01 Nov 2017, 22:00
އަންނަ އަހަރު ބާއްވާ ރިޔާސީ އިންތިހާބަކީ މިނިވަން އިންސާފުވެރި އިންތިހާބަކަށް ހަދާނެ ކަމަށް އިލެކްޝަން ކޮމިޝަނުން ބުނި ނަމަވެސް ރާއްޖޭގެ ސިޔާސީ މަސްރަހު މިހާރު އޮތް ގޮތުން އެކަން ގަބޫލު ނުކުރެވޭ ކަމަށް ގުޅިފައިވާ އިދިކޮޅު ފަރާތްތަކުން ބުނެފިއެވެ.
އިދިކޮޅު ކޯލިޝަނުން އެގޮތަށް ބުނެފައި މި ވަނީ، ކުރިއަށް އޮތް ރިޔާސީ އިންތިހާބަކީ މިނިވަން އިންސާފުވެރި އިންތިހާބަކަށް ހެދުމަށް އެ ކޮމިޝަނުން ކުރަމުން ގެންދާ މަސައްކަތްތައް ކުރުންމަތީ ދެމި ތިބޭނެ ކަމަށް ބުނެ އިލެކްޝަން ކޮމިޝަނުން ނެރުނު ބަޔާނަށް ރައްދު ދެމުންނެވެ.
އަންނަ އަހަރުގެ ރިޔާސީ އިންތިހާބު ބޭއްވުމަށް މިނިވަން މާހައުލެއް ގާއިމް ކޮށްދިނުމަށް މިދިޔަ ހަފްތާ ތެރޭގައި ރާއްޖެ ވަޑައިގަތް ޔޫރަޕިއަން ޔޫނިއަންގެ ވަފުދުން ސަރުކާރަށް ގޮވާލުމުން އިއްޔެ ނެރުނު އެ ބަޔާނުގައި އީސީން ވަނީ އެ ކޮމިޝަންގެ މަސައްކަތާ ގުޅޭ ގޮތުން ހަގީގަތް އޮޅުވާލާ ދޮގު މައުލޫމާތު ފެތުރުން ހުއްޓާލުމަށް ގޮވާލާފައެވެ.
އިދިކޮޅު ޕާޓީތަކުން މ. ކުނޫޒުގައި މިއަދު ބޭއްވި ނޫސްކޮންފަރެންސެއްގައި ވާހަކަ ދައްކަވަމުން އެމްޑީޕީގެ ޗެއާ ޕާސަން ހަސަން ލަތީފު ވިދާޅުވީ، އިންތިހާބެއް އިންސާފުވެރިކަމާއެކު ކުރިއަށް ގެންދެވޭނީ ވޯޓުލުމުން ފެށިގެން ގޮސް ވޯޓު ގުނައި، ނަތީޖާ ފާޅު ކުރުމަށް ހިނގާ ކަންތައްތަކަށް އެކަނި ނޫން ކަމަށެވެ.
ހަސަން ލަތީފު ވިދާޅުވި ގޮތުގައި މިނިވަން އިންސާފުވެރި އިންތިހާބަކާ ކުރިމަތިލާއިރު އެއްވެ އުޅުމުގެ މިނިވަންކަމާއި ސިޔާސީ ޕާޓީތަކަށް ލިބިފައިވާ ޖާގަ ނިގުޅައިގަތްފައިވާއިރު ހިޔާލުފާޅު ކުރުމާއި ބަސް ބުނުމުގެ ޖާގަ ވަނީ ހަނިކޮށްފަ އެވެ.
ރާއްޖޭގައި މީޑިއާގެ މިނިވަންކަމެއް ނެތްއިރު ހާމަކަން ބޮޑު ގޮތެއްގައި ކުރަންޖެހޭ ކަންކަން އިލެކްޝަން ކޮމިޝަނުން ކުރަމުން ނުދާކަން ވެސް އޭނާ ފާހަގަ ކުރެއްވިއެވެ.
ނޫސް ކޮންފަރެންސްގައި ބައިވެރިވެވަޑައިގަތް ޖުމްހޫރީ ޕާޓީގެ ޑެޕިއުޓީ ލީޑަރު އަދި ރައްޔިތުން މަޖިލީހުގެ ކިނބިދޫ ދާއިރާގެ މެމްބަރު އަބްދުﷲ ރިޔާޒު ވިދާޅުވީ، ރިޔާސީ އިންތިހާބުގެ ކަންކަމުގައި އަމަލު ކުރާނެ ގޮތްތަކަކާމެދު ގުޅިފައިވާ ޕާޓީތަކުގެ ލީޑާޝިޕުން މަޝްވަރާތަކެއް ކުރައްވަމުން ގެންދަވާ ކަމަށެވެ.
އެގޮތުން ކޮންމެ ޕާޓީއަކުން ވަކިވަކިން ކެނޑިޑޭޓަކު ނެރޭނީތޯ ނޫނީ އެކުގައި ކޯލިޝަން ކެނޑިޑޭޓެއް ނެރުމުގެ މަޝްވަރާތަކެއް ޕާޓީތަކުގެ އެތެރޭގައި ކުރެވެމުންދާ ކަމަށް ރިޔާޒު ވިދާޅުވިއެވެ.
އަދި ވިދާޅުވީ، ކުރިއަށް އޮތް ރިޔާސީ އިންތިހާބެކޭ އެއްގޮތަށް 2019 ވަނަ އަހަރު ބާއްވާ ރައްޔިތުން މަޖިލީހުގެ އިންތިހާބުގައި އެކުގައި ނުކުތުމަށް ގުޅިފައިވާ ޕާޓީތަކުން މަޝްވަރާ ކުރާނެ ކަމަށެވެ.
ޖުމްހޫރީ ޕާޓީއަށް ރައްޔިތުންގެ މަޖިލީހުގެ ގޮނޑިތަކެއް ލިބުނީ ޕީޕީއެމުން ނަގާފައި ދެއްކީމާ ކަމަށް ރައީސް ޔާމީން މިއަދު ވިދާޅުވުމުން އެކަމަށް ވެސް ރިޔާޒު ވަނީ ރައްދު ދެއްވާފައެވެ.
އޭނާ ވިދާޅުވީ، ޖުމްހޫރީ ޕާޓީގެ މެންބަރުން މަޖިލީހަށް ހޮވުނީ ރައީސް ޔާމީންގެ މޫނު ދައްކައިގެންނެއް ނޫން ކަމަށާއި މެމްބަރުން ހޮވުމުގައި އެންމެ ބުރަކޮށް އުޅުއްވީ އެ ޕާޓީގެ ލީޑަރު ގާސިމް އިބްރާހިމާއި ކުރީގެ ރައީސް މައުމޫން އަބްދުލްގައްޔޫމް ފަދަ ބޭފުޅުން ކަމަށެވެ.
"ގާސިމް އިބްރާހިމްގެ އެތައް މަސައްކަތްޕުޅުން ރައްޔިތުން ކައިރީގައި އެތައް އާދޭސްތަކެއް ދަންނަވައިގެން ރައީސް ޔާމީނަށް އެ ގޮނޑިއާ ހަމައަށް އާދެވުނީވެސް. މިއަދު ހަނދާނެއް ނެތް އެކަން ކަމެއް. ޕީޕީއެމްގެ މެމްބަރުން މަޖިލީހަށް ހޮވުމަށް ކިހާވަރެއްގެ އެހީތެރިކަމެއް ލިބުނުކަން ހަމަ އެ މެމްބަރުންނަށް މިއަދުވެސް އެނގޭނެ،" ރިޔާޒު ވިދާޅުވިއެވެ.
އޭނާ ވިދާޅުވީ، ރައްޔިތުން މަޖިލީހަށް މިހާރު އިންތިހާބުވެފައި ތިއްބެވި ޕީޕީއެމްގެ މެމްބަރުންނަކީ ވެސް ރައީސް ޔާމީންގެ ތާއީދު އޮވެގެން އިންތިހާބުވި މެމްބަރުންތަކެއް ނޫން ކަމަށާއި އެކަމުގައި ވެސް އެންމެ އިސް ދައުރެއް އަދާކުރެއްވީ ގާސިމާއި ކުރީގެ ރައީސް މައުމޫން ކަމަށެވެ.
ދ. މާއެނބޫދޫއަށް ވަޑައިގަތް އެރަށުގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުން ރައީސް ޔާމީން މިއަދު ވިދާޅުވީ، މަޖިލީހުގެ ބޮޑު އަޣުލަބިއްޔަތެއް ރައްޔިތުން ދިނީ ޕީޕީއެމާއި އެމްޑީއޭއަށް ކަމަށެވެ.