09 Nov 2017, 09:22
މަތީ ސާނަވީ ނިންމާ ދަރިވަރުންގެ ތެރެއިން ހައި އެޗީވާސް ސްކޯލާޝިޕް އަށް ޝަރުތު ހަމަވާ ދަރިވަރުން އެ ސްކޯލަޝިޕަށް ކުރިމަތި ލުމުގެ ފުރުސަތު ހުޅުވާލައިފި އެވެ.
ޑިޕާޓްމެންޓް އޮފް ހަޔާ އެޑިއުކޭޝަން އިން ކޮށްފައިވާ އިއުލާނެއްގައި ބުނެފައި ވަނީ މި އަހަރުގެ މެއި، ޖޫންގައި މަތީ ސާނަވީ އިމްތިހާން ފުރިހަމަ ކުރި ދަރިވަރުންގެ ތެރެއިން އިސްލާމް ދިވެހި ހިމެނޭ ގޮތަށް ފަސް އޭ ފާސް ހޯދާފައިވާ ދަރިވަރުންނަށް މި ސްކޯލާޝިޕަށް ކުރިމަތި ލެވޭނެ ކަމަށެވެ.
މި ސްކޮލާޝިޕްގެ ދަށުން ކިޔަވަން ފުރުސަތު ހުޅުވާލާފައި ވަނީ ސާކްގެ ގައުމުތަކުގެ އިތުރުން މެލޭޝިއާ، ތައިލެންޑް، ފިލިޕީންސް އަދި ޗައިނާގަ އެވެ.
ހައި އެޗީވާސް ސްކޮލާޝިޕަށް ގެނައި އިސްލާހުގައި ބުނެފައި ވަނީ ޑީއެޗްއީ އިން ކަނޑައަޅާ ގައުމުތައް ފިޔަވާ އެހެން ގައުމެއްގައި ކިޔެވުމުގެ ފުރުސަތު ދެވޭނީ ސްކޮލާޝިޕް ލިބުނު ފަރާތުން އިޚްތިޔާރުކުރި ކޯސް، ޑީއެޗްއީ އިން ކަނޑައަޅާފައިވާ ލިސްޓުގައި ހިމެނޭ ގައުމެއްގައި ހެދުމަށް ހިނގާ ޚަރަދާ އެއްވަރު
ނުވަތަ އެއަށް ވުރެ އަގު ހެޔޮކޮށް ކިޔެވޭ ނަމަ ކަމަށެވެ.
އެެއްވެސް ޚަރަދެއް އިތުރުވާ ނަމަ، އެ ޚަރަދެއް ޑީއެޗްއީ އިން ދޭ ސަޕްލިމެންޓްރީ ލޯނުގެ ތެރެއިން ދަރިވަރު ދައްކަން، ނުވަތަ އަމިއްލަ ފައިސާ އިން އެ ޚަރަދާ ޒިންމާވާނެކަމުގެ ބޭންކް ގެރެންޓީއެއް ހުށަހެޅުމުން ލިސްޓުގައި ނުހިމެނޭ ގައުމަކުން ކިޔެވުމުގެ ފުރުސަތު ދެވިދާނެ ކަމަށް އެ އިސްލާހުގައިވެ އެވެ.
މީގެ ކުރިން ހައި އެޗީވާސް ސްކޯލަޝިޕްގައި އެ ކުއްޖަކު ބޭނުން ގައުމަކުން ކިޔެވުމުގެ ފުރުސަތު ލިބެ އެވެ.
ސްކޯލާޝިޕަށް ކުރިމަތިލާ ދަރިވަރުން އަންނަ މަހުގެ 27ގެ ކުރިން އެޕްލިކޭޝަން ފޯމު ހުށަހަޅަން ޖެހެ އެވެ. ފޯމު ހުށަހަޅާނީ ވެލާނާގެ ދެވަނަ ފަންގިފިލާގައި ހުންނަ ޑިޕާޓްމެންޓް އޮފް ހަޔާ އެޑިއުކޭޝަނަށެވެ.