހާ(އޮކްޓޯބަރު 23): ގަލްފުގެ ގައުމުތަކުން ގަތަރާ ގުޅުން ކަނޑާލި މައްސަލަ ހައްލު ކުރުމަށްޓަކައި އެގައުމާ މަޝްވަރާ ކުރަން ސައުދީ އަރަބިއާއިން ތައްޔާރު ނޫން ކަމަށް އެމެރިކާގެ ސެކްރެޓަރީ އޮފް ސްޓޭޓް ރެކްސް ޓިލާސަން ވިދާޅުވެއްޖެ އެވެ.
އިއްޔެ ޓިލާސަން އެފަދައިން ވިދާޅުވީ، މެދު އިރުމައްޗަށް ކުރައްވަމުން ގެންދަވާ ދަތުރުފުޅެއްގައި ސައުދީ އަރަބިއާއަށް ވަޑައިގަތުމަށް ފަހު ގަތަރަށް ޒިޔާރަތް ކުރައްވަމުންނެވެ.
ގަތަރުގެ ފޮރިން މިނިސްޓަރު މުހައްމަދު ބިން އަބްދުއްރަހުމާން އަލް ޘާނީއާ އެކު ބޭއްވި ނޫސް ކޮންފަރެންސެއްގައި ވާހަކަ ދައްކަވަމުން ޓިލާސަން ވިދާޅުވީ ސައުދީ އަރަބިއާއިން މަޝްވަރާ ކުރަން ބޭނުންވާ ކަމުގެ އެއްވެސް ސިގްނަލެއް ނުދޭ ކަމަށެވެ.
"ސައުދީ ވަލީ އަހުދު މުހައްމަދު ބިން ސަލްމާނާ ބައްދަލުކުރުމަށް ފަހު އަޅުގަނޑު ވަނީ (ގަތަރުގެ މައްސަލައާ ބެހޭ ގޮތުން) މަޝްވަރާ ކުރަން އެދިފަ. ނަމަވެސް އެގައުމުން ވާހަކަ ދައްކަން ތައްޔާރަށް އޮތް ކަމުގެ ސިގްނަލެއް ނުދޭ،" ޓިލާސަން ވިދާޅުވި އެވެ.
ނަމަވެސް ގަތަރުގެ ފޮރިން މިނިސްޓަރު މުހައްމަދު ބިން އަބްދުއްރަހްމާން ވަނީ ސައުދީ އަރަބިއާއިން ވާހަކަ ދައްކަން ބޭނުން ނުވި ނަމަވެސް ގަތަރުން އެކަމަށް ތައްޔާރަށް އޮތް ކަމަށް ބުނެފައެވެ. އަދި ގަލްފުގެ ގައުމުތަކުގެ އެއްބައިވަންތަކަމަކީ ސަރަހައްދީ ސަލާމަތަށްވެސް މުހިއްމު ކަމެއް ކަން ފާހަގަ ކުރައްވައިފައެވެ.
މިދިޔަ ޖޫން މަހުގެ ފަސް ވަނަ ދުވަހު ސައުދީ އަރަބިއާ، ޔުނައިޓެޑް އެރެބް އެމިރޭޓްސް، މިސްރު އަދި ބަހްރެއިން އިން ވަނީ ގަތަރާ އެކު އޮތް ޚާރިޖީ ގުޅުންތައް ކަނޑާލައި، އެގައުމަށް ކަނޑުންނާއި، އެއްގަމުންނާއި، ވައިގެ މަގުން ކުރާ ދަތުރުތައް ހުއްޓާލައިފައެވެ. އެގައުމުތަކުން ގަތަރާ ގުޅުން ކަނޑާލީ އެގައުމުން ޓެރަރިޒަމަށް ހަރަދު ކުރާ ކަމަށާއި، ސަރަހައްދީ ގޮތުން އެގައުމުތަކާ އެންމެ ވާދަވެރި އީރާނާ ގާތް ގުޅުންތައް ބާއްވާ ކަމަށް ބުނެ އެވެ.
ގަތަރުން ވަނީ އެތުހުމަތުތައް ދޮގުކޮށްފައެވެ. (އަލްޖަޒީރާ)