16 Nov 2017, 09:25
ރޯހިތު ޝެޓީ ޑައިރެކްޓްކޮށްފައިވާ "ގޯލްމާލް އަގެއިން" ރިލީޒްކުރިތާ 25 ދުވަހުގެ ތެރޭގައި 200 ކުރޯޑު (ދެ ބިލިއަން) ރުޕީސް އަށް ވުރެ ބޮޑު އާމްދަނީ އެއް ލިބިއްޖެއެވެ.
އެއާއެކު އެ ފިލްމް ވެގެން ގޮސްފައިވަނީ އަހަރުގެ ވެސް އެންމެ ކާމިޔާބު އަދި މިއަހަރު ރިލީޒްކޮށްފައިވާ ފިލްމުތަކުގެ ތެރެއިން އެންމެ ގިނަ ފައިސާ ހޯދި ފިލްމަށެވެ.
އެ ފިލްމަކީ އަޖޭ ދޭވްގަންގެ ފިލްމު ކެރިއަރުގައި ވެސް އެންމެ ކާމިޔާބު ފިލްމެވެ.
ފިލްމްގެ ޑައިރެކްޓަރު ބުނީ ފިލްމާ މެދު ވަރަށް ހިތްހަމަޖެހޭ ކަމަށާއި ފިލްމުގެ ހުރިހާ ކަންތައްތަކެއް ވެސް ކުރިއަށް ދިޔައީ ވަރަށް ރަނގަޅަށް ކަމަށެވެ.
ތަރިންގެ އެކްޓިންގް އަށް ތައުރީފު ކުރަމުން ރޯހިތު ބުނީ ފިލްމްގެ ކްރެޑިޓް ހަމަ އެ ތަރިންނަށް ލިބިފައިވާކަމަށެވެ.
ބިރުވެރި-ކޮމެޑީ ކަންތައްތަކެއް ހިމެނޭ އެ ފިލްމުގައި އަޖޭގެ އިތުރުން ހަރަކާތްތެރިވަނީ ޕަރިނީތީ ޗޯޕްރާ، ތައްބޫ، އަރްޝަދު ވާރްސީ އަދި ތުޝާރު ކަޕޫރެވެ.