15 Nov 2017, 08:51
ބޮލީވުޑް ޖޯޑު ސޯހާ އަލީ ޚާން އާއި ކުނާލް ކެއްމޫގެ ދަރިފުޅު އިނާޔާ ނައުމީ ކެއްމޫގެ ފޮޓޯ ފުރަތަމަ ފަހަރަށް އާންމުކޮށްފި އެވެ.
އިނާޔާ އަކީ ދެމީހުންގެ ފުރަތަމަ ދަރިފުޅެވެ. ސޯހާ ވިހައިފައި ވަނީ މިދިޔަ ސެޕްޓެމްބަރު މަހުގެ 29 ވަނަ ދުވަހު އެވެ.
އިނާޔާގެ ފޮޓޯ ފުރަތަމަ ފަހަރަށް އާންމު ކޮށްފައި ވަނީ ކުޑަކުދިންގެ ދުވަހާ ދިމާކޮށެވެ. ކުޑަކުދިންގެ ދުވަހުގެ ތަހުނިޔާއާ އެކު ކުނާލް ޓުވީޓު ކުރި ފޮޓޯގައި ބުނެފައި ވަނީ އިނާޔާގެ މައުސޫމު ކަމުގެ ސަބަބުން ދެމަފިރިންނަށް މިހާރަށް ވުރެ ރަނގަޅު މީހުންނަށް ވުމަށް ހިތްވަރު ލިބޭނެ ކަމަށެވެ.
ސޯހާ އާއި ކުނާލް ފުރަތަމަ ބައްދަލުވީ 2009 ވަނަ އަހަރު ރިލީޒް ކުރި ފިލްމު 'ޑޫންޑުތޭ ރެހެ ޖާއޮގޭ'ގެ ސެޓުން ކަމަށްވާ އިރު އެ ދެމީހުން ކައިވެނިކޮށްފައި ވަނީ 2015 ވަނަ އަހަރުގެ ޖަނަވަރީ މަހުގެ 25 ވަނަ ދުވަހު އެވެ.