15 Nov 2017, 08:55
ނިޔަފަތި ކެއުމަކީ ކުޑަކުދިންގެ އިތުރުން އަހަރެމެން ބޮޑެތި މީހުންގެ ގައިގައި ވެސް އަށަގަނެފައި ހުންނަ ނުބައި އާދައެކެވެ. ފޫހި ވެގެން ގޮސް ވެސް ބައެއް ފަހަރު ނިފަތިތައް އަނގަޔަށް ލެވޭ ގޮތްވެ އެވެ. ހާސްވެ ކަންބޮޑުވެ ލަދު ގަތުމުން ވެސް ނިޔަފަތިތައް އަނގަޔަށްލާ ހެފޭ ގޮތްވެ އެވެ.
ކުޑައިރުން ފަަށައިގެން ކުއްޖާ ބޮޑުވަމުން އަންނައިރު ކުއްޖާ ނިޔަފަތި ކެއުމަކީ މާ ބޮޑު ކަމަކަށް ބެލެނިވެރިންނަކަށް ނުވެ އެވެ. އެހެންވެ އެކަން ދަރިން ލައްވާ ހުއްޓުވާކަށް ވެސް ނޫޅެވެ އެވެ. ނިޔަފަތި ކެއުމަކީ ގިނަ ބަލިތަކެއް ތިމާގެ ހަށިގަނޑަށް ޖައްސާ ކަމެކެވެ. އެހެންވެ އެކަން ކުރުން ހުއްޓާލަން ޖެހޭނެ އެވެ.
ނިޔަފަތި ކެެއުމުން ހުއްޓާލާނީ ކިހިނެއް؟
އަންގި ލެއްވުން
މަސައްކަތް ކުރާ ވަގުތު ވެސް އަންގި ބޭނުން ކުރުމަކީ ނިޔަފަތި ކެއުން ހުއްޓުވިދާނެ ކަމެކެވެ. ސްކޫލް ކުދިންނަށް މި އުކުޅު ތަންކޮޅެއް އުނދަގޫ ވެގެން ދާނެ އެވެ. ފިލާވަޅު ހަދަންވީމާ އަންގި ނަގާފައި މަސައްކަތް ނިމުމުން އަލުން އަންގި ލެއްވިވެސްދާނެ އެވެ. ކުޑަ ދުވަސްކޮޅަކަށް އަންގި ބޭނުން ކުރުމުން އެކަން މަޑުމަޑުން ހައްލު ވެގެންދާނެ އެވެ.
ނިޔަފަތި ކަނޑާފައި ބެހެއްޓުން
އަބަދުވެސް ނިޔަފަތިތައް ރީތިކޮށް ކަނޑާފައި ބަހައްޓާށެވެ. މަސައްކަތުގެ މާހައުލުގައި ބިޒީ ނަމަވެސް ނިޔަފަތި ދިގުވުމުން އެ ކަނޑަން ވަގުތުކޮޅެއް ހުސްކޮށްލާށެވެ. އޭރުން އެކަން ހުއްޓަން ފަސޭހަވެގެންދާނެ އެވެ.
އަނގައިގައި ކޮންމެވެސް ކަހަލަ އެއްޗެއް ބޭއްވުން
ނިޔަފަތި ކެއުން ހުއްޓުމަށް އަބަދު ވެސް އަނގައިތެރެ ބިޒީކޮށް ބަހައްޓާށެވެ. ޗުވިންގަމްއެއް ނޫނީ ސިއްހަތަށް ގެއްލުން ނުލިބޭ ނަޓްސްއެއް ކެއުމުގައި ވަގުތު ހޭދަ ކުރާށެވެ.
މަލަން ބޭނުން ކުރުން
ނިޔަފަތީގައި މަލަން ނޫނީ ޓޭޕް އޮޅާފައި ބަހައްޓާށެވެ. އޭރުން ނިޔަފަތި އަނގަޔަށް ލާން ނުކެރޭ ފަހަރު ވެސްް އާދެ އެވެ.