24 Oct 2017, 13:45
ޖަމިއްޔަތުލް އިސްލާމްގެ ފަރާތުން ރޮހިންގާ މީހުންނަށް އެހީވުމަށް މާލޭގައި ފައިސާ އެއްކުރުމަށް ހިންގި ހަރަކާތުން ލިބުނު 3،296 ޑޮލަރު (50،842.32 ރުފިޔާ) ބަންގުލާދޭޝް ބޯޑަރުގައި ފޭލިގެ ޖަހައިގެން އުޅޭ މުސްލިމުންނަށް ހަދިޔާކޮށްފި އެވެ.
ޖަމިއްޔަތުލް އިސްލާމްގެ ފަރާތުން މިއަދު ނެރުނު ބަޔާނެއްގައި ބުނީ އެ ޖަމިއްޔާ އާއި އަލްކައުނު ގުޅިގެން ހިންގި ހަރަކާތުން ލިބުނު ފައިސާ އެ ދެ ޖަމިއްޔާގެ އޮފިޝަލުން ބަންގާޅު ބޯޑަރަށް ގޮސް ފައިސާ އާއި ތަކެތި ހަވާލު ކުރީ މިދިޔަ ބުރާސްފަތި އަދި ހުކުރު ދުވަހު ކަމަށެވެ.
އެ ޖަމިއްޔާ އިން ބުނީ ބަންގާޅު ބޯޑަރުގައި ދިރިއުޅޭ ރޮހިންގާ ފޭލިގެތަކުގެ ތެރެއިން 95 ފޭލިގެއަކަށް އެހީތެރިކަން ފޯރުކޮށްދީފައިވާ ކަމަށެވެ. އަދި ބުނީ ގިނަ މީހުން ދިރިއުޅޭ ފޭލިގެއަކަށް 1000 ޓާކާ ދިން ކަމަށާއި އަދި މަދު މީހުން އުޅޭ ފޭލިގެއަކަށް 500 ޓާކާގެ ރޭޓުން ފައިސާ ހަވާލު ކުރި ކަމަށެވެ. އެ ގޮތުން ޖުމުލަ 226،478.40 ޓާކާ ހަދިޔާ ކުރި ކަމަށެވެ. އޭގެ އިތުރުން މުންޑާއި ރަޖާ އާއި ކުރުތާ ފަދަ ފޭރާން ވެސް ހަދިޔާ ކުރި ކަމަށެވެ.
އެ ޖަމިއްޔާ އިން ބުނީ އެ ފައިސާ އަކީ ހަފްތާއެއް ވަންދެން އިބްރާހީމް މިސްކިތުގަޔާއި އަދި ވިޔަފާރިވެރިންގެ މިސްކިތުގައި ބެހެއްޓި ދެ ފަންޑް ފޮށިން ލިބުނު ފައިސާ ކަމަށެވެ.