31 Oct 2017, 00:46
އުރީދޫ ދިވެހި ޕްރިމިއާ ލީގުގައި ގދ. ތިނަދޫގެ މައްޗަށް ކުރި ހޯދައި އުރީދޫ ލީގުގެ އެއް ވަނާގައި ނިއު ރޭޑިއަންޓުން ހަމަޖެހިލައިފި އެވެ.
ގައުމީ ފުޓުބޯޅަ ދަނޑުގައި ކުޅުނު މި މެޗުު ނިއު އިން ކާމިޔާބު ކުރީ 1-3 ގެ ނަތީޖާއަކުންނެވެ. މި މޮޅާއެކު އެ ޓީމު ލީގުގެ އެއް ވަނާގައި އޮތީ 11 މެޗުން 30 ޕޮއިންޓް ހޯދައިގެންނެވެ. ދެ ވަނާގައި ޓީސީ އެއް މެޗު މަދުން ކުޅެ 25 ޕޮއިންޓާ އެކު އޮތް އިރު މާދަމާ ރޭ ކުޅޭ މެޗުން ށ. މިލަންދޫ ބަލިކޮށްފިނަމަ ނިއުގެ ލީޑު ދެ ޕޮއިންޓަށް ކުޑަ ވާނެއެވެ.ެ
މިރޭ މެޗުން ބަލިވި ތިނަދޫއަށް ވަނީ ގަދަ ހަތަރަކަށް އެރުމަށް އިތުރު އުނދަގޫތަކެއް ކުރިމަތިވެފަ އެވެ. ތިނަދޫ އަށް 11 މެޗުން 12 ޕޮއިންޓް ލިބިފައިވާއިރު ހަތަރު ވަނައިގަ އޮތްގްރީން ސްޓްރީޓްސް އަށް 11 މެޗުން 16 ޕޮއިންޓް ލިބިފައިވެއެވެ.
މެޗު ފަށައިގެން ދެ ވަނަ މިނިޓުގައި އޭރިއާ ބޭރުން ނިއުގެ އަލީ ފާސިރު (ސެންޓޭ) ފޮނުވާލި ހިލޭ ޖެހުން ތިނަދޫގެ ކީޕަރު ޒަބެނިކޯވް ރުސްލާން ވަނީ ކޯނަރަކަށް ބޭރުކޮށްލައިފަ އެވެ. އޭގެ ފަހުން މެޗުގެ 15 ވަނަ މިނިޓުގައި ނިއުގެ އަލީ އަޝްފާގު (ދަގަނޑޭ) ފޮނުވާލި ބޯޅަ ވެސް ކީޕަރު ރުސްލާން ވަނީ މަތަކޮށްފަ އެވެ.
ނިއު އަށް މެޗުގެ ލީޑު ނަގައިދިނީ 20 ވަނަ މިނިޓުގައި އެ ޓީމުގެ މިޑްފީލްޑަރު ކަންޑޭލާއެވެ. ސެންޓޭ ނަގައިދިން ކޯނަރުން ތިނަދޫ ކުޅުންތެރިންނަށް ލިބުމުގެ ކުރިން އެންހަލް ލުއިޒް ވަނީ ބޮލުން ގޯލުގެ ތެރެއަށް ފޮނުވާލައިފަ އެވެ.
ފުރަތަމަ ލަނޑަށް ފަހު ނިއު އިން ރަނގަޅަށް ކުޅެމުން އައިސް އެ ޓީމަށް ލީޑުފުޅާކޮށްދިނީ މެޗުގެ 40 ވަނަ މިނިޓްގައި އަލީ އަޝްފާގް(ދަގަނޑޭ) އެވެ. އޭރިއާ ތެރެއިން ގަލާޑޯ ދިން ބޯޅަ ދަގަނޑޭ ވަނީ ގޯލުގެ ކަނަށް އަމާޒުކޮށްލައިފަ އެވެ. އެ ބޯޅަ ގޯލަށް ވަނީ ދަނޑީގައި ވެސް ޖެހިފަ އެވެ.
ދެ ވަނަ ހާފު ފަށައިގެން ވެސް ނިއު އިން ރަނގަޅު ހަމަލާތަކެއް އުފައްދަމުން ދިޔަ އިރު ތިނަދޫ އިން ވެސް ވަނީ ނުރައްކާތެރި ހަމަލާ ނިއުގެ ގޯލަށް އަމާޒު ކޮށްލާފައެވެ. ނިއުގެ އޭރިއާ ތެރެއިން ތިނަދޫ ކުޅުންތެރިން އެޓޭކެއް އުފައްދަން އުޅުނު ބޯޅައެއް ނިއުގެ ކުޅުންތެރިއަކު ގައިގައި ޖެހިފައި އަމާޒުވީ ދަނޑިއަށެވެ.
ތިނަދޫ މެޗަށް އެނބުރި އައީ 65 ވަނަ މިނިޓްގައި ހޯޒޭ އަވީލާގެ ލަނޑުންނެވެ. އަރިމަތިން އަހުމަދު ރިޒުވާން (ރިޒޭ) ހުރަސްކޮށްލި ބޯޅަ ކީޕަރު އިމްރާނަށް އެއްވެސް ފުރުސަތެއް ނުދީ އަވީލާ ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ.
ތިނަދޫ އިން ލަނޑު ޖެހި ނަމަވެސް އޭގެ ފަސް މިނިޓް ފަހުން އަދްރިއަން ގަލާޑޯ ވަނީ ނިއު އަށް ތިން ވަަނަ ލަނޑެއް ޖަހައިދީ ތިން ޕޮއިންޓް ޔަގީން ކޮށްދީފައެވެ.
ލީގުގައި މާދަމާ ހަވީރު ކުޅޭ މެޗުގައި ބައްދަލު ކުރާނީ އއ. މާޅޮހާއި މާޒިޔާ އެވެ.